ಧೋನಿ ಹೆಬ್ಬೆರಳಿಗೆ ಗಾಯ; ಲಂಕಾ ವಿರುದ್ಧ ಆಡುವರೇ?

ಲಂಡನ್: ಐಸಿಸಿ 2019 ಏಕದಿನ ವಿಶ್ವಕಪ್‌ನಲ್ಲಿ ಹೆಬ್ಬೆರಳಿಗೆ ಗಾಯ ಮಾಡಿಕೊಂಡಿರುವ ಮಹೇಂದ್ರ ಸಿಂಗ್ ಧೋನಿ ಶ್ರೀಲಂಕಾ ವಿರುದ್ಧದ ಪಂದ್ಯಕ್ಕೆ ಲಭ್ಯವಾಗುವರೇ ಎಂಬುದು ಬಹಳಷ್ಟು ಕುತೂಹಲಕ್ಕೆಡೆ ಮಾಡಿದೆ.

ಮಹತ್ವದ ಸೆಮಿಫೈನಲ್ ಹಾಗೂ ಫೈನಲ್ ಪಂದ್ಯಕ್ಕೂ ಮುಂಚಿತವಾಗಿ ಸಂಪೂರ್ಣ ಫಿಟ್ನೆಸ್ ಮರಳಿ ಪಡೆಯುವ ನಿಟ್ಟಿನಲ್ಲಿ 37ರ ಹರೆಯದ ಧೋನಿಗೆ ವಿಶ್ರಾಂತಿ ನೀಡಿದರೂ ಅಚ್ಚರಿಯೇನಿಲ್ಲ.

ಇಂಗ್ಲೆಂಡ್ ವಿರುದ್ಧದ ಧೋನಿ ಹೆಬ್ಬೆರಳಿಗೆ ಗಾಯ ಮಾಡಿಕೊಂಡಿದ್ದರು. ಇದರಿಂದಾಗಿ ಬಾಂಗ್ಲಾದೇಶ ವಿರುದ್ಧ ಸಹ ನೋವನ್ನು ಅನುಭವಿಸಿದ್ದರು.

ಇಂಗ್ಲೆಂಡ್ ವಿರುದ್ಧ ಧೋನಿ ಬದ್ಧತೆಯನ್ನು ಪ್ರದರ್ಶಿಸಿದ್ದರೂ ರಕ್ತ ಉಗುಳುವ ಚಿತ್ರಗಳು ವೈರಲ್ ಆದಂತೆ ಅಭಿಮಾನಿಗಳು ಮಹಿ ದೇಶಪ್ರೇಮವನ್ನು ಹಾಡಿ ಹೊಗಳಿದ್ದರು.

ಸದ್ಯ ಲಭ್ಯವಿರುವ ಮಾಹಿತಿಗಳ ಪ್ರಕಾರ ಹೆಬ್ಬೆರಳಿನ ಗಾಯವು ಚಿಂತೆಯ ವಿಷಯವಲ್ಲ. ಅಲ್ಲದೆ ಲಂಕಾ ವಿರುದ್ಧ ಆಯ್ಕೆಗೆ ಧೋನಿ ಲಭ್ಯವಾಗಲಿದ್ದಾರೆ.

ಅಂದ ಹಾಗೆ ಇದು ಧೋನಿ ಅವರ ಕೊನೆಯ ವಿಶ್ವಕಪ್ ಆಗಿದೆ. ಅಲ್ಲದೆ ವಿಶ್ವಕಪ್ ಬಳಿಕ ನಿವೃತ್ತಿ ನೀಡುವ ಸಾಧ್ಯತೆಯೂ ಇದೆ. 100ರಷ್ಟು ಫಿಟ್ನೆಸ್ ಮಟ್ಟ ಕಾಯ್ದುಕೊಳ್ಳುವುದು ಕಠಿಣ. ಕೆಲವೊಂದು ಬಾರಿ ನೋವನ್ನು ಸಹಿಸಿಕೊಂಡು ತಂಡಕ್ಕಾಗಿ ಆಡಬೇಕಾಗುತ್ತದೆ ಎಂಬ ಧೋನಿ ಹೇಳಿಕೆಯು ಗಮನಾರ್ಹವೆನಿಸುತ್ತದೆ.