ವಿರಾಟ್ ಕೊಹ್ಲಿ ಬಿಗ್ ಮ್ಯಾಚ್ ಪ್ಲೇಯರ್ ಅಲ್ಲವೇ?

ಮ್ಯಾಂಚೆಸ್ಟರ್: ಐಸಿಸಿ 2019 ಏಕದಿನ ವಿಶ್ವಕಪ್‌ನಲ್ಲಿ ನ್ಯೂಜಿಲೆಂಡ್ ವಿರುದ್ಧ ನಡೆದ ಮೊದಲ ಸೆಮಿಫೈನಲ್ ಪಂದ್ಯದಲ್ಲಿ 18 ರನ್ ಅಂತರದ ಸೋಲಿಗೆ ಶರಣಾಗಿರುವ ಟೀಮ್ ಇಂಡಿಯಾ ವಿಶ್ವಕಪ್ ಕನಸು ಭಗ್ನಗೊಂಡಿದೆ.

ಟೂರ್ನಿಯುದ್ಧಕ್ಕೂ ಅತ್ಯುತ್ತಮ ಪ್ರದರ್ಶನ ನೀಡಿರುವ ಹೊರತಾಗಿಯೂ ಕೇವಲ ಒಂದೇ ಪಂದ್ಯದ ವೈಫಲ್ಯದಿಂದ ಭಾರತ ಕೂಟದಿಂದಲೇ ಹೊರನಡೆಯುವಂತಾಗಿದೆ.

ಈ ನಡುವೆ ದಾಖಲೆಗಳ ಮೇಲೆ ದಾಖಲೆಗಳನ್ನು ಬರೆಯುತ್ತಲೇ ಸಾಗುತ್ತಿರುವ ನಾಯಕ ವಿರಾಟ್ ಕೊಹ್ಲಿ ಬಿಗ್ ಮ್ಯಾಚ್ ಪ್ಲೇಯರ್ ಅಲ್ಲವೇ ಎಂಬುದು ಸಂದೇಹಕ್ಕೀಡು ಮಾಡಿದೆ. ಅಲ್ಲದೆ '911' ಅಂಕಿ ಬೆಂಬಿಡದೆ ಕಾಡತೊಡಗಿದೆ.

ಕಳೆದ ಮೂರು ಏಕದಿನ ವಿಶ್ವಕಪ್ ಸೆಮಿಫೈನಲ್‌ಗಳಲ್ಲಿ ಎರಡಂಕಿಯನ್ನು ಕಾಣದೆ ಸತತ ವೈಫಲ್ಯ ಅನುಭವಿಸಿರುವುದೇ ಕೊಹ್ಲಿ ಕೆರಿಯರ್‌ನಲ್ಲೇ ಕಪ್ಪು ಚುಕ್ಕೆಯಾಗಿ ಪರಿಣಮಿಸಿದೆ.

ಎಂಟು ವರ್ಷಗಳ ಹಿಂದೆ ತವರು ದೇಶದಲ್ಲ ನಡೆದ ಏಕದಿನ ವಿಶ್ವಕಪ್‌ನಲ್ಲಿ ಕೊಹ್ಲಿ ಕೇವಲ 9 ರನ್ ಗಳಿಸಿ ವಿಕೆಟ್ ಒಪ್ಪಿಸಿದ್ದರು. ಬಳಿಕ 2015ರಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಕೇವಲ 1 ರನ್ನಿಗೆ ಔಟಾಗಿದ್ದರು. ಈ ಬಾರಿಯ ವಿಶ್ವಕಪ್‌ನಲ್ಲೂ ಪರಿಸ್ಥಿತಿ ಭಿನ್ನವಾಗಿರಲಿಲ್ಲ. ನ್ಯೂಜಿಲೆಂಡ್ ವಿರುದ್ಧ ಮಗೆದೂಮ್ಮೆ ಒಂದು ರನ್ನಿಗೆ ಔಟಾಗುವ ಮೂಲಕ ನಿರಾಸೆ ಮೂಡಿಸಿದ್ದಾರೆ.

ಈ ಎಲ್ಲ ಮೂರು ಬಾರಿ ಎಡಗೈ ವೇಗಿಗಳ ದಾಳಿಗೆ ವಿರಾಟ್ ವಿಕೆಟ್ ಒಪ್ಪಿಸಿದ್ದರು. ಅಲ್ಲದೆ ಅನಕ್ರಮವಾಗಿ ವಹಾಬ್ ರಿಯಾಜ್, ಮಿಚೆಲ್ ಜಾನ್ಸನ್ ಹಾಗೂ ಟ್ರೆಂಟ್ ಬೌಲ್ಟ್ ದಾಳಿಗೆ ಔಟಾಗಿದ್ದರು.

ಇನ್ನು ಆಸಕ್ತಿದಾಯಕ ಸಂಗತಿಯೆಂದರೆ 2017ರ ಚಾಂಪಿಯನ್ಸ್ ಟ್ರೋಫಿಯಲ್ಲಿ ಮೊಹಮ್ಮದ್ ಆಮೀರ್ ದಾಳಿಗೆ ಔಟಾಗಿದ್ದರು. ಒಟ್ಟಿನಲ್ಲಿ ಕೊಹ್ಲಿ ವೈಫಲ್ಯ ಅನುಭವಿಸುವದರೊಂದಿಗೆ ಭಾರತದ ವಿಶ್ವಕಪ್ ಕನಸು ಅಂತ್ಯಗೊಂಡಿದೆ.