ಹಾಲಿ ಚಾಂಪಿಯನ್ ಆಸೀಸ್‌ಗೆ ಆಘಾತ!

ಲಂಡನ್: ಐಸಿಸಿ 2019 ಏಕದಿನ ವಿಶ್ವಕಪ್‌ನಲ್ಲಿ ಇನ್ನಷ್ಟೇ ಮೊದಲ ಪಂದ್ಯವನ್ನು ಆಡಬೇಕಾಗಿರುವ ಆಸ್ಟ್ರೇಲಿಯಾ ತೀವ್ರ ಆಘಾತಕ್ಕೊಳಗಾಗಿದೆ.

ಇತ್ತೀಚೆಗಷ್ಟೇ ತಂಡವನ್ನು ಸೇರಿಕೊಂಡಿರುವ ಎಡಗೈ ಆಕ್ರಮಣಕಾರಿ ಓಪನರ್ ಡೇವಿಡ್ ವಾರ್ನರ್ ಗಾಯದ ಸಮಸ್ಯೆಯಿಂದ ಬಳಲುತ್ತಿದ್ದು, ಅಫಘಾನಿಸ್ತಾನ ವಿರುದ್ದ ನಡೆಯಲಿರುವ ಮೊದಲ ಪಂದ್ಯಕ್ಕೆ ಅಲಭ್ಯವಾಗಲಿದ್ದಾರೆ.

ಬಾಲ್ ಟ್ಯಾಂಪರಿಂಗ್ ಪ್ರಕರಣದಲ್ಲಿ ಸಿಕ್ಕಿ ಬಿದ್ದು ಒಂದು ವರ್ಷದ ನಿಷೇಧ ಶಿಕ್ಷೆಯನ್ನು ಎದುರಿಸಿರುವ ವಾರ್ನರ್, ಇಂಡಿಯನ್ ಪ್ರೀಮಿಯರ್ ಲೀಗ್‌ನಲ್ಲಿ ಭರ್ಜರಿ ಕಮ್‌ಬ್ಯಾಕ್ ಮಾಡಿದ್ದರು. ತದಾ ಬೆನ್ನಲ್ಲೇ ವಿಶ್ವಕಪ್‌ಗಾಗಿನ ಆಸ್ಟ್ರೇಲಿಯಾ ತಂಡಕ್ಕೆ ಬುಲಾವ್ ಪಡೆದಿದ್ದರು.

ಗಾಯದ ಸಮಸ್ಯೆಯಿಂದಾಗಿ ಕೊನೆಯ ಅಭ್ಯಾಸ ಪಂದ್ಯದಲ್ಲಿ ವಾರ್ನರ್ ಭಾಗವಹಿಸಿರಲಿಲ್ಲ. ಇದೀಗ ಚೇತರಿಕೆಯ ಹಂತದಲ್ಲಿರುವ ವಾರ್ನರ್ ಅಭ್ಯಾಸ ಅವಧಿಯಿಂದಲೂ ದೂರವುಳಿದು ವಿಶ್ರಾಂತಿಗೆ ಮೊರೆ ಹೋಗಿದ್ದಾರೆ.

ಹಾಗೊಂದು ವೇಳೆ ವಾರ್ನರ್ ಅಲಭ್ಯವಾದರೆ ನಾಯಕ ಆ್ಯರೋನ್ ಫಿಂಚ್ ಜತೆ ಉಸ್ಮಾನ್ ಖವಾಜ ಇನ್ನಿಂಗ್ಸ್ ಆರಂಭಿಸಲಿದ್ದಾರೆ.