ಪಾಕ್ ವಿರುದ್ಧ ದೊಡ್ಡ ಎಡವಟ್ಟು ಮಾಡಿದ ಧೋನಿ!

ಮ್ಯಾಂಚೆಸ್ಟರ್: ಐಸಿಸಿ 2019 ಏಕದಿನ ವಿಶ್ವಕಪ್‌ನಲ್ಲಿ ಬದ್ದ ವೈರಿ ಪಾಕಿಸ್ತಾನ ವಿರುದ್ಧದ ಪಂದ್ಯದಲ್ಲಿ ಭಾರತದ ಮಾಜಿ ನಾಯಕ ಹಾಗೂ ಹಿರಿಯ ಅನುಭವಿ ವಿಕೆಟ್ ಕೀಪರ್ ಮಹೇಂದ್ರ ಸಿಂಗ್ ಧೋನಿ ದೊಡ್ಡ ಎಡವಟ್ಟು ಮಾಡುವ ಮೂಲಕ ಹಿನ್ನಡೆಗೊಳಗಾಗಿದ್ದಾರೆ.

ಡಿಶಿಷನ್ ರಿವ್ಯೂ ಸಿಸ್ಟಂ ಅಂದರೆ ಧೋನಿ ರಿವ್ಯೂ ಸಿಸ್ಟಂ ಎಂದೇ ಅಭಿಮಾನಿಗಳು ಕೊಂಡಾಡುತ್ತಾರೆ. ಯಾಕೆಂದರೆ ಡಿಆರ್‌ಎಸ್ ಮನವಿ ಮಾಡಕೊಂಡ ಸಂದರ್ಭದಲ್ಲಿ ಅದು ಶೇಕಡಾ 99ರಷ್ಟು ಸಂದರ್ಭದಲ್ಲಿ ಔಟ್ ಆಗಿರುತ್ತದೆ.

ಆದರೆ ಪಾಕಿಸ್ತಾನ ವಿರುದ್ಧ ಹೈವೋಲ್ಟೇಜ್ ಪಂದ್ಯದಲ್ಲಿ ಧೋನಿ ರಿವ್ಯೂ ಸಿಸ್ಟಂ ವರ್ಕೌಟ್ ಆಗಲಿಲ್ಲ. ಪರಿಣಾಮ ಮಹತ್ವದ ವಿಕೆಟ್ ಪಡೆಯುವಲ್ಲಿ ವಿಫಲವಾದರು.

ಪಾಕಿಸ್ತಾನ ಇನ್ನಿಂಗ್ಸ್‌ನ 19ನೇ ಓವರ್‌ನ ಐದನೇ ಎಸೆತದಲ್ಲಿ ಘಟನೆ ನಡೆದಿತ್ತು. ಯುಜ್ವೇಂದ್ರ ಚಹಲ್ ಎಸೆದ ಚೆಂಡು ಬಾಬರ್ ಅಜಾಮ್ ಪ್ಯಾಡ್‌ಗೆ ಬಡಿದು ಬ್ಯಾಟ್‌ಗೆ ತಗುಲಿತ್ತು. ಆದರೆ ಅಂಪೈರ್ ಮನವಿಯನ್ನು ಪುರಸ್ಕರಿಸಲಲ್ಲ.

ನಾಯಕ ವಿರಾಟ್ ಕೊಹ್ಲಿ ಹಾಗೂ ಚಹಲ್ ಡಿಆರ್‌ಎಸ್ ಮನವಿ ಮಾಡಲು ಅತ್ಯಂತ ಉತ್ಸುಕರಾಗಿದ್ದರು. ಈ ಸಂದರ್ಭದಲ್ಲಿ ಮಧ್ಯೆ ಪ್ರವೇಶಿಸಿದ ಧೋನಿ ಮನವಿ ಮಾಡದಂತೆ ಸಲಹೆ ಮಾಡಿದರು. ಪರಿಣಾಮ ವಿಕೆಟ್ ಪಡೆಯುವ ಅವಕಾಶದಿಂದ ವಂಚಿತವಾಯಿತು.

ಇಲ್ಲಿ ಧೋನಿ ನಿರ್ಧಾರಕ್ಕೆ ಕೊಹ್ಲಿ ಮನ್ನಣೆ ನೀಡಿರುವುದು ಹೆಚ್ಚಿನ ಗಮನ ಸೆಳೆದಿತ್ತು. ಅಲ್ಲದೆ ತರಾತುರಿಗೆ ಒಳಗಾಗಿ ಡಿಆರ್‌ಎಸ್ ಮನವಿ ನಷ್ಟ ಮಾಡಬಾರದೆಂಬ ಧೋನಿ ಅಂಶವು ಗಮನಾರ್ಹವೆನಿಸುತ್ತದೆ.