ಗಾಯದ ಸಮಸ್ಯೆ; ಫೀಲ್ಡಿಂಗ್ ಮಾಡಿದ ಸಹಾಯಕ ಕೋಚ್!

ಸೌತಾಂಪ್ಟನ್: ಏಕದಿನ ವಿಶ್ವಕಪ್‌ಗೂ ಮುಂಚಿತವಾಗಿ ನಡೆಯುತ್ತಿರುವ ಅಭ್ಯಾಸ ಪಂದ್ಯದಲ್ಲಿ ಪ್ರಶಸ್ತಿ ಫೇವರಿಟ್ ಆತಿಥೇಯ ಇಂಗ್ಲೆಂಡ್ ತಂಡವು ಗಾಯದ ಸಮಸ್ಯೆಯನ್ನು ಎದುರಿಸುತ್ತಿದೆ.

ಈ ನಡುವೆ ಆಸ್ಟ್ರೇಲಿಯಾ ವಿರುದ್ಧ ಶನಿವಾರ ನಡೆದ ಅಭ್ಯಾಸ ಪಂದ್ಯದಲ್ಲಿ ಗಾಯದ ಸಮಸ್ಯೆಯಿಂದಾಗಿ ಅನ್ಯ ದಾರಿಯಿಲ್ಲದೆ ಇಂಗ್ಲೆಂಡ್ ಸಹಾಯಕ ಕೋಚ್ ಪಾಲ್ ಕಾಲಿಂಗ್‌ವುಡ್‌ ಫೀಲ್ಡಿಂಗ್‌ಗಿಳಿದ ಘಟನೆ ನಡೆದಿದೆ.

ಇಂಗ್ಲೆಂಡ್ ವೇಗಿಗಳಾದ ಮಾರ್ಕ್ ವುಡ್ ಹಾಗೂ ಜೋಫ್ರಾ ಆರ್ಚರ್ ಗಾಯದ ಆತಂಕಕ್ಕೊಳಗಾಗಿದ್ದಾರೆ. ಪರಿಣಾಮ 42ರ ಹರೆಯದ ಮಾಜಿ ಇಂಗ್ಲಿಂಷ್ ಆಟಗಾರ ಪಾಲ್ ಕಾಲಿಂಗ್‌ವುಡ್ ಕ್ಷೇತ್ರರಕ್ಷಣೆಗಾಗಿ ಮೈದಾನಕ್ಕಿಳಿಯಬೇಕಾಯಿತು.

ನಿಮ್ಮ ಮಾಹಿತಿಗಾಗಿ ಕಾಲಿಂಗ್‌ವುಡ್ ಮುಂದಾಳತ್ವದಲ್ಲಿ ಇಂಗ್ಲೆಂಡ್ 2010ರ ಟ್ವೆಂಟಿ-20 ವಿಶ್ವಕಪ್ ಜಯಿಸಿತ್ತು. ಇದೀಗ ನಿವೃತ್ತಿ ಬಳಿಕ ಮಗದೊಮ್ಮೆ ಇಂಗ್ಲೆಂಡ್‌ಗಾಗಿ ಮೈದಾನಕ್ಕಿಳಿದಿರುವುದು ಹೆಚ್ಚಿನ ಕುತೂಹಲ ಮೂಡಿಸಿತ್ತು.

ಮಾರ್ಕ್ ವುಡ್ ಸ್ನಾಯು ಸೆಳೆತಕ್ಕೊಳಗಾದರೆ ಆರ್ಚರ್ ಸಹ ಗಾಯದ ಸಮಸ್ಯೆಯಿಂದಾಗಿ ಮೈದಾನ ತೊರೆಯಬೇಕಾಯಿತು. ಪರಿಣಾಮ ವಿಶ್ರಾಂತಿಯಲ್ಲಿದ್ದ ಜೋ ರೂಟ್ ಸಹ ಫೀಲ್ಡಿಂಗ್‌ಗಿಳಿಯಬೇಕಾಯಿತು.

ಇದಕ್ಕೂ ಮೊದಲು ನಾಯಕ ಇಯಾನ್ ಮಾರ್ಗನ್ ಕೈ ಬೆರಳಿನ ಗಾಯದಿಂದಾಗಿ ವಿಶ್ರಾಂತಿ ಪಡೆದಿದ್ದರು. ಆದಿಲ್ ರಶೀದ್ ಕೂಡಾ ಭುವ ನೋವಿನಿಂದಾಗಿ ಮೈದಾನದಿಂದ ದೂರವುಳಿದಿದ್ದರು.

ಇಂಗ್ಲೆಂಡ್‌ನ ಶ್ರೇಷ್ಠ ಆಲ್‌ರೌಂಡರ್‌ಗಳ ಸಾಲಿನಲ್ಲಿ ಗುರುತಿಸಿಕೊಂಡಿರುವ ಕಾಲಿಂಗ್‌ವುಡ್ 2001ರಿಂದ 2011ರ ಅವಧಿಯಲ್ಲಿ 197 ಏಕದಿನಗಳಲ್ಲಿ 5000 ರನ್ ಹಾಗೂ 111 ವಿಕೆಟುಗಳನ್ನು ಕಬಳಿಸಿದ್ದಾರೆ. ಹಾಗೆಯೇ 68 ಟೆಸ್ಟ್ ಹಾಗೂ 36 ಟ್ವೆಂಟಿ-20 ಪಂದ್ಯಗಳನ್ನು ಆಡಿದ್ದಾರೆ.