ಕೌಲ್ಟರ್ ಕೌಂಟರ್ ಅಟ್ಯಾಕ್; ವಿಶಿಷ್ಟ ದಾಖಲೆ

ನಾಟಿಂಗ್‌ಹ್ಯಾಮ್: ಐಸಿಸಿ 2019 ಏಕದಿನ ವಿಶ್ವಕಪ್‌ನಲ್ಲಿ ವೆಸ್ಟ್‌ಇಂಡೀಸ್ ವಿರುದ್ಧ ನಡೆದ ಪಂದ್ಯದಲ್ಲಿ ಆಸ್ಟ್ರೇಲಿಯಾದ ಕೆಳ ಕ್ರಮಾಂಕದ ಬ್ಯಾಟ್ಸ್‌ಮನ್ ನಥನ್ ಕೌಲ್ಟರ್ ನೈಲ್ ಅಮೋಘ ಅರ್ಧಶತಕ ಸಾಧನೆ ಮಾಡಿದ್ದಾರೆ.

ಓರ್ವ ಬೌಲರ್ ಆಗಿರುವ ಹೊರತಾಗಿಯೂ ತಂಡಕ್ಕೆ ಅಗತ್ಯವೆನಿಸಿದಾಗ ಅತಿ ಒತ್ತಡದ ಪರಿಸ್ಥಿತಿಯಲ್ಲೂ ಸಮಯೋಚಿತ ಫಿಫ್ಟಿ ಬಾರಿಸುವ ಮೂಲಕ ಗಮನ ಸೆಳೆದಿದ್ದಾರೆ.

ಟಾಸ್ ಸೋತು ಬ್ಯಾಟಿಂಗ್‌ಗಿಳಿಸಲ್ಪಟ್ಟ ಆಸ್ಟ್ರೇಲಿಯಾ ಒಂದು ಹಂತದಲ್ಲಿ 16.1 ಓವರ್‌ಗಳಲ್ಲೇ 79 ರನ್ನಿಗೆ ಐದು ವಿಕೆಟ್ ಕಳೆದುಕೊಂಡು ಭಾರಿ ಸಂಕಷ್ಟಕ್ಕೆ ಸಿಲುಕಿತ್ತು. ಈ ಸಂದರ್ಭದಲ್ಲಿ ಅಲೆಕ್ಸ್ ಕ್ಯಾರಿ ಜತೆಗೆ ಸ್ಟೀವ್ ಸ್ಮಿತ್ ನಿರ್ಣಾಯಕ ಜತೆಯಾಟದಲ್ಲಿ ಭಾಗಿಯಾದರು.

ಬಳಿಕ ಕೌಲ್ಟರ್ ನೈಲ್ ಕ್ರೀಸಿಗಿಳಿಯುವಾಗ ಆಸೀಸ್ ಸ್ಕೋರ್ 30.4 ಓವರ್‌ಗಳಲ್ಲಿ 147/6. ಇಲ್ಲಿಂದ ಬಳಿಂಕ ಸ್ಮಿತ್ ಜತೆಗೂಡಿದ ಕೌಲ್ಟರ್ 102 ರನ್‌ಗಳ ಮಹತ್ವದ ಜತೆಯಾಟದಲ್ಲಿ ಭಾಗಿಯಾದರು. ಈ ಮೂಲಕ ಆಸೀಸ್ ತಂಡವನ್ನು 288 ರನ್‌ಗಳ ಬೃಹತ್ ಮೊತ್ತ ಪೇರಿಸುವಲ್ಲಿ ನೆರವಾದರು.

ಸ್ಮಿತ್ ಹಾಗೂ ಕೌಲ್ಟರ್ ನೈಲ್ ಸಮಯೋಚಿತ ಅರ್ಧಶತಕ ಬಾರಿಸಿದರು. ಈ ಪೈಕಿ ಕೊನೆಯ ಹಂತದಲ್ಲಿ ಬಿರುಸಿನ ಬ್ಯಾಟಿಂಗ್ ಪ್ರದರ್ಶಿಸಿದ ಕೌಲ್ಟರ್ ನೈಲ್ 60 ಎಸೆತಗಳಲ್ಲೇ ಎಂಟು ಬೌಂಡರಿ ಹಾಗೂ ನಾಲ್ಕು ಸಿಕ್ಸರ್‌ಗಳಿದ 92 ರನ್ ಗಳಿಸಿದರು.

ಇದು ಏಕದಿನದಲ್ಲಿ ಕೌಲ್ಟರ್ ಬ್ಯಾಟ್‌ನಿಂದ ಸಿಡಿದ ಚೊಚ್ಚಲ ಅರ್ಧಶತಕವಾಗಿದೆ. ಅಷ್ಟೇ ಯಾಕೆ ಏಕದಿನ ವಿಶ್ವಕಪ್‌ನಲ್ಲಿ ಎಂಟನೇ ಕ್ರಮಾಂಕದ ಬ್ಯಾಟ್ಸ್‌ಮನ್‌ನಿಂದ ದಾಖಲಾದ ವೈಯಕ್ತಿಕ ಗರಿಷ್ಠ ಮೊತ್ತವೂ ಕೂಡಾ ಹೌದು. ಇನ್ನು ಒಟ್ಟಾರೆಯಾಗಿ ಏಕದಿನದಲ್ಲಿ ಎಂಟನೇ ಕ್ರಮಾಂಕದ ಬ್ಯಾಟ್ಸ್‌ಮನ್‌ನಿಂದ ದಾಖಲಾದ ಎರಡನೇ ವೈಯಕ್ತಿಕ ಗರಿಷ್ಠ ಮೊತ್ತವಾಗಿದೆ.