ತಂಡದ ನಿರ್ಧಾರಕ್ಕೆ ಬದ್ಧ: ರಾಹುಲ್

ಹೊಸದಿಲ್ಲಿ: ಅನೇಕ ಊಹಾಪೋಹಗಳ ಬಳಿಕ ಕೊನೆಗೂ ವಿಶ್ವಕಪ್ ತಂಡಕ್ಕೆ ಎಂಟ್ರಿ ಕೊಟ್ಟಿರುವ ಕರ್ನಾಟಕದ ಕೆಎಲ್ ರಾಹುಲ್ ಮುಂಬರುವ ಏಕದಿನ ವಿಶ್ವಕಪ್‌ನಲ್ಲಿ ಯಾವ ಕ್ರಮಾಂಕದಲ್ಲಿ ಆಡಲಿದ್ದಾರೆ ಎಂಬುದು ಬಹಳಷ್ಟು ಕುತೂಹಲವೆನಿಸಿದೆ.

ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ರಾಹುಲ್, ತಂಡದ ನಿರ್ಧಾರಗಳಿಗೆ ಬದ್ಧನಾಗಿರುತ್ತೇನೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ನಾನು ವಿಶ್ವಕಪ್‌ ತಂಡದಲ್ಲಿರಬೇಕೆಂದು ಆಯ್ಕೆ ಸಮಿತಿ ಬಯಸಿದೆ. ಹೀಗಾಗಿ ತಂಡ ತೆಗೆದುಕೊಳ್ಳುವ ಎಲ್ಲ ನಿರ್ಧಾರಗಳಿಗೆ ಬದ್ಧನಾಗಿರುತ್ತೇನೆ ಎಂದು ಪ್ರತಿಕ್ರಿಯಿಸಿದ್ದಾರೆ.

ನಾಲ್ಕನೇ ಕ್ರಮಾಂಕ ಹಾಗೂ ಮೀಸಲು ಆರಂಭಿಕನಾಗಿ ರಾಹುಲ್‌ರನ್ನು ಪರಿಗಣಿಸಲಾಗಿದೆ. ರಾಹುಲ್‌ ಸ್ಪಷ್ಟ ಮಾತುಗಳಲ್ಲಿ ಏನನ್ನೂ ಹೇಳಿಲ್ಲ. ಆದರೆ, ಪ್ರಸ್ತುತ ಚರ್ಚೆಯ ಕೇಂದ್ರಬಿಂದುವಾಗಿರುವ 'ನಾಲ್ಕನೆ ಕ್ರಮಾಂಕ'ದಲ್ಲಿ ಆಡಲು ಮಾನಸಿಕವಾಗಿ ಸಿದ್ಧವಾಗಿರುವ ಸುಳಿವಂತೂ ಅವರ ಮಾತುಗಳಿಂದ ವ್ಯಕ್ತವಾಯಿತು.

''ಕಳೆದ ಕೆಲವು ತಿಂಗಳಿಂದ ನಾನು ಉತ್ತಮವಾಗಿಯೇ ಬ್ಯಾಟಿಂಗ್‌ ಮಾಡುತ್ತಿದ್ದೇನೆ. ಇಂಗ್ಲೆಂಡ್‌ ಲಯನ್ಸ್‌ ವಿರುದ್ಧ ಆಡಿರುವ ಸರಣಿಯಲ್ಲಿ ನನ್ನ ಬ್ಯಾಟಿಂಗ್‌ ಕೌಶಲದ ಕಡೆಗೆ ಹೆಚ್ಚಿನ ಗಮನ ಹರಿಸಿದೆ. ಆಸ್ಪ್ರೇಲಿಯಾ ವಿರುದ್ಧದ ಟಿ20 ಹಾಗೂ ಐಪಿಎಲ್‌ನಲ್ಲಿಯೂ ಸಾಮರ್ಥ್ಯ‌ ಸಾಬೀತುಪಡಿಸಿದ್ದೇನೆ. ನನ್ನ ಬ್ಯಾಟಿಂಗ್‌ ತಂತ್ರಗಾರಿಕೆಯನ್ನು ಬದಲಾಯಿಸಲು ಮುಂದಾಗಿಲ್ಲ. ಆದರೆ, ಸರಳವಾಗಿ ಬ್ಯಾಟ್‌ ಮಾಡುವುದನ್ನು ರೂಡಿಸಿಕೊಂಡಿದ್ದೇನೆ,'' ಎಂದರು.

''ಇಂಗ್ಲೆಂಡ್‌ಗೆ ಈ ಹಿಂದೆ ಪ್ರವಾಸ ಕೈಗೊಂಡಿದ್ದಾಗ ಉತ್ತಮ ಪ್ರದರ್ಶನವನ್ನೇ ನೀಡಿದ್ದೆ. ಆದರೆ, ಹಿಂದಿನ ಸರಣಿಗಳಲ್ಲಿನ ಸಾಧನೆಗೂ ಪ್ರಸ್ತುತ ಸ್ಥಿತಿಗೂ ವ್ಯತ್ಯಾಸವಿದೆ. ಈಗಿನ ಪರಿಸ್ಥಿತಿಗೆ ಪೂರಕವಾಗಿ ಆಡುವುದು ಅಗತ್ಯ,'' ಎಂದು ವಿಶ್ವಕಪ್‌ನಲ್ಲಿ ಯಾವ ರೀತಿ ಪ್ರದರ್ಶನ ನೀಡುವಿರಿ ಎಂಬ ಪ್ರಶ್ನೆಗೆ ಉತ್ತರಿಸಿದರು.