ಆಂಗ್ಲರ ವಿರುದ್ಧ ಆರೆಂಜ್ ಜೆರ್ಸಿಯಲ್ಲಿ ಮಿನುಗಲಿರುವ ಟೀಮ್ ಇಂಡಿಯಾ

ಲಂಡನ್: ಐಸಿಸಿ 2019 ಏಕದಿನ ವಿಶ್ವಕಪ್‌ನಲ್ಲಿ ಆತಿಥೇಯ ಇಂಗ್ಲೆಂಡ್ ವಿರುದ್ಧದ ಪಂದ್ಯದಲ್ಲಿ ಟೀಮ್ ಇಂಡಿಯಾ ಆಟಗಾರರು ಸಾಂಪ್ರಾದಾಯಿಕ ನೀಲಿ ಜೆರ್ಸಿಗೆ ವಿರುದ್ಧವಾಗಿ ಕಿತ್ತಳೆ ಬಣ್ಣದಲ್ಲಿ ಮಿನುಗಲಿದ್ದಾರೆ.

ಈ ಹಿಂದಿನ ಮಾಹಿತಿಯಂತೆ ಶನಿವಾರದ ಅಫಘಾನಿಸ್ತಾನ ವಿರುದ್ದಧ ಪಂದ್ಯದಲ್ಲೇ ಆರೆಂಜ್ ಜೆರ್ಸಿಗಳನ್ನು ಧರಿಸುವ ನಿರೀಕ್ಷೆಯನ್ನಿಡಲಾಗಿತ್ತು. ಆದರೆ ತಾಜಾ ಮಾಹಿತಿಯಂತೆ ಇಂಗ್ಲೆಂಡ್ ವಿರುದ್ಧ ಆರೆಂಜ್ ಉಡುಪು ಧರಿಸುವ ಸಾಧ್ಯತೆಯಿದೆ.

ಐಸಿಸಿ ನೂತನ ನಿಯಮದಂತೆ ಎರಡು ತಂಡಗಳು ಸಮಾನ ಜೆರ್ಸಿ ಧರಿಸಿ ಕಣಕ್ಕಿಳಿಯುವಂತಿಲ್ಲ. ಹಾಗೆಯೇ ಫುಟ್ಬಾಲ್ ಕ್ರೀಡೆಯಲ್ಲಿರುವಂತೆಯೇ ಹೋಮ್ ಹಾಗೂ ಎವೇ ಜೆರ್ಸಿಗಳನ್ನು ಧರಿಸುವಂತೆ ಸೂಚಿಸಿದೆ.

ಹಾಗಾಗಿ ಆತಿಥೇಯ ಇಂಗ್ಲೆಂಡ್‌ಗೆ ಮಾತ್ರ ತಮ್ಮ ಬಣ್ಣವನ್ನು ಕಾಯ್ದುಕೊಳ್ಳುವ ಅವಕಾಶವಿರುತ್ತದೆ. ಹಾಗಾಗಿ ಭಾರತ ತಂಡವು ಕಿತ್ತಳೆ ಜೆರ್ಸಿಯನ್ನು ಧರಿಸಬೇಕಾಗುತ್ತದೆ.

ಅಷ್ಟಕ್ಕೂ ಇದುವರೆಗೆ ಟೀಮ್ ಇಂಡಿಯಾ ಜೆರ್ಸಿ ವಿನ್ಯಾಸದ ಬಗ್ಗೆ ಯಾವುದೇ ಮಾಹಿತಿಗಳು ಹೊರಬಂದಿಲ್ಲ. ಇದನ್ನು ಬಿಸಿಸಿಐ ಗೌಪ್ಯವಾಗಿಟ್ಟುಕೊಂಡಿರುವುದು ರೋಚಕತೆಯನ್ನು ಹೆಚ್ಚಿಸಿದೆ.