ಔಟ್-ನಾಟೌಟ್-ಔಟ್; ಅಂಪೈರ್ ಮೇಲೆ ಕುಪಿತರಾದ ಜೇಸನ್

ಬರ್ಮಿಂಗ್‌ಹ್ಯಾಮ್: ಐಸಿಸಿ ಏಕದಿನ ವಿಶ್ವಕಪ್‌ನಲ್ಲಿ ಸಾಂಪ್ರಾದಾಯಿಕ ಬದ್ಧ ವೈರಿ ಆಸ್ಟ್ರೇಲಿಯಾ ವಿರುದ್ಧ ಅಮೋಘ ಇನ್ನಿಂಗ್ಸ್ ಕಟ್ಟಿರುವ ಇಂಗ್ಲೆಂಡ್‌ನ ಬಲಗೈ ಆಕ್ರಮಣಕಾರಿ ಬ್ಯಾಟ್ಸ್‌ಮನ್ ಜೇಸನ್ ರಾಯ್ ಇನ್ನೇನು ಸ್ಮರಣೀಯ ಶತಕದತ್ತ ದಾಪುಗಾಲನ್ನಿಟ್ಟಿದ್ದರು.

ಈ ಸಂದರ್ಭದಲ್ಲಿ ಅಂಪೈರ್ ಕೆಟ್ಟ ತೀರ್ಪಿನಿಂದಾಗಿ ವಿಕೆಟ್ ಒಪ್ಪಿಸಬೇಕಾಯಿತು. ಇದು ತಾಳಲಾರದ ರಾಯ್, ಅಂಪೈರ್ ಮೇಲೆ ಕುಪಿತಗೊಂಡು ವಾಗ್ವಾದಕ್ಕಿಳಿದ ಘಟನೆ ನಡೆದಿದೆ.

224 ರನ್ ಗುರಿ ಬೆನ್ನಟ್ಟಿದ ಇಂಗ್ಲೆಂಡ್‌ಗೆ ಜೇಸನ್ ರಾಯ್ ಬಿರುಸಿನ ಆರಂಭವೊದಗಿಸಿದ್ದರು. ಅಲ್ಲದೆ ಜಾನಿ ಬೈರ್‌ಸ್ಟೋವ್ ಜತೆಗೆ ೆಮೂದಲ ವಿಕೆಟ್‌ಗೆ 124 ರನ್‌ಗಳ ಜತೆಯಾಟದಲ್ಲಿ ಭಾಗಿಯಾಗಿದ್ದರು.

ಈ ಸಂದರ್ಭದಲ್ಲಿ ಪ್ಯಾಟ್ ಕಮಿನ್ಸ್ ಬೌನ್ಸರ್ ದಾಳಿಯು ನೇರವಾಗಿ ವಿಕೆಟ್ ಕೀಪರ್ ಅಲೆಕ್ಯ್ ಕ್ಯಾರಿ ಕೈಗಳನ್ನು ಸೇರಿತ್ತು. ಈ ಸಂದರ್ಭದಲ್ಲಿ ಆಸೀಸ್ ಆಟಗಾರರು ಬಲವಾದ ಮನವಿ ಮಾಡಿದರು. ಮೊದಲು ಔಟ್ ನೀಡಲು ಮುಂದಾಗದ ಅಂಪೈರ್ ಕುಮಾರ ಧರ್ಮಸೇನಾ ಬಳಿಕ ಔಟ್ ನೀಡುವ ಮೂಲಕ ವಿವಾದಕ್ಕೊಳಗಾಗಿದ್ದಾರೆ.

ಇಂಗ್ಲೆಂಡ್ ಬಳಿ ಡಿಆರ್‌ಎಸ್ ಆಯ್ಕೆಯು ಇಲ್ಲವಾಗಿದ್ದರಿಂದ ರಾಯ್ ಕ್ರೀಸ್ ತೊರೆಯುವುದು ಅನಿವಾರ್ಯವೆನಿಸಿತು. ಬಳಿಕ ರಿಪ್ಲೇನಲ್ಲಿ ಪರಿಶೀಲಿಸಿದಾಗಲೂ ಚೆಂಡು ಬ್ಯಾಟ್ ತಗುಲಿರಲಿಲ್ಲ. ಇದರಿಂದಾಗಿ ಅಂಪೈರ್ ಮೇಲೆ ಸಿಟ್ಟಿಗೆದ್ದಿದ್ದರು.

ಪ್ರಸ್ತುತ ಘಟನೆಯನ್ನು ಪರಿಶೀಲಿಸಲಿರುವ ಮ್ಯಾಚ್ ರೆಫರಿ ಜೇಸನ್ ರಾಯ್ ಮೇಲೆ ದಂಡ ವಿಧಿಸುವ ಸಾಧ್ಯತೆಯಿದೆ. ಅಂತಿಮವಾಗಿ 65 ಎಸೆತಗಳನ್ನು ಎದುರಿಸಿದ ರಾಯ್ ಒಂಬತ್ತು ಬೌಂಡರಿ ಹಾಗೂ ಐದು ಸಿಕ್ಸರ್‌ಗಳ ನೆರವಿನಿಂದ 85 ರನ್ ಗಳಿಸಿದರು.