ಭಾರತದ ಹೊಸ ಜೆರ್ಸಿ ಬಗ್ಗೆ ಟ್ವೀಟ್ ವಾರ್

ಹೊಸದಿಲ್ಲಿ: ಐಸಿಸಿ 2019 ಏಕದಿನ ವಿಶ್ವಕಪ್‌ ಸಾಗುತ್ತಿರುವ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿಯು (ಬಿಸಿಸಿಐ) ಟೀಮ್ ಇಂಡಿಯಾದ ಅವೇ ಜೆರ್ಸಿಯನ್ನು ಅನಾವರಣಗೊಳಿಸಿದೆ. ಇದಕ್ಕೀಗ ಟ್ವಿಟರ್‌ನಲ್ಲಿ ಮಿಶ್ರ ಪ್ರತಿಕ್ರಿಯೆಗಳು ವ್ಯಕ್ತವಾಗುತ್ತಿದೆ.

ಜೂನ್ 30 ಭಾನುವಾರದಂದು ಆತಿಥೇಯ ಇಂಗ್ಲೆಂಡ್ ವಿರುದ್ಧ ನಡೆಯಲಿರುವ ಪಂದ್ಯದಲ್ಲಿ ಟೀಮ್ ಇಂಡಿಯಾ ಕೇಸರಿ ಬಣ್ಣದ ಜೆರ್ಸಿಯಲ್ಲಿ ಕಣಕ್ಕಿಳಿಯಲಿದೆ. ಇದರಂತೆ ಕಿತ್ತಳೆ ಹಾಗೂ ನೀಲಿ ಮಿಶ್ರಿತ ಹೊಸ ಜೆರ್ಸಿಯನ್ನು ಅನಾವರಣಗೊಳಿಸಲಾಗಿದೆ.

ಐಸಿಸಿ ನಿಯಮದ ಪ್ರಕಾರ ಎರಡು ತಂಡಗಳು ಒಂದೇ ಬಣ್ಣದ ಸಮವಸ್ತ್ರ ತೊಟ್ಟು ಮೈದಾನಕ್ಕಿಳಿಯುವಂತಿಲ್ಲ. ಫುಟ್ಬಾಲ್‌ನಲ್ಲಿ ಇರುವ 'ಹೋಮ್‌' ಮತ್ತು 'ಅವೇ' ನಿಯಮವನ್ನು ಕ್ರಿಕೆಟ್‌ಗೆ ಅಳವಡಿಸಲಾಗಿದೆ. ಹಾಗಾಗಿ ಆತಿಥೇಯ ಇಂಗ್ಲೆಂಡ್‌ ತಂಡಕ್ಕೆ ತನ್ನ ಎಂದಿನ ಜರ್ಸಿ ಧರಿಸಲು ಅವಕಾಶವಿದೆ. ಆದರೆ, ಭಾರತ ನೀಲಿ ಬಣ್ಣದ ಬದಲು ಕೇಸರಿ ಜರ್ಸಿ ಆಯ್ಕೆ ಮಾಡಿಕೊಂಡಿದೆ.

ಏತನ್ಮಧ್ಯೆ ಕೇಸರಿ-ನೀಲಿ ಮಿಶ್ರಿತ ಸಮವಸ್ತ್ರಕ್ಕೆ ಮಿಶ್ರ ಪ್ರತಿಕ್ರಿಯೆಗಳು ಸಾಮಾಜಿಕ ಜಾಲತಾಣದಲ್ಲಿ ವ್ಯಕ್ತವಾಗುತ್ತಿದೆ. ಪ್ರಧಾನಿ ನರೇಂದ್ರಿ ಮೋದಿ ಬೆಂಬಲಿಗರು ಹೊಸ ಜೆರ್ಸಿಯನ್ನು ಬೆಂಬಲಿಸಿದರೆ ವಿಪಕ್ಷ ಅಭಿಮಾನಿಗಳು ಕಟುವಾಗಿ ಟೀಕಿಸಿದ್ದಾರೆ.