ಸೋಲಿನಲ್ಲೂ 20 ವರ್ಷಗಳ ಹಳೆಯ ದಾಖಲೆ ಸರಿಗಟ್ಟಿದ ದಿಮುತ್

ಕಾರ್ಡಿಫ್: ಐಸಿಸಿ 2019 ಏಕದಿನ ವಿಶ್ವಕಪ್‌ನಲ್ಲಿ ಶನಿವಾರ ನ್ಯೂಜಿಲೆಂಡ್ ವಿರುದ್ಧ ನಡೆದ ಪಂದ್ಯದಲ್ಲಿ ಶ್ರೀಲಂಕಾ 10 ವಿಕೆಟ್ ಅಂತರದ ಹೀನಾಯ ಸೋಲನ್ನು ಅನುಭವಿಸಿರಬಹುದು.

ಆದರೂ ಲಂಕಾ ಪಾಲಿಗೆ ಏಕಾಂಗಿ ಹೋರಾಟ ನೀಡಿರುವ ನಾಯಕ ದಿಮುತ್ ಕರುಣಾರತ್ನೆ 20 ವರ್ಷಗಳ ಹಿಂದಿನ ದಾಖಲೆಯನ್ನು ಸರಿಗಟ್ಟಿದ್ದಾರೆ.

ಟಾಸ್ ಸೋತು ಮೊದಲು ಬ್ಯಾಟಿಂಗ್‌ಗಿಳಿಸಲ್ಪಟ್ಟ ಶ್ರೀಲಂಕಾ 29.2 ಓವರ್‌ಗಳಲ್ಲಿ 136 ರನ್‌ಗಳಿಗೆ ಸರ್ವಪತನವನ್ನು ಕಂಡಿತ್ತು. ಲಂಕಾ ಪಾಲಿಗೆ ಏಕಾಂಗಿ ಹೋರಾಟ ನೀಡಿದ ನಾಯಕ ದಿಮುತ್ ಅಜೇಯ ಅರ್ಧಶತಕವನ್ನು ಬಾರಿಸಿದರು.

ಕೊನೆಯ ವರೆಗೂ ನಾಟೌಟ್ ಆದ ದಿಮುತ್ 84 ಎಸೆತಗಳಲ್ಲಿ ನಾಲ್ಕು ಬೌಂಡರಿಗಳ ನೆರವಿನಿಂದ 52 ರನ್ ಗಳಿಸಿ ಅಜೇಯರಾಗುಳಿದರು. ಈ ಮೂಲಕ 20 ವರ್ಷಗಳ ಹಿಂದಿನ ದಾಖಲೆಯನ್ನು ಸರಿಗಟ್ಟಿದ್ದಾರೆ.

ಏಕದಿನ ವಿಶ್ವಕಪ್‌ನಲ್ಲಿ ಓಪನರ್ ಆಗಿ ಕ್ರೀಸಿಗಿಳಿದು ಕೊನೆಯ ವರೆಗೂ ಅಜೇಯರಾಗುಳಿದ ಎರಡನೇ ಬ್ಯಾಟ್ಸ್‌ಮನ್ ಎಂಬ ದಾಖಲೆಗೆ ದಿಮುತ್ ಭಾಜನವಾಗಿದ್ದಾರೆ. 1999ರ ವಿಶ್ವಕಪ್‌ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ರೀಡ್ಲೆ ಜೇಕಬ್ಸ್ 49 ರನ್ ಅಜೇಯರಾಗುಳಿರುವುದು ಈ ಹಿಂದಿನ ದಾಖಲೆಯಾಗಿದೆ.

ಕ್ಯಾರಿ ದಿ ಬ್ಯಾಟ್...
ಆರಂಭಿಕನಾಗಿ ಕಣಕ್ಕಿಳಿದು ಇನ್ನಿಂಗ್ಸ್ ಮುಕ್ತಾಯದ ವರೆಗೆ ಅಜೇಯರಾಗುಳಿಯುವ ಮೂಲಕ 'ಕ್ಯಾರಿ ದಿ ಬ್ಯಾಟ್' ದಾಖಲೆಗೆ ದಿಮುತ್ ಕರುಣಾರತ್ನೆ ಭಾಜನವಾಗಿದ್ದಾರೆ.

ಒಟ್ಟಾರೆಯಾಗಿ ಏಕದಿನ ಕ್ರಿಕೆಟ್‌ನಲ್ಲಿ ಕ್ಯಾರಿ ದಿ ಬ್ಯಾಟ್ ದಾಖಲೆ ಬರೆದ 12ನೇ ಬ್ಯಾಟ್ಸ್‌ಮನ್ ಎಂಬ ಹಿರಿಮೆಗೆ ಪಾತ್ರವಾಗಿದ್ದಾರೆ.