ಶಾಕಿಂಗ್; ಆಸೀಸ್ ಆಟಗಾರನಿಂದ ಮತ್ತೆ ಬಾಲ್ ಟ್ಯಾಂಪರಿಂಗ್; ಸಿಕ್ಕಿಬಿದ್ದ ಜಾಂಪಾ?

ಲಂಡನ್: ಆಸ್ಟ್ರೇಲಿಯಾದ ಸ್ಟೀವ್ ಸ್ಮಿತ್ ಹಾಗೂ ಡೇವಿಡ್ ವಾರ್ನರ್ ಬಾಲ್ ಟ್ಯಾಂಪರಿಂಗ್ ಪ್ರಕರಣದಲ್ಲಿ ಸಿಕ್ಕಿಬಿದ್ದು ಒಂದು ವರ್ಷದ ನಿಷೇಧವನ್ನು ಶಿಕ್ಷೆಯನ್ನು ಎದುರಿಸಿರುವುದು ಇದೀಗ ಇತಿಹಾಸ.

ಹಳೆಯ ಪ್ರಕರಣ ಇನ್ನು ಹಚ್ಚ ಹಸಿರಾಗಿರುವಾಗಲೇ ಮಗದೋರ್ವ ಆಸೀಸ್ ಆಟಗಾರ ಬಾಲ್ ಟ್ಯಾಂಪರಿಂಗ್ ಮಾಡಿರುವುದರ ಬಗ್ಗೆ ಬಲವಾದ ಅನುಮಾನ ಮೂಡಿದೆ.

ಐಸಿಸಿ 2019 ಏಕದಿನ ವಿಶ್ವಕಪ್‌ನಲ್ಲಿ ಭಾರತ ವಿರುದ್ಧದ ಪಂದ್ಯದಲ್ಲಿ ಆಸ್ಟ್ರೇಲಿಯಾದ ಲೆಗ್ ಸ್ಪಿನ್ನರ್ ಆ್ಯಡಂ ಜಾಂಪಾ ಚೆಂಡನ್ನು ವಿರೂಪಗೊಳಿಸಲು ಪ್ರಯತ್ನಿಸದಿದ್ದಾರೆಂದು ಟ್ವಿಟರ್‌ನಲ್ಲಿ ಬಲವಾದ ಆರೋಪಗಳು ಕೇಳಿಬರುತ್ತಿದೆ.

ಈ ಸಂಬಂಧ ಸಾಲು ಸಾಲು ಟ್ವೀಟ್‌ಗಳು ಹರಿದಾಡುತ್ತಿದೆ. ಪದೇ ಪದೇ ತಮ್ಮ ಪಾಕೆಟ್‌ಗೆ ಕೈಯನ್ನು ಹಾಕುತ್ತಿದ್ದ ಜಾಂಪಾ ಕರವಸ್ತ್ರದಿಂದ ಬಾಲನ್ನು ಉಜ್ಜುವ ಪ್ರಯತ್ನ ಮಾಡುತ್ತಿದ್ದರು.

ಸ್ಮಿತ್ ಹಾಗೂ ವಾರ್ನರ್ ಪ್ರಕರಣಕ್ಕೆ ಇದು ಸಾಮತ್ಯೆಯನ್ನು ಪಡೆದಿರುವುದು ಗಮನಾರ್ಹವೆನಿಸುತ್ತದೆ. ಹಿಂದಿನ ಪ್ರಕರಣದಲ್ಲಿ ಪಾಕೆಟ್‌ನಲ್ಲಿದ್ದ ಸ್ಯಾಂಡ್ ಪೇಪರ್ ಬಳಸಿಕೊಂಡು ಚೆಂಡು ವಿರೂಪಗೊಳಿಸಲು ಪ್ರಯತ್ನಿಸಿದ್ದರು.

ಒಟ್ಟಾರೆಯಾಗಿ ವಿಶ್ವಕಪ್‌ನಂತಹ ಮಹತ್ತರ ಟೂರ್ನಿಯಲ್ಲಿ ಆಸೀಸ್ ಆಟಗಾರ ಮತ್ತೆ ಮೋಸದಾಟ ಮಾಡಲು ಪ್ರಯತ್ನಿಸಿದ್ದಾರೆಯೇ ಎಂಬುದು ತೀವ್ರ ಸಂಶಯಕ್ಕೆ ಎಡೆ ಮಾಡಿಕೊಟ್ಟಿದೆ. ಈ ವಿಷಯದಲ್ಲಿ ಐಸಿಸಿ ಇನ್ನಷ್ಟೇ ಪ್ರತಿಕ್ರಿಯಿಸಬೇಕಿದೆ.