ಶಿಖರ್ ಮೇಲೆ ಒಂದು ವಾರದ ನಿಗಾ ವಹಿಸಲಿರುವ ಟೀಮ್ ಇಂಡಿಯಾ

ಲಂಡನ್: ಐಸಿಸಿ 2019 ಏಕದಿನ ವಿಶ್ವಕಪ್‌ನಲ್ಲಿ ಆಸ್ಟ್ರೇಲಿಯಾ ವಿರುದ್ಧದ ಪಂದ್ಯದ ವೇಳೆ ಗಾಯದ ಸಮಸ್ಯೆಗೊಳಗಾಗಿರುವ ಶಿಖರ್ ಧವನ್ ಮೇಲೆ ಒಂದು ವಾರದ ನಿಗಾ ವಹಿಸಲು ಟೀಮ್ ಇಂಡಿಯಾ ವ್ಯಪಸ್ಥಾಪಕ ಮಂಡಳಿ ನಿರ್ಧರಿಸಿದೆ.

ಆಸ್ಟ್ರೇಲಿಯಾ ವಿರುದ್ಧ ಪಂದ್ಯದ ವೇಳೆ ಪ್ಯಾಟ್ ಕಮಿನ್ಸ್ ದಾಳಿಯು ಧವನ್ ಎಡಗೈಯ ಹೆಬ್ಬರಳಿಗೆ ಬಡಿದಿತ್ತು. ನೋವಿನ ನಡುವೆಯೂ ಬ್ಯಾಟಿಂಗ್ ಮುಂದುವರಿಸಿದ ಧವನ್ ಅಮೋಘ ಶತಕದ ನೆರವಿನಿಂದ ಟೀಮ್ ಇಂಡಿಯಾಗೆ ಗೆಲುವು ಒದಗಿಸಿಕೊಡಲು ನೆರವಾಗಿದ್ದರು. ಈ ಮೂಲಕ ಅರ್ಹವಾಗಿಯೇ ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಭಾಜನವಾಗಿದ್ದರು.

ಧವನ್ ಹೆಬ್ಬರಳಿಗೆ ಗಾಯವಾಗಿದ್ದು, ಬಿಸಿಸಿಐ ವೈದ್ಯಕೀಯ ತಂಡವು ಒಂದು ವಾರದ ವರೆಗೆ ಸೂಕ್ಷ್ಮ ನಿಗಾ ವಹಿಸಲಿದೆ. ಹಾಗಾಗಿ ತಂಡದ ಜತೆಗೆ ಉಳಿದುಕೊಳ್ಳಲು ಸೂಚಿಸಲಾಗಿದೆ.

ಹಾಗೊಂದು ವೇಳೆ ಒಂದು ವಾರದೊಳಗೆ ಪೂರ್ಣವಾಗಿ ಗುಣಮುಖರಾಗದಿದ್ದಲ್ಲಿ ತವರಿಗೆ ಮರಳಲಿದ್ದಾರೆ. ತದಾ ಬಳಿಕವಷ್ಟೇ ಬದಲಿ ಆಟಗಾರ ಇಂಗ್ಲೆಂಡ್ ಪ್ರಯಾಣ ಬೆಳೆಸಲಿದ್ದಾರೆ. ಧವನ್ ಗುಣಮುಖರಾಗದಿದ್ದಲ್ಲಿ ರಿಷಬ್ ಪಂತ್ ಆಯ್ಕೆಯಾಗುವುದು ಖಚಿತವೆನಿಸಿದೆ.

ಸದ್ಯ ಒಂದು ವಾರದೊಳಗೆ ಧವನ್ ಸಂಪೂರ್ಣ ಗುಣಮುಖರಾಗುವ ಭರವಸೆಯನ್ನು ಟೀಮ್ ಇಂಡಿಯಾ ಹೊಂದಿದೆ. ಹಾಗಿದ್ದರೂ ನ್ಯೂಜಿಲೆಂಡ್ ಹಾಗೂ ಪಾಕಿಸ್ತಾನ ವಿರುದ್ದದ ಪಂದ್ಯಗಳಿಗೆ ಅಲಭ್ಯವಾಗಲಿದ್ದಾರೆ.