ಟ್ರೇಡ್‌ಮಾರ್ಕ್ ಸೆಲ್ಯೂಟ್ ಶೈಲಿಯಲ್ಲಿ ಸಂಭ್ರಮಾಚರಿಸಿದ ಕಾಟ್ರೆಲ್

ನಾಟಿಂಗ್‌ಹ್ಯಾಮ್: ಐಸಿಸಿ 2019 ಏಕದಿನ ವಿಶ್ವಕಪ್‌ನಲ್ಲಿ ಟ್ರೇಡ್‌ಮಾರ್ಕ್ ಸೆಲ್ಯೂಟ್ ಶೈಲಿಯಲ್ಲಿ ಸಂಭ್ರಮಾಚರಿಸುವ ಮೂಲಕ ವೆಸ್ಟ್‌ಇಂಡೀಸ್‌ನ ಎಡಗೈ ವೇಗಿ ಶೆಲ್ಡನ್ ಕಾಟ್ರೆಲ್ ಗಮನ ಸೆಳೆದಿದ್ದಾರೆ.

ಏಕದಿನ ವಿಶ್ವಕಪ್‌ನಲ್ಲಿ ಪಾಕಿಸ್ತಾನ ವಿರುದ್ಧ ನಡೆದ ಮೊದಲ ಪಂದ್ಯದಲ್ಲಿ ಕಾಟ್ರೆಲ್, ಕೆರಿಬಿಯನ್ನರಿಗೆ ಮೊದಲ ಸಿಹಿಯನ್ನು ಒದಗಿಸಿದರು.

ಕಾಟ್ರೆಲ್ ದಾಳಿಯಲ್ಲಿ ಪಾಕ್‌ನ ಎಡಗೈ ಆರಂಭಿಕ ಇಮಾಮ್ ಉಲ್ ಹಾಕ್ ವಿಕೆಟ್ ಕೀಪರ್ ಶಾಯ್ ಹೋಪ್‌ಗೆ ಕ್ಯಾಚಿತ್ತು ನಿರ್ಗಮಿಸಿದರು. ಈ ಸಂದರ್ಭದಲ್ಲಿ ಕಾಟ್ರೆಲ್ ತಮ್ಮ ಎಂದಿನ ಶೈಲಿಯಲ್ಲಿ ಪರೇಡ್ ಮೂಲಕ ಸೆಲ್ಯೂಟ್ ಮಾಡಿ ಸಂಭ್ರಮಾಚರಿಸಿಕೊಂಡರು.

29ರ ಹರೆದಯ ವಿಂಡೀಸ್ ವೇಗಿ ಆಗಿರುವ ಕಾಟ್ರೆಲ್ ಇದುವರೆಗೆ 14 ಏಕದಿನ ಪಂದ್ಯಗಳನ್ನು ಆಡಿದ್ದಾರೆ. ಅಲ್ಲದೆ 18 ವಿಕೆಟುಗಳನ್ನು ಕಬಳಿಸಿದ್ದಾರೆ. 46 ರನ್ ತೆತ್ತು ಐದು ವಿಕೆಟ್ ಪಡೆದಿರುವುದು ಜೀವನಶ್ರೇಷ್ಠ ಬೌಲಿಂಗ್ ಸಾಧನೆಯಾಗಿದೆ.

ಇತ್ತೀಚೆಗಷ್ಟೇ ಇಂಗ್ಲೆಂಡ್ ವಿರುದ್ಧ ನಡೆದ ಸರಣಿಯಲ್ಲಿ ಕಾಟ್ರೆಲ್ ತಮ್ಮ ನಿಖರ ದಾಳಿಯ ಮೂಲಕ ಹೆಚ್ಚಿನ ಗಮನ ಸೆಳೆದಿದ್ದರು. ಅಲ್ಲಿಂದ ಬಳಿಕ ಟ್ರೇಡ್ ಮಾರ್ಕ್ ಸೆಲ್ಯೂಟ್ ಶೈಲಿಯ ಸಂಭ್ರಮಾಚರಣೆಯು ಹೆಚ್ಚಿನ ಗಮನ ಸೆಳೆದಿತ್ತು.