ಧೋನಿ ಗ್ಲೌಸ್‌ಗೆ ಐಸಿಸಿ ನೀಡುವುದೇ ಗ್ರೀನ್ ಸಿಗ್ನಲ್?

ಲಂಡನ್‌: ಐಸಿಸಿ 2019 ಏಕದಿನ ವಿಶ್ವಕಪ್‌ನಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ನಡೆದ ಮೊದಲ ಪಂದ್ಯದಲ್ಲಿ ಟೀಮ್ ಇಂಡಿಯಾ ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ ಯೋಧರ ಬಲಿದಾನದ ಲಾಂಛನವನ್ನು ಹೊಂದಿರುವ ಗ್ಲೌಸ್ ಧರಿಸುವ ಮೂಲಕ ವಿವಾದಕ್ಕೊಳಗಾಗಿದ್ದಾರೆ. ಇದರೊಂದಿಗೆ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ ಹಾಗೂ ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿ ನಡುವೆ ಸಂಘರ್ಷ ಏರ್ಪಟ್ಟಿದೆ.

ಧೋನಿ ತಮ್ಮ ಆರ್ಮಿ ಲಾಂಛನ ತೆಗೆಯುವಂತೆ ಬಿಸಿಸಿಐಗೆ ಐಸಿಸಿ ವಿನಂತಿ ಮಾಡಿಕೊಂಡಿತ್ತು. ಆದರೆ ಧೋನಿ ಬೆಂಬಲಿಸಿರುವ ಬಿಸಿಸಿಐ ಧಾರ್ಮಿಕ ಅಥವಾ ವಾಣಿಜ್ಯಕ್ಕೆ ಯಾವುದೇ ಧಕ್ಕೆಯನ್ನುಂಟು ಮಾಡದ ಹಿನ್ನಲೆಯಲ್ಲಿ ಐಸಿಸಿ ಒಪ್ಪಿಗೆಗಾಗಿ ಔಪಚಾರಿಕ ಮನವಿಯನ್ನು ಮಾಡಿಕೊಂಡಿದೆ.

ಬಲ್ಲ ಮೂಲಗಳ ಧೋನಿಗೆ ಆರ್ಮಿ ಗ್ಲೌಸ್ ಧರಿಸಲು ಅನುಮತಿ ನೀಡುವ ಸಾಧ್ಯತೆ ಕ್ಷೀಣವೆನಿಸಿದೆ. ಐಸಿಸಿ ನಿಮಯದ ಪ್ರಕಾರ ವಿಕೆಟ್ ಕೀಪಿಂಗ್ ಗ್ಲೌಸ್‌ನಲ್ಲಿ ಏಕಮಾತ್ರ ಜಾಹೀರಾತು ಲೊಗೊವನ್ನು ಹೊಂದಿರಬಹುದು. ಧೋನಿ ಈಗಾಗಲೇ ಎಸ್‌ಜಿ ಲೆಗೊವನ್ನು ಹೊಂದಿದ್ದಾರೆ. ಹಾಗಾಗಿ ಯೋಧರ ಲಾಂಛನವು ಉಪಕರಣ ಪ್ರಾಯೋಜಕತ್ವ ನಿಯಮದ ಉಲ್ಲಂಘನೆಯಾಗಲಿದೆ.

ಪ್ರಸ್ತುತ ವಿವಾದವನ್ನು ಜೆಫ್ ಅಲ್ಲಾರ್ಡಿಸ್ ನೇತೃತ್ವದ ಐಸಿಸಿ ಕ್ರಿಕೆಟ್ ಕಾರ್ಯಾಚರಣೆ ತಂಡ ಹಾಗೂ ವಿಶ್ವಕಪ್ ಈವೆಂಟ್ ತಾಂತ್ರಿಕ ಸಮಿತಿಯು ಚರ್ಚೆ ನಡೆಸಲಿದೆ. ಇಲ್ಲಿ ಧೋನಿ ಗ್ಲೌಸ್ ಮಿಲಿಟರಿ ಸಂಕೇತವಲ್ಲ ಎಂಬುದನ್ನು ಬಿಸಿಸಿಐ ಸಾಬೀತು ಮಾಡಬೇಕಿದೆ. ಹಾಗೊಂದು ವೇಳೆ ತಾಂತ್ರಿಕ ಸಮಿತಿಯು ಮನವೊಳಿಸುವಲ್ಲಿ ಯಶಸ್ವಿಯಾದ್ದಲ್ಲಿ ಧೋನಿ ಗ್ಲೌಸ್ ಧರಿಸಲಿದ್ದಾರೆ.

ಧೋನಿ ವಿಶೇಷ ಅರೆಸೇನಾ ಪಡೆಯ ಬಲಿದಾನ ಲಾಂಛನ ಧರಿಸಿರುವುದು ಇಲ್ಲಿ ಗಮನಾರ್ಹವೆನಿಸುತ್ತದೆ. ಹಾಗಾಗಿ ಇದು ಮಿಲಿಟರಿಗೆ ಸಂಬಂಧಪಟ್ಟಿದ್ದಲ್ಲ ಎಂಬುದನ್ನು ಬಿಸಿಸಿಐ ಸಾಬೀತು ಮಾಡಬೇಕಿದೆ.