ಸಚಿನ್ ದಾಖಲೆ ಮುರಿಯುವುದೇ ಕೊಹ್ಲಿ ಪಾಲಿಗೆ ಹವ್ಯಾಸ!

ಲಂಡನ್: ಭಾರತದ ಕ್ರಿಕೆಟ್ ದೇವರು ಸಚಿನ್ ತೆಂಡೂಲ್ಕರ್ ದಾಖಲೆಯನ್ನು ಒಂದೊಂದಾಗಿ ಮುರಿಯುತ್ತಲೇ ಸಾಗುತ್ತಿರುವ ಟೀಮ್ ಇಂಡಿಯಾ ಕಪ್ತಾನ ವಿರಾಟ್ ಕೊಹ್ಲಿ ಮಗದೊಂದು ಸ್ಮರಣೀಯ ದಾಖಲೆಯ ಸನಿಹದಲ್ಲಿದ್ದಾರೆ.

ಮಾಸ್ಟರ್ ಬ್ಲಾಸ್ಟರ್ ದಾಖಲೆ ಮುರಿಯುವುದನ್ನು ಹವ್ಯಾಸ ಮಾಡಿಕೊಂಡಿರುವ ವಿರಾಟ್, ಇದೀಗ 20000 ಅಂತಾರಾಷ್ಟ್ರೀಯ ರನ್‌ಗಳ ಸನಿಹದಲ್ಲಿದ್ದಾರೆ. 20 ಸಹಸ್ರ ರನ್ ಬರೆಯಲು ಕೊಹ್ಲಿಗಿನ್ನು ಕೇವಲ 104 ರನ್‌ಗಳ ಅವಶ್ಯಕತೆಯಿದೆ.

ಐಸಿಸಿ 2019 ಏಕದಿನ ವಿಶ್ವಕಪ್‌ನಲ್ಲಿ ಅಫಘಾನಿಸ್ತಾನ ವಿರುದ್ಧದ ಪಂದ್ಯದಲ್ಲೇ ಕೊಹ್ಲಿ ವಿಶ್ವದಾಖಲೆ ಬರೆಯುವ ಸಾಧ್ಯತೆಯಿದೆ.

ಈ ಮೂಲಕ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ 20000 ರನ್ ಗಳಿಸಿದ ವಿಶ್ವದ 12ನೇ ಹಾಗೂ ಭಾರತದ ಮೂರನೇ ಬ್ಯಾಟ್ಸ್‌ಮನ್ ಎಂಬ ಹಿರಿಮೆಗೆ ಪಾತ್ರವಾಗಲಿದ್ದಾರೆ. ಭಾರತೀಯರ ಪೈಕಿ ಸಚಿನ್ (34,357 ರನ್) ಹಾಗೂ ರಾಹುಲ್ ದ್ರಾವಿಡ್ (24208) ಮುಂದಿದ್ದಾರೆ.

ಪಾಕಿಸ್ತಾನ ವಿರುದ್ಧದ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಏಕದಿನದಲ್ಲಿ 11000 ರನ್ ಮೈಲುಗಲ್ಲು ತಲುಪಿದ್ದರು. ಈ ಮೂಲಕ ಸಚಿನ್ ದಾಖಲೆ ಅಳಿಸಿದ ಕೊಹ್ಲಿ ಏಕದಿನದಲ್ಲಿ ಅತಿ ವೇಗದಲ್ಲಿ 11 ಸಹಸ್ರ ರನ್ ಗಳಿಸಿದ ದಾಖಲೆಯನ್ನು ಬರೆದಿದ್ದರು. ಹಾಗೆಯೇ ಟೆಸ್ಟ್‌ನಲ್ಲಿ 6613 ಹಾಗೂ ಟ್ವೆಂಟಿ-20ನಲ್ಲಿ 2263 ರನ್ ಕಲೆ ಹಾಕಿದ್ದಾರೆ.

ಸಚಿನ್ ಹಾಗೂ ವೆಸ್ಟ್‌ಇಂಡೀಸ್‌ನ ಮಾಜಿ ದಿಗ್ಗಜ ಬ್ರ್ಯಾನ್ ಲಾರಾ ಅತಿ ವೇಗದಲ್ಲಿ (453 ಇನ್ನಿಂಗ್ಸ್) 20000 ರನ್ ಗಳಿಸಿದ ದಾಖಲೆಯನ್ನು ಜಂಟಿಯಾಗಿ ಹಂಚಿಕೊಂಡಿದ್ದಾರೆ. ಇನ್ನೊಂದೆಡೆ ಕೊಹ್ಲಿ ಇದುವರೆಗೆ 415 ಇನ್ನಿಂಗ್ಸ್ ಆಡಿದ್ದಾರೆ. ಇದರಲ್ಲಿ 131 ಟೆಸ್ಟ್, 222 ಏಕದಿನ ಹಾಗೂ 62 ಟ್ವೆಂಟಿ-20 ಇನ್ನಿಂಗ್ಸ್‌ಗಳು ಸೇರಿವೆ.