ಭಾರತ-ಪಾಕ್ ಪಂದ್ಯದಲ್ಲಿ ಮಗದೊಂದು ದಾಖಲೆ

ಹೊಸದಿಲ್ಲಿ: ಐಸಿಸಿ 2019 ಏಕದಿನ ವಿಶ್ವಕಪ್‌ನಲ್ಲಿ ಭಾನುವಾರ ಪಾಕಿಸ್ತಾನ ವಿರುದ್ಧ ನಡೆದ ಮಳೆ ಬಾಧಿತ ಪಂದ್ಯದಲ್ಲಿ ಟೀಮ್ ಇಂಡಿಯಾ ಡಕ್ವರ್ತ್ ಲೂವಿಸ್ ನಿಯಮದಡಿಯಲ್ಲಿ 89 ರನ್ ಅಂತರದ ಭರ್ಜರಿ ಗೆಲುವನ್ನು ದಾಖಲಿಸಿತ್ತು.

ಪ್ರಸ್ತುತ ಪಂದ್ಯದಲ್ಲಿ ಅನೇಕ ದಾಖಲೆಗಳು ದಾಖಲಾಗಿವೆ. ಸಾಮಾಜಿಕ ಜಾಲತಾಣಗಳಲ್ಲೂ ಇತ್ತಂಡಗಳ ಅಭಿಮಾನಿಗಳು ಭಾರಿ ಪೈಪೋಟಿಯಿಂದ ಟ್ವೀಟ್ ಮಾಡತೊಡಗಿದ್ದರು.

ಇದೀಗ ಭಾರತ-ಪಾಕಿಸ್ತಾನ ಪಂದ್ಯವು ಟ್ವಿಟರ್‌ನಲ್ಲಿ ಅತಿ ಹೆಚ್ಚು ಟ್ವೀಟ್ ಗಿಟ್ಟಿಸಿಕೊಂಡ ಏಕದಿನ ಕ್ರಿಕೆಟ್ ಪಂದ್ಯ ಎಂಬ ದಾಖಲೆಗೆ ಪಾತ್ರವಾಗಿದೆ.

ಟ್ವಿಟರ್ ಬಿಡುಗಡೆ ಮಾಡಿರುವ ಪ್ರಕಟಣೆಯಲ್ಲಿ ಈ ಬಗ್ಗೆ ಮಾಹಿತಿ ಕೊಡಲಾಗಿದ್ದು, ಭಾರತ-ಪಾಕ್ ಪಂದ್ಯಕ್ಕಾಗಿ ಒಟ್ಟು 2.9 ದಶಲಕ್ಷ ಟ್ವೀಟ್‌ಗಳು ದಾಖಲಾಗಿದ್ದವು.

#TeamIndia #WeHaveWeWill ಮುಂತಾದ ಹ್ಯಾ‌ಶ್‌ಟ್ಯಾಗ್‌ಗಳ ಮೂಲಕ ಅಭಿಮಾನಿಗಳು ತಮ್ಮ ಅಭಿಮತಗಳನ್ನು ಹಂಚಿಕೊಂಡಿದ್ದರು. ಅಷ್ಟೇ ಯಾಕೆ ಪಾಕ್‌ಗೆ ಹೋಲಿಸಿದರೆ ಭಾರತೀಯರೇ ಟ್ವಿಟರ್‌ನಲ್ಲಿ ಪ್ರಾಬಲ್ಯ ಸಾಧಿಸಿದ್ದರು.

#INDvPAK ಪಂದ್ಯದಲ್ಲಿ ನಾಯಕ ವಿರಾಟ್ ಕೊಹ್ಲಿ 11000 ರನ್ ಮೈಲುಗಲ್ಲು ತಲುಪಿರುವುದು ನಿರ್ದಿಷ್ಟ ಆಟಗಾರನ ಬಗ್ಗೆ ಅತಿ ಹೆಚ್ಚು ಟ್ವೀಟ್ ಪಡೆದಿತ್ತು. ಹಾಗೆಯೇ ಶತಕವೀರ ರೋಹಿತ್ ಶರ್ಮಾ ಪಟ್ಟಿಯಲ್ಲಿ ದ್ವಿತೀಯ ಸ್ಥಾನದಲ್ಲಿದ್ದಾರೆ. ತದಾ ಬಳಿಕ ಸರ್ಫರಾಜ್ ಅಹ್ಮದ್, ಶೋಯಿಬ್ ಮಲಿಕ್ ಹಾಗೂ ಎಂಎಸ್ ಧೋನಿ ಹಿಂಬಾಲಿಸಿದ್ದಾರೆ.