ವಿಶ್ವಕಪ್ ಕೈ ಜಾರಿದರೂ ಮಂದಹಾಸ ಬೀರಿದ ವಿಲಿಯಮ್ಸನ್ ನೈಜ ಚಾಂಪಿಯನ್!

ಲಂಡನ್: ಕಣ್ಮುಂದೆಯೇ ವಿಶ್ವಕಪ್ ಕೈ ಜಾರಿ ಹೋದರೂ ತಮ್ಮ ಭಾವನೆಗಳನ್ನೆಲ್ಲ ತಡೆದುಕೊಂಡಿರುವ ನ್ಯೂಜಿಲೆಂಡ್ ನಾಯಕ ಕೇನ್ ವಿಲಿಯಮ್ಸನ್ ಆಧುನಿಕ ಕ್ರಿಕೆಟ್‌ನ ನೈಜ ಚಾಂಪಿಯನ್ ಎನಿಸಿಕೊಂಡಿದ್ದಾರೆ.

ಎಂಟು ವರ್ಷಗಳ ಹಿಂದೆ ಭಾರತ ವಿಶ್ವಕಪ್ ಗೆದ್ದಾಗ ಶ್ರೀಲಂಕಾ ಮಾಜಿ ನಾಯಕ ಕುಮಾರ ಸಂಗಕ್ಕರ ಮಂದಹಾಸ ಬೀರುತ್ತಿದ್ದರು. ಇದಕ್ಕೆ ಸಮಾನವಾಗಿ ವಿಲಿಯಮ್ಸನ್ ಅತಿ ಒತ್ತಡದ ಪರಿಸ್ಥಿತಿಯನ್ನು ನಿಭಾಯಿಸುವ ಮೂಲಕ ಕ್ರೀಡಾಭಿಮಾನಿಗಳ ಹೃದಯ ಗೆದ್ದಿದ್ದಾರೆ.

ವಿಶ್ವ ಕ್ರಿಕೆಟ್ ಇತಿಹಾಸದಲ್ಲೇ ಅತ್ಯಂತ ಶ್ರೇಷ್ಠ ಹಾಗೂ ರೋಚಕ ಪಂದವನ್ನಾಗಿ ಇಂಗ್ಲೆಂಡ್ ಹಾಗೂ ನ್ಯೂಜಿಲೆಂಡ್ ನಡುವಣ 2019 ಏಕದಿನ ವಿಶ್ವಕಪ್ ಫೈನಲ್ ಪಂದ್ಯವನ್ನು ಪರಿಗಣಿಸಲಾಗಿದೆ. ಎರಡೆರಡು ಬಾರಿಗೆ ಟೈ ಫಲಿತಾಂಶ ಕಂಡ ಪಂದ್ಯದಲ್ಲಿ ಹೆಚ್ಚು ಬೌಂಡರಿ ಗಳಿಸಿದ (ಬೌಂಡರಿ ಹಾಗೂ ಸಿಕ್ಸರ್) ಆಧಾರದಲ್ಲಿ ಇಂಗ್ಲೆಂಡ್ ಪ್ರಶಸ್ತಿಗೆ ಮುತ್ತಿಕ್ಕಿತ್ತು.

ಅಂತಿಮ ಓವರ್‌ನಲ್ಲಿ ಬೆನ್ ಸ್ಟೋಕ್ಸ್ ಬ್ಯಾಟ್‌ಗೆ ತಗುಲಿ ಚೆಂಡು ಬೌಂಡರಿ ಸೇರಿದಾಗಲೂ ಕಿವೀಸ್ ನಾಯಕ ಕೇನ್ ವಿಲಿಯಮ್ಸನ್ ಯಾವುದೇ ವಾಗ್ವಾದಕ್ಕಿಳಿಯಲಿಲ್ಲ. ಈ ಮೂಲಕ ಐಸಿಸಿ ನಿಮಯಕ್ಕೆ ತಲೆಬಾಗಿದರು.

ಬಳಿಕ ಟೈ ಫಲಿತಾಂಶ ಕಂಡಾಗಲೂ ಇಂಗ್ಲೆಂಡ್ ವಿಜೇತರೆಂದು ಘೋಷಿಸಿದಾಗ ಸಭ್ಯತನೆಯನ್ನು ಮೆರೆಯುವ ಮೂಲಕ ಎದುರಾಳಿ ತಂಡವನ್ನು ಶ್ಲಾಘಿಸಿದರು. ಈ ಮೂಲಕ ಆಧುನಿಕ ಕ್ರಿಕೆಟ್‌ನ ನೈಜ ರಾಯಭಾರಿ ಎನಿಸಿಕೊಂಡಿದ್ದಾರೆ.

ಟೂರ್ನಿಯುದ್ಧಕ್ಕೂ ಸಭ್ಯತೆಯನ್ನು ಮೆರೆದಿರುವ ವಿಲಿಯಮ್ಸನ್ ಒಟ್ಟು 578 ರನ್ ಕಲೆ ಹಾಕುವ ಮೂಲಕ ಅರ್ಹವಾಗಿಯೇ ಸರಣಿಶ್ರೇಷ್ಠ ಪ್ರಶಸ್ತಿಗೂ ಭಾಜನವಾಗಿದ್ದರು.