ವಿಶ್ವಕಪ್ ಕ್ರಿಕೆಟ್: ಮಧುರ ನೆನಪುಗಳ ಮೆರವಣಿಗೆ

ಜಗತ್ತನ್ನು ಒಂದುಗೂಡಿಸುವ, ನೋವು-ನಲಿವುಗಳಿಗೆ ವೇದಿಕೆಯಾಗುವ ಕ್ರಿಕೆಟ್‌ ಜಗತ್ತಿನ ಮಹಾಸಮರಗಳಲ್ಲಿ ಒಂದೆನಿಸಿರುವ ಐಸಿಸಿ ಪುರುಷರ (ಏಕದಿನ) ವಿಶ್ವಕಪ್‌ ಕ್ರಿಕೆಟ್‌ ಟೂರ್ನಿಯ 12ನೇ ಆವೃತ್ತಿಯ ಆರಂಭಕ್ಕೆ ಈಗಾಗಲೇ ದಿನಗಣನೆ ಆರಂಭವಾಗಿದೆ. 1975ರಲ್ಲಿ ಆರಂಭವಾದ ಮಹಾಸಮರಕ್ಕೆ ಕ್ರಿಕೆಟ್‌ ಜನಕರಾದ ಇಂಗ್ಲೆಂಡ್‌ ಐದನೇ ಬಾರಿಗೆ ಆತಿಥ್ಯ ವಹಿಸುತ್ತಿದೆ. ಟೂರ್ನಿಯ ಆರಂಭಕ್ಕೆ 12 ದಿನಗಳಷ್ಟೇ ಬಾಕಿ. ಈ ನಿಟ್ಟಿನಲ್ಲಿ ಇದುವರೆಗಿನ 11 ವಿಶ್ವಕಪ್‌ಗಳಲ್ಲಿ ವಿವಿಧ ತಂಡಗಳ ಸಾಧನೆ, ಆಟಗಾರರ ವೈಯಕ್ತಿಕ ದಾಖಲೆ ಸೇರಿ ಹತ್ತು ಹಲವು ರೋಚಕ ಸಂಗತಿಗಳನ್ನು ಹಿನ್ನೋಟದ ಮೂಲಕ ಪರಿಚಯಿಸಲಾಗುತ್ತಿದೆ.

ಮೊದಲ ಕಿರೀಟ ಚುಂಬಿಸಿದ ವೆಸ್ಟ್‌ ಇಂಡೀಸ್‌
ಕ್ರೀಡಾ ಜಗತ್ತಿನ ಅತಿದೊಡ್ಡ ಸ್ಪರ್ಧೆ ಎನಿಸಿಕೊಂಡಿರುವ ಫಿಫಾ ವಿಶ್ವಕಪ್‌ಗೆ ಪರ್ಯಾಯ ಎಂಬಂತೆ ಮೊದಲ ಬಾರಿ ಕ್ರಿಕೆಟ್‌ ಆಡುವ ಕೆಲವೇ ರಾಷ್ಟ್ರಗಳು 1975ರ ಜೂನ್‌ 7-21ರ ಅವಧಿಯಲ್ಲಿ ವಿಶ್ವಕಪ್‌ ಆಯೋಜಿಸಲು ನಿರ್ಧರಿಸಿದವು. ಇದಕ್ಕೆ ಅಂತಾರಾಷ್ಟ್ರೀಯ ಕ್ರಿಕೆಟ್‌ ಸಮಿತಿ (ಐಸಿಸಿ) ವೇದಿಕೆ ಕಲ್ಪಿಸಿತು. ಜಗತ್ತಿಗೆ ಕ್ರಿಕೆಟ್‌ ಪರಿಚಯಿಸಿದ ಇಂಗ್ಲೆಂಡ್‌ ಮೊದಲ ವಿಶ್ವಕಪ್‌ ಆತಿಥ್ಯಕ್ಕೆ ಅಣಿಯಾಯಿತು. ರೌಂಡ್‌ರಾಬಿನ್‌ ಮತ್ತು ನಾಕೌಟ್‌ ಮಾದರಿಯಲ್ಲಿ ನಡೆದ ಟೂರ್ನಿಯಲ್ಲಿ ಇಂಗ್ಲೆಂಡ್‌, ಭಾರತ, ಆಸ್ಪ್ರೇಲಿಯಾ, ಪಾಕಿಸ್ತಾನ, ವೆಸ್ಟ್‌ ಇಂಡೀಸ್‌ ಮತ್ತು ನ್ಯೂಜಿಲೆಂಡ್‌ ತಂಡಗಳಲ್ಲದೆ, ಶ್ರೀಲಂಕಾ ಮತ್ತು ಪೂರ್ವ ಆಫ್ರಿಕಾ ಆಹ್ವಾನಿತ ತಂಡಗಳಾಗಿ ಪಾಲ್ಗೊಂಡವು.

ಇಂಗ್ಲೆಂಡ್‌, ನ್ಯೂಜಿಲೆಂಡ್‌ ಮತ್ತು ಪೂರ್ವ ಆಫ್ರಿಕಾ ತಂಡಗಳೊಂದಿಗೆ 'ಎ' ಗುಂಪಿನಲ್ಲಿ ಸ್ಥಾನ ಪಡೆದಿದ್ದ ಭಾರತ ತಂಡ ಆಡಿದ ಮೂರು ಪಂದ್ಯಗಳ ಪೈಕಿ ಕೇವಲ ಒಂದರಲ್ಲಿ ಮಾತ್ರ ಗೆಲ್ಲಲು ಶಕ್ತಗೊಂಡಿತು. ಗುಂಪಿನಲ್ಲಿ ಕ್ರಮವಾಗಿ 12 ಮತ್ತು 8 ಅಂಕ ಕಲೆಹಾಕಿದ ಇಂಗ್ಲೆಂಡ್‌ ಮತ್ತು ನ್ಯೂಜಿಲೆಂಡ್‌ ಮುಂದಿನ ಹಂತಕ್ಕೆ ತೇರ್ಗಡೆ ಹೊಂದಿದವು.

ಲೀಡ್ಸ್‌ನಲ್ಲಿ ನಡೆದ ಮೊದಲ ಸೆಮಿಫೈನಲ್‌ನಲ್ಲಿ ಇಂಗ್ಲೆಂಡ್‌ ವಿರುದ್ಧ ಆಸ್ಪ್ರೇಲಿಯಾ ಗೆದ್ದರೆ, ಲಂಡನ್‌ನಲ್ಲಿ ನಡೆದ ಮತ್ತೊಂದು ಸೆಮಿಫೈನಲ್‌ನಲ್ಲಿ ನ್ಯೂಜಿಲೆಂಡ್‌ ವಿರುದ್ಧ ವೆಸ್ಟ್‌ ಇಂಡೀಸ್‌ ಗೆದ್ದು ಫೈನಲ್‌ ಪ್ರವೇಶಿಸಿತು. ಲಂಡನ್‌ನ ಲಾರ್ಡ್ಸ್ನಲ್ಲಿ ನಡೆದ ಪ್ರಶಸ್ತಿ ಸುತ್ತಿನ ಹಣಾಹಣಿಯಲ್ಲಿ ವೆಸ್ಟ್‌ ಇಂಡೀಸ್‌ 8 ವಿಕೆಟ್‌ ನಷ್ಟಕ್ಕೆ 291 ರನ್‌ ಕಲೆಹಾಕಿದರೆ, ಆಸ್ಪ್ರೇಲಿಯಾ 274 ರನ್‌ ಗಳಿಸಲಷ್ಟೇ ಶಕ್ತಗೊಂಡು ರನ್ನರ್‌ಅಪ್‌ ಆಯಿತು.

ಫೈನಲ್‌ ಪಂದ್ಯದಲ್ಲಿ ಕ್ಲೈವ್‌ ಲಾಯ್ಡ್‌ ಕೇವಲ 85 ಎಸೆತಗಳಲ್ಲಿ 12 ಬೌಂಡರಿ, 2 ಸಿಕ್ಸರ್‌ ಒಳಗೊಂಡ 102 ರನ್‌ ಗಳಿಸಿದರು. ಗೀತ್‌ ಬಾಯ್ಸ್‌ 12 ಓವರ್‌ಗಳಲ್ಲಿ 4 ನಾಲ್ಕು ವಿಕೆಟ್‌ ಕಬಳಿಸಿ ವೆಸ್ಟ್‌ ಇಂಡೀಸ್‌ ತಂಡದ ಗೆಲುವಿನಲ್ಲಿ ನಿರ್ಣಾಯಕ ಪಾತ್ರ ವಹಿಸಿದರು. ಆದರೆ ಆಸ್ಪ್ರೇಲಿಯಾದ ಗ್ಲೆನ್‌ ಟರ್ನರ್‌ (333) ಮತ್ತು ಗ್ಯಾರಿ ಗಿಲ್ಮೋರ್‌ (11) ಕ್ರಮವಾಗಿ ಅತ್ಯಧಿಕ ರನ್‌ ಮತ್ತು ಅತಿ ಹೆಚ್ಚು ವಿಕೆಟ್‌ ಪಡೆದ ಆಟಗಾರರೆನಿಸಿದರು.