ನ್ಯೂಜಿಲೆಂಡ್ ಆಟಗಾರರು ಸಂಘಟಿತರಾಗಿ ಆಡಬೇಕು: ಹರ್ಷ ಭೋಗ್ಲೆ

ಶನಿವಾರದ ಪಂದ್ಯದಲ್ಲಿ ನ್ಯೂಜಿಲೆಂಡ್ ಆಟಗಾರರು ಆಸ್ಟ್ರೇಲಿಯಾ ವಿರುದ್ಧ ಸಂಘಟಿತರಾಗಿ ಆಡಬೇಕು ಎಂದು ಕ್ರಿಕೆಟ್‌ ವಿಶ್ಲೇಷಕ ಹರ್ಷ ಭೋಗ್ಲೆ ಹೇಳಿದ್ದಾರೆ.

ವಿಶ್ವಕಪ್‌ನಲ್ಲಿ ಆಸ್ಪ್ರೇಲಿಯಾ ತಂಡ ಸೊಕ್ಕಿನ ಹೆಜ್ಜೆಯನ್ನಿಡುತ್ತಿರುವ ವೇಳೆಯಲ್ಲಿ ನ್ಯೂಜಿಲೆಂಡ್‌ನ ಪ್ರಮುಖ ಆಟಗಾರರು ಲಯ ಕಂಡುಕೊಳ್ಳಲು ಶ್ರಮಿಸುತ್ತಿದ್ದಾರೆ.

ನ್ಯೂಜಿಲೆಂಡ್‌ಗೆ ಇನ್ನು ಮುಂದಿನ ಸವಾಲು ದೊಡ್ಡದಿದೆ. ಅದರಲ್ಲೂ ತಂಡದ ಬ್ಯಾಟಿಂಗ್‌ ಶಕ್ತಿ ಕೇನ್‌ ವಿಲಿಯಮ್ಸನ್‌ ಸುತ್ತಲೇ ಸುತ್ತುತ್ತಿದ್ದು, ಬೆಳವಣಿಗೆಯ ಹಾದಿಯಲ್ಲಿ ಸಾಗುತ್ತಿಲ್ಲ. ಹೀಗಾಗಿ ಆಸ್ಪ್ರೇಲಿಯಾ ವಿರುದ್ಧದ ಪಂದ್ಯದಲ್ಲಿ ತಂಡದ ಪ್ರಮುಖ ಬ್ಯಾಟ್ಸ್‌ಮನ್‌ಗಳಾದ ಮಾರ್ಟಿನ್‌ ಗಪ್ಟಿಲ್‌ ಹಾಗೂ ರಾಸ್‌ ಟೇಲರ್‌ ಶ್ರಮ ವಹಿಸಬೇಕು ಹಾಗೂ ಬೌಲಿಂಗ್‌ನಲ್ಲಿ ಬೌಲ್ಟ್‌ ಹಾಗೂ ಫಗ್ರ್ಯುಸನ್‌ಗೆ ಹೆನ್ರಿ ಮತ್ತು ಸೌಥಿ ಸಾಥ್‌ ನೀಡಬೇಕು.

ನಾಯಕ ಫಿಂಚ್‌ ಹಾಗೂ ವಾರ್ನರ್‌ ನೆರವಿನಿಂದ ಆಸ್ಪ್ರೇಲಿಯಾ ತಂಡ ಇತ್ತೀಚಿನ ಕೆಲ ದಿನಗಳಲ್ಲಿ ಸದೃಢಗೊಳ್ಳುತ್ತಲೇ ಸಾಗುತ್ತಿದೆ. ಇವರಿಬ್ಬರೇ ಸೇರಿಕೊಂಡು ಟೂರ್ನಿಯಲ್ಲಿ ಸಾವಿರ ರನ್‌ ಮಾಡಿದ್ದಾರೆ. ಸ್ಟಾರ್ಕ್‌ ಹಾಗೂ ಬೆಹ್ರೆನ್‌ಡಾರ್ಫ್‌ ಬಲಗೈ ಬ್ಯಾಟ್ಸ್‌ಮನ್‌ಗಳಿಗೆ ಕಾಡುತ್ತಿದ್ದು, ಇನ್‌ಸ್ವಿಂಗ್‌ ಬೌಲಿಂಗ್‌ನ ಪ್ರತಾಪ ತೋರಿಸುತ್ತಿದ್ದಾರೆ.

ಮಧ್ಯಮ ಕ್ರಮಾಂಕದಲ್ಲಿ ಬೌಲಿಂಗ್‌ ಮಾಡುವ ವೇಳೆ ಮ್ಯಾಕ್ಸ್‌ವೆಲ್‌ ಹಾಗೂ ಸ್ಟೋಯ್ನಿಸ್‌ ಇನ್ನಷ್ಟು ಶಕ್ತಿ ತೋರಿಸಬೇಕಿದೆ. ಒಟ್ಟಿನಲ್ಲಿ ಆಸ್ಪ್ರೇಲಿಯಾ ತಂಡ ಭಯಂಕರವಾಗಿ ಕಾಣಿಸುತ್ತಿದೆ ಎಂದು ಭೋಗ್ಲೆ ತಿಳಿಸಿದ್ದಾರೆ.