ವಿಶ್ವಕಪ್‌ನಲ್ಲಿ ಧೋನಿ ಸಲಹೆಗಳು ಕೊಹ್ಲಿ ಪಾಲಿಗೆ ನಿರ್ಣಾಯಕ: ಸಚಿನ್

ಲಂಡನ್: ಐಸಿಸಿ 2019 ಏಕದಿನ ವಿಶ್ವಕಪ್‌ನಲ್ಲಿ ಮಾಜಿ ನಾಯಕ ಹಾಗೂ ಹಿರಿಯ ಅನುಭವಿ ಆಟಗಾರ ಮಹೇಂದ್ರ ಸಿಂಗ್ ಧೋನಿ ಸಲಹೆಗಳು ಟೀಮ್ ಇಂಡಿಯಾ ಕಪ್ತಾನ ವಿರಾಟ್ ಕೊಹ್ಲಿ ಪಾಲಿಗೆ ನಿರ್ಣಾಯಕವೆನಿಸಲಿದೆ ಎಂದು ಮಾಜಿ ಐಕಾನ್ ಸಚಿನ್ ತೆಂಡೂಲ್ಕರ್ ಅಭಿಪ್ರಾಯಪಟ್ಟಿದ್ದಾರೆ.

2011ರಲ್ಲಿ ಮಹೇಂದ್ರ ಸಿಂಗ್ ಧೋನಿ ಮುಂದಾಳತ್ವದಲ್ಲಿ ಭಾರತ 28 ವರ್ಷಗಳ ಬಳಿಕ ವಿಶ್ವಕಪ್ ಜಯಿಸಿತ್ತು. ಅಂದು ಆರನೇ ಹಾಗೂ ಕೊನೆಯ ವಿಶ್ವಕಪ್ ಆಡುತ್ತಿರುವ ಸಚಿನ್ ತೆಂಡೂಲ್ಕರ್ ಅವರಿಗಾಗಿ ಭಾರತ ವಿಶ್ವಕಪ್ ಗೆದ್ದಿತ್ತು. ಅಂದಿನ ತಂಡದಲ್ಲಿ ವಿರಾಟ್ ಕೊಹ್ಲಿ ಸಹ ಇದ್ದರು.

ಇದೀಗ ಎಂಟು ವರ್ಷಗಳ ಬಳಿಕ ವಿರಾಟ್ ಕೊಹ್ಲಿ ಚೊಚ್ಚಲ ಬಾರಿಗೆ ವಿಶ್ವಕಪ್‌ನಲ್ಲಿ ನಾಯಕತ್ವ ವಹಿಸುತ್ತಿದ್ದಾರೆ. ಅತ್ತ 37ರ ಹರೆಯದ ಧೋನಿ ಪಾಲಿಗಿದು ಕೊನೆಯ ವಿಶ್ವಕಪ್ ಆಗಿದೆ.

ಭಾರತೀಯ ಡ್ರೆಸ್ಸಿಂಗ್ ರೂಮ್‌ನಲ್ಲಿ ಕಳೆದ ಕೆಲವು ವರ್ಷಗಳಲ್ಲಿ ಧೋನಿ ಮುಖ್ಯ ಪಾತ್ರ ವಹಿಸುತ್ತಿದ್ದಾರೆ. ಈಗಲೂ ಮೈದಾನದಲ್ಲಿ ಒತ್ತಡದ ಪರಿಸ್ಥಿತಿಯನ್ನು ನಿಭಾಯಿಸಲು ಕೊಹ್ಲಿಗೆ ನೆರವಾಗಲಿದ್ದಾರೆ. ಪರಿಸ್ಥಿತಿಗೆ ಅನುಗುಣವಾಗಿ ಬೌಲರ್‌ಗಳಿಗೆ ಅಗತ್ಯ ಮಾಹಿತಿಯನ್ನು ನೀಡುತ್ತಾರೆ. ಧೋನಿ ಅವರಂತಹ ಆಟಗಾರರು ವಿಕೆಟ್ ಹಿಂದುಗಡೆ ಇರುವುದು ಕೊಹ್ಲಿ ಪಾಲಿಗೆ ಬೋನಸ್ ಆಗಿರಲಿದೆ ಎಂದು ಸಚಿನ್ ಅಭಿಪ್ರಾಯಪಟ್ಟರು.

ವಿಕೆಟ್ ಹಿಂದುಗಡೆ ನಿಲ್ಲುವಾಗ ಬ್ಯಾಟ್ಸ್‌ಮನ್‌ರಂತೆ ಪಂದ್ಯದ ಸಂಪೂರ್ಣ ಚಿತ್ರಣವನ್ನು ಪಡೆಯಲಿದ್ದಾರೆ. ಹಾಗೆಯೇ ಧೋನಿ ನೀಡುವ ಸಲಹೆಗಳು ನಿರ್ಣಾಯಕವೆನಿಸಲಿದೆ. ಚೆಂಡು ಉತ್ತಮವಾಗಿ ಬ್ಯಾಟ್‌ಗೆ ಬರುತ್ತಿದೆಯೇ ಇಲ್ಲವೋ? ಏನೇ ಪರಿಸ್ಥಿತಿಯಿದ್ದರೂ ಅದನ್ನು ನಾಯಕನ ಜತೆ ಹಂಚಿಕೊಳ್ಳಬಹುದಾಗಿದೆ. ಹಾಗಾಗಿ ಧೋನಿ ಅವರಂತಹ ಅನುಭವಿ ಆಟಗಾರರು ವಿಕೆಟ್ ಹಿಂದುಗಡೆ ನಿಲ್ಲುವುದು ಕೊಹ್ಲಿಗೆ ಬೋನಸ್ ಆಗಿರಲಿದೆ ಎಂದರು.