87ರ ಹರೆಯದ ಸೂಪರ್ ಫ್ಯಾನ್ ಆಶೀರ್ವಾದ ಪಡೆದ ಕೊಹ್ಲಿ, ರೋಹಿತ್

ಹೊಸದಿಲ್ಲಿ: ಐಸಿಸಿ 2019 ಏಕದಿನ ವಿಶ್ವಕಪ್‌ನಲ್ಲಿ ಬಾಂಗ್ಲಾದೇಶ ವಿರುದ್ಧ ನಡೆದ ಪಂದ್ಯದಲ್ಲಿ ಟೀಮ್ ಇಂಡಿಯಾವನ್ನು ಬೆಂಬಲಿಸಲು ವಿಶೇಷ ಆತಿಥಿಯೊಬ್ಬರು ಆಗಮಿಸಿದ್ದರು.

87ರ ಅಜ್ಜಿ ಚಾರುಲತಾ ಪಟೇಲ್ ಭಾರತಕ್ಕಾಗಿ ಚಿಯರ್ ಹಾಡಲು ಬಂದಿದ್ದರು. ಅಲ್ಲದೆ ಕೆಲವೇ ಹೊತ್ತಿನಲ್ಲಿ ಭಾರಿ ಜನಪ್ರಿಯತೆಯನ್ನು ಸಾಧಿಸಿದ್ದರು.

ಭಾರತೀಯ ಕ್ರಿಕೆಟಿಗರು ಇದರಿಂದ ಹೊರತಾಗಿಲ್ಲ. ಪಂದ್ಯ ಗೆಲುವಿನ ಬಳಿಕ ಟೀಮ್ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ಹಾಗೂ ಉಪನಾಯಕ ರೋಹಿತ್ ಶರ್ಮಾ ಅಜ್ಜಿಯನ್ನು ಭೇಟಿಯಾಗುವ ಮೂಲಕ ಆಶೀರ್ವಾದವನ್ನು ಪಡೆದಿದ್ದಾರೆ.

ನಡೆದಾಡಲೂ ಸಾಧ್ಯವಾಗದಿದ್ದರೂ ವೀಲ್ ಚೇರ್‌ನಲ್ಲಿ ಆಗಮಿಸಿದ್ದ ಅಜ್ಜಿ, ಪೀಪಿ ಊದುತ್ತಾ ಭಾರತಕ್ಕೆ ಚಿಯರ್ ಹಾಡಿದ್ದರು. ಈ ಮೂಲಕ ಕ್ರೀಡಾಭಿಮಾನಿಗಳ ಹೃದಯ ಗೆದ್ದಿದ್ದರು.

ವಿಶೇಷವೆಂದರೆ 1975ರಲ್ಲಿ ಚೊಚ್ಚಲ ವಿಶ್ವಕಪ್ ಆಯೋಜನೆಯಾದಾಗ ಅಜ್ಜಿಯ ವಯಸ್ಸು 43. ಇದೀಗ 12ನೇ ಆವೃತ್ತಿಯ ವಿಶ್ವಕಪ್‌ನಲ್ಲಿ ಉತ್ಸಾಹ ಕಿಂಚಿತ್ತು ಕುಂದಿಲ್ಲ.

ಭಾರತೀಯ ಕ್ರಿಕೆಟ್ ತಂಡದ ಆಟಗಾರರೆಲ್ಲರೂ ತಮ್ಮ ಮಕ್ಕಳಿದ್ದಂತೆ ಅಲ್ಲದೆ ವಿಶ್ವಕಪ್ ಗೆಲುವಿಗಾಗಿ ಅಜ್ಜಿ ಶುಭ ಹಾರೈಸಿದ್ದಾರೆ. ಅತ್ತ ವಿರಾಟ್ ಕೊಹ್ಲಿ ಸಹ ಅಜ್ಜಿಯೊಂದಿಗೆ ಭೇಟಿಯ ಸ್ಮರಣೀಯ ಕ್ಷಣವನ್ನು ಹಂಚಿಕೊಂಡಿದ್ದಾರೆ.