ಟೀಮ್ ಇಂಡಿಯಾ ಆಟಗಾರರ ಹೆಂಡ್ತಿಯರಿಗೆ ಮೊದಲ 21 ದಿನ ವಿಶ್ವಕಪ್‌ಗೆ ತೆರಳಲು ಅವಕಾಶವಿಲ್ಲವಂತೆ!

ಹೊಸದಿಲ್ಲಿ: ಬಹಳ ಹಿಂದಿನಿಂದಲೇ ಪ್ರಮುಖ ಟೂರ್ನಿಗಳನ್ನು ಆಡುವಾಗ ಕ್ರಿಕೆಟಿಗರ ಜತೆಗೆ ಪತ್ನಿಯರು ಜತೆಗಿರಬೇಕೇ ಎಂಬುದು ಬಹಳಷ್ಟು ಚರ್ಚೆಗೆ ಗ್ರಾಸವಾಗಿದೆ.

ಇದೀಗ ಬಂದಿರುವ ಕುತೂಹಲದಾಯಕ ಸಂಗತಿಯೆಂದರೆ ಮುಂಬರುವ ಐಸಿಸಿ 2019 ಏಕದಿನ ವಿಶ್ವಕಪ್‌ನಲ್ಲಿ ಭಾಗವಹಿಸುವ ಭಾರತೀಯ ಕ್ರಿಕೆಟಿಗರ ಪತ್ನಿ ಹಾಗೂ ಕುಟುಂಬ ಸದಸ್ಯರಿಗೆ ಮೊದಲ 21 ದಿನಗಳಷ್ಟು ಕಾಲ ಜತೆಗಿರಲು ಅವಕಾಶವಿರುವುದಿಲ್ಲವಂತೆ.

ಇದರಿಂದಾಗಿ ಸಾಂಪ್ರಾದಾಯಿಕ ಬದ್ಧ ವೈರಿ ಪಾಕಿಸ್ತಾನ ವಿರುದ್ಧ ನಡೆಯಲಿರುವ ಪಂದ್ಯವನ್ನು ವಿಶ್ವಕಪ್ ತಂಡದ ಕುಟುಂಬ ಸದಸ್ಯರು ಮಿಸ್ ಮಾಡಿಕೊಳ್ಳುವ ಸಂಭವವಿದೆ. ಭಾರತ ಹಾಗೂ ಪಾಕಿಸ್ತಾನ ನಡುವಣ ಪಂದ್ಯವು ಜೂನ್ 16ರಂದು ನಿಗದಿಯಾಗಿದೆ.

ಐಸಿಸಿ 2019 ವಿಶ್ವಕಪ್‌ಗೆ ಇಂಗ್ಲೆಂಡ್ ಹಾಗೂ ವೇಲ್ಸ್ ಆತಿಥ್ಯ ವಹಿಸುತ್ತಿದೆ. ಹಾಗೆಯೇ ಮೇ 29ರಂದು ಭರ್ಜರಿ ಚಾಲನೆ ಸಿಗಲಿದೆ. ಭಾರತ ತನ್ನ ಮೊದಲ ಪಂದ್ಯದಲ್ಲಿ ಜೂನ್ 5ರಂದು ದಕ್ಷಿಣ ಆಫ್ರಿಕಾ ವಿರುದ್ಧ ಆಡಲಿದೆ.

ಮತ್ತಷ್ಟು ಆಸಕ್ತಿದಾಯಕ ಸಂಗತಿಯೆಂದರೆ ವಿಶ್ವಕಪ್ ಆಟಗಾರರ ಪತ್ನಿಯರಿಗೆ ಕೇವಲ 15 ದಿನಗಳಷ್ಟು ಕಾಲ ಜತೆಗಿರಲು ಅವಕಾಶವಿರುತ್ತದೆ. ಹಾಗೊಂದು ವೇಳೆ ವಿರಾಟ್ ಕೊಹ್ಲಿ ಅನುಷ್ಕಾ ಶರ್ಮಾ ನಾಕೌಟ್ ಹಂತದ ಪಂದ್ಯಗಳನ್ನು ವೀಕ್ಷಿಸಲು ಬಯಸಿದ್ದಲ್ಲಿ ಇದಕ್ಕನುಗುಣವಾಗಿ ಪ್ರವಾಸವನ್ನು ಪ್ಲ್ಯಾನ್ ಮಾಡಬೇಕಿದೆ ಎಂಬುದು ಅಷ್ಟೇ ಗಮನಾರ್ಹವೆನಿಸುತ್ತದೆ.

ಅಷ್ಟಕ್ಕೂ ಈ ಎಲ್ಲದರ ಬಗ್ಗೆ ಅಧಿಕೃತ ವಿವರಗಳನ್ನು ಬಿಸಿಸಿಐ ಇನ್ನಷ್ಟೇ ಬಹಿರಂಗಪಡಿಸಬೇಕಿದೆ.