ಅಭ್ಯಾಸ ಪಂದ್ಯದಲ್ಲೇ ಕೊಹ್ಲಿ, ರೋಹಿತ್, ಧವನ್ ವೈಫಲ್ಯ

ಲಂಡನ್: ಮುಂಬರುವ ಏಕದಿನ ವಿಶ್ವಕಪ್‌ನಲ್ಲಿ ಭಾರತದ ಗೆಲುವಿನ ಸಾಧ್ಯತೆಯಲ್ಲಿ ಅಗ್ರ ಕ್ರಮಾಂಕದ ಮೂವರು ಬ್ಯಾಟ್ಸ್‌ಮನ್‌ಗಳಾದ ನಾಯಕ ವಿರಾಟ್ ಕೊಹ್ಲಿ, ಉಪನಾಯಕ ರೋಹಿತ್ ಶರ್ಮಾ ಹಾಗೂ ಅನುಭವಿ ಶಿಖರ್ ಧವನ್‌ರನ್ನು ಅತಿ ಹೆಚ್ಚು ನೆಚ್ಚಿಕೊಂಡಿದೆ ಎಂಬುದರ ಬಗ್ಗೆ ಅಂಕಿಅಂಶಗಳು ಹೊರಬಂದಿದ್ದವು.

2015ರ ಏಕದಿನ ವಿಶ್ವಕಪ್ ಬಳಿಕ ಕಳೆದ ನಾಲ್ಕು ವರ್ಷಗಳಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಈ ತ್ರಿಮೂರ್ತಿಗಳು ಪಾರುಪತ್ಯವನ್ನು ಮೆರೆದಿದ್ದವು. ಅಲ್ಲದೆ ಅಗ್ರ ಕ್ರಮಾಂಕದಲ್ಲಿ ಈ ಮೂವರು ಆಟಗಾರರು ರನ್ ಗಳಿಸಿದಾಗ ಭಾರತದ ಗೆಲುವು ಸುನಿಶ್ಚಿತವೆನಿಸಿದ್ದವು.

ಏತನ್ಮಧ್ಯೆ ಬಹುನಿರೀಕ್ಷಿತ 2019 ವಿಶ್ವಕಪ್‌ಗೂ ಮುನ್ನ ಶನಿವಾರ ನ್ಯೂಜಿಲೆಂಡ್ ವಿರುದ್ಧ ನಡೆಯುತ್ತಿರುವ ಅಭ್ಯಾಸ ಪಂದ್ಯದಲ್ಲಿ ಭಾರತದ ಅಗ್ರ ಕ್ರಮಾಂಕದ ಬ್ಯಾಟ್ಸ್‌ಮನ್‌ಗಳು ವೈಫಲ್ಯವನ್ನು ಅನುಭವಿಸಿದ್ದಾರೆ.

ಆರಂಭಿಕರಾದ ರೋಹಿತ್ ಹಾಗೂ ಧವನ್ ತಲಾ ಎರಡು ರನ್ ಗಳಿಸಿದ ಕಿವೀಸ್ ವೇಗಿ ಟ್ರೆಂಟ್ ಬೌಲ್ಟ್‌ಗೆ ವಿಕೆಟ್ ಒಪ್ಪಿಸಿದರೆ ಕಾಲಿನ್ ಡಿ ಗ್ರ್ಯಾಂಡ್‌ಹೋಮ್ ದಾಳಿಯಲ್ಲಿ ನಾಯಕ ಕೊಹ್ಲಿ ಕ್ಲೀನ್ ಬೌಲ್ಡ್ ಆದರು. 24 ಎಸೆತಗಳನ್ನು ಎದುರಿಸಿದ ಕೊಹ್ಲಿ ಮೂರು ಬೌಂಡರಿಗಳಿಂದ 18 ರನ್ ಗಳಿಸಿದರು.

ಇದು ವಿಶ್ವಕಪ್‌ಗೂ ಮನ್ನ ಭಾರತಕ್ಕೆ ಲಭಿಸಿರುವ ಎಚ್ಚರಿಕೆಯ ಕರೆಗಂಟೆಯಾಗಿದೆ. ಅಲ್ಲದೆ ಮಧ್ಯಮ ಕ್ರಮಾಂಕಕ್ಕೆ ನೈಜ ಪರೀಕ್ಷೆ ಎದುರಾಗಿದೆ.