ಕೊಹ್ಲಿಗೆ ಮೂರನೇ ವಿಶ್ವಕಪ್; ನಾಯಕನಾಗಿ ಫಸ್ಟ್!

ಲಂಡನ್: ತಮ್ಮ ಚೊಚ್ಚಲ ಪ್ರಯತ್ನದಲ್ಲೇ ಟ್ರೋಫಿಗೆ ಮುತ್ತಿಕ್ಕಿರುವ ಟೀಮ್ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ಇದೀಗ ಮೂರನೇ ಬಾರಿಗೆ ಏಕದಿನ ವಿಶ್ವಕಪ್‌ನಲ್ಲಿ ಭಾಗವಹಿಸುತ್ತಿದೆ. ಅದೇ ಹೊತ್ತಿಗೆ ನಾಯಕನಾಗಿ ಕೊಹ್ಲಿ ಇದೇ ಮೊದಲ ಬಾರಿಗೆ ಏಕದಿನ ವಿಶ್ವಕಪ್‌ನಲ್ಲಿ ತಂಡವನ್ನು ಮುನ್ನಡೆಸುತ್ತಿದ್ದಾರೆ.

ಹಾಗಾಗಿ ಕ್ಯಾಪ್ಟನ್ ಕೊಹ್ಲಿ ಪಾಲಿಗೆ 2019ರ ಏಕದಿನ ವಿಶ್ವಕಪ್ ಅತಿ ಮುಖ್ಯವೆನಿಸಿದೆ. 2011ರಲ್ಲಿ ಭಾರತ ವಿಶ್ವಕಪ್ ಗೆದ್ದಾಗ ಕೊಹ್ಲಿ ಓರ್ವ ಯುವ ಸದಸ್ಯ ಮಾತ್ರವಾಗಿದ್ದರು. ಬಳಿಕ 2015ರಲ್ಲಿ ಟಾಪ್ 4ಗೆ ತಲುಪಿದಾಗಲೂ ಓರ್ವ ಪರಿಪೂರ್ಣ ಬ್ಯಾಟ್ಸ್‌ಮನ್ ಹೊರತಾಗಿ ಹೆಚ್ಚೇನು ಪಾತ್ರ ವಹಿಸಿರಲಿಲ್ಲ.

ಆದರೆ ಇದೀಗ ಓರ್ವ ಬ್ಯಾಟ್ಸ್‌ಮನ್, ಕ್ಯಾಪ್ಟನ್ ಹಾಗೂ ಗೇಮ್ ಪ್ಲ್ಯಾನ್ ರೂಪದಲ್ಲಿ ಪ್ರತಿಯೊಂದು ಜವಾಬ್ದಾರಿ ಕೊಹ್ಲಿ ಮೇಲಿದೆ. 2011ರ ವಿಶ್ವಕಪ್ ವಿಜೇತ ನಾಯಕ ಮಹೇಂದ್ರ ಸಿಂಗ್ ಧೋನಿ ತಂಡದಲ್ಲಿರುವುದು ಕೊಹ್ಲಿ ಪಾಲಿಗೆ ವಿಶ್ವಕಪ್ ಗೆಲ್ಲುವ ಸಾಧ್ಯತೆಯನ್ನು ಹೆಚ್ಚಿಸಿದೆ.

ಪ್ರತಿಯೊಂದು ಸರಣಿಯನ್ನು ಅಷ್ಟೇ ಗಂಭೀರವಾಗಿ ಪರಿಗಣಿಸುವ ಕೊಹ್ಲಿ, ವಿಶ್ವಕಪ್‌ನಲ್ಲೂ ಸಾಧ್ಯವಾದಷ್ಟು ರನ್ ಗಳಿಸುವ ಭರವಸೆ ವ್ಯಕ್ತಪಡಿಸಿದ್ದಾರೆ. ಅಲ್ಲದೆ ವೈಯಕ್ತಿಕ ಮೈಲಿಗಿಂತಲೂ ತಂಡದೇ ಗೆಲುವೇ ಮುಖ್ಯ ಎಂಬುದನ್ನು ಸಾರಿದ್ದಾರೆ.

ಸಹಜವಾಗಿಯೇ ಅಭಿಮಾನಿಗಳು ನನ್ನಿಂದ ಅತಿ ಹೆಚ್ಚು ನಿರೀಕ್ಷೆ ಮಾಡಿರುತ್ತಾರೆ. ಇದು ನನ್ನ ಮೇಲೆ ಹೆಚ್ಚಿನ ಒತ್ತಡವನ್ನುಂಟು ಮಾಡುವುದಿಲ್ಲ. ಬದಲಾಗಿ ಈ ಒತ್ತಡವನ್ನು ನಿಭಾಯಿಸಲು ಕರಗತ ಮಾಡಿಕೊಂಡಿದ್ದೇನೆ. ನನ್ನ ಜವಾಬ್ದಾರಿ ಬಗ್ಗೆ ಉತ್ತಮ ಅರಿವಿದೆ ಎಂದು ಹೇಳಿದ್ದಾರೆ.

ಭಾರತ ತನ್ನ ಮೊದಲ ಪಂದ್ಯದಲ್ಲಿ ಜೂನ್ 05ರಂದು ದಕ್ಷಿಣ ಆಫ್ರಿಕಾ ಸವಾಲನ್ನು ಎದುರಿಸಲಿದೆ. 2008ರಲ್ಲಿ ಅಂಡರ್-19 ವಿಶ್ವಕಪ್ ವಿಜೇತ ಭಾರತ ತಂಡದ ನಾಯಕರೂ ಆಗಿರುವ ಕೊಹ್ಲಿ ಮಗದೊಮ್ಮೆ ಮ್ಯಾಜಿಕ್ ಮಾಡಲಿದ್ದಾರೆಯೇ ಎಂಬುದನ್ನು ಕಾದು ನೋಡಬೇಕಿದೆ.