ನಂ.4 ಕ್ರಮಾಂಕದ ಗೊಂದಲಕ್ಕೆ ಸಚಿನ್ ಉತ್ತರ

ಹೊಸದಿಲ್ಲಿ: ಮುಂಬರುವ 2019 ಏಕದಿನ ವಿಶ್ವಕಪ್‌ನಲ್ಲಿ ನಾಲ್ಕನೇ ಕ್ರಮಾಂಕದಲ್ಲಿ ಯಾರು ಆಡಲಿದ್ದಾರೆ ಎಂಬುದು ಟೀಮ್ ಇಂಡಿಯಾ ಗೊಂದಲಕ್ಕೆ ಕಾರಣವಾಗಿದೆ.

ಕಳೆದ ಒಂದೆರಡು ವರ್ಷಗಳಿಂದ ಅನೇಕ ಪ್ರಯೋಗಳನ್ನು ನಡೆಸಿದರೂ ಕೊನೆಗೂ ವಿರಾಟ್ ಕೊಹ್ಲಿ ಪಡೆಗೆ ಉತ್ತರ ದೊರಕಲಿಲ್ಲ. ಸದ್ಯ ತಂಡದಲ್ಲಿರುವ ಕೆಎಲ್ ರಾಹುಲ್, ವಿಜಯ್ ಶಂಕರ್ ಹಾಗೂ ದಿನೇಶ್ ಕಾರ್ತಿಕ್ ನಡುವೆ ಯಾರಾದರೂ ಒಬ್ಬರು ನಾಲ್ಕನೇ ಕ್ರಮಾಂಕದಲ್ಲಿ ಕ್ರೀಸಿಗಿಳಿಯುವುದು ಬಹುತೇಕ ಖಚಿತವೆನಿಸಿದೆ.

ಈ ನಡುವೆ ಹೇಳಿಕೆ ಕೊಟ್ಟಿರುವ ಮಾಜಿ ಕ್ರಿಕೆಟ್ ಐಕಾನ್ ಸಚಿನ್ ತೆಂಡೂಲ್ಕರ್ ನಂ.4 ಕ್ರಮಾಂಕ ಕೇವಲ ಒಂದು ನಂಬರ್ ಮಾತ್ರ ಎಂದರು.

ನನಗನಿಸುತ್ತದೆ ನಮ್ಮ ಬಳಿ ಕರ್ತವ್ಯವನ್ನು ನಿಭಾಯಿಸಬಲ್ಲ ಬ್ಯಾಟ್ಸ್‌ಮನ್‌ಗಳಿದ್ದಾರೆ. ನಂ.4 ಕ್ರಮಾಂಕ ಕೇವಲ ಒಂದು ನಂಬರ್ ಮಾತ್ರವಷ್ಟೇ. ನಾಲ್ಕನೇ ಕ್ರಮಾಂಕದ ಬಗ್ಗೆ ಏನೇ ಸಮಸ್ಯೆ ನನಗೆ ಗೋಚರಿಸುತ್ತಿಲ್ಲ ಎಂದಿದ್ದಾರೆ.

ನಮ್ಮ ಹುಡುಗರು ಬೇಕಾದಷ್ಟು ಕ್ರಿಕೆಟ್ ಆಡಿದ್ದು, ತಮ್ಮ ಜವಾಬ್ದಾರಿಯನ್ನು ಚೆನ್ನಾಗಿ ಬಲ್ಲವರಾಗಿದ್ದಾರೆ. ಅದು ನಂ.4, ನಂ.5. ನಂ.6 ಅಥವಾ ನಂ.8 ಕ್ರಮಾಂಕವೇ ಆಗಿರಬಹುದು. ಪರಿಸ್ಥಿತಿಯನ್ನು ಗ್ರಹಿಸುವುದು ಅತಿ ಮುಖ್ಯ ಎಂದರು.