ಐಸಿಸಿ ಆದೇಶಕ್ಕೆ ತಲೆಬಾಗಿದ ಬಿಸಿಸಿಐ

ಹೊಸದಿಲ್ಲಿ: ಯೋಧರ ಬಲಿದಾನದ ಲಾಂಛನವನ್ನು ಮಹೇಂದ್ರ ಸಿಂಗ್ ಧೋನಿ ತಮ್ಮ ಗ್ಲೌವ್‌ನಲ್ಲಿ ಹಾಕಿಸಿಕೊಳ್ಳಬಾರದು ಎಂಬ ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿಯ ಆದೇಶಕ್ಕೆ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ ತಲೆಬಾಗಿದೆ.

ಧೋನಿ ಬುಧವಾರ ದಕ್ಷಿಣ ಆಫ್ರಿಕಾ ವಿರುದ್ಧದ ಪಂದ್ಯದಲ್ಲಿ ವಿಕೆಟ್‌ಕೀಪಿಂಗ್‌ ಮಾಡುತ್ತಿದ್ದ ವೇಳೆ ಕೈಗವಸಿನಲ್ಲಿ ಭಾರತೀಯ ಅರೆಸೇನಾ ಪಡೆಗಳ 'ಬಲಿದಾನ್‌ ಬ್ಯಾಡ್ಜ್‌' ಅಂಟಿಸಿಕೊಂಡಿದ್ದರು. ಪ್ರಕರಣವು ವಿವಾದ ಸ್ವರೂಪವನ್ನು ತಾಳಿದಂತೆ ಆರ್ಮಿ ಗ್ಲೌವ್ ಧರಿಸಿದಂತೆ ಧೋನಿಗೆ ಸೂಚಿಸುವಂತೆ ಬಿಸಿಸಿಐ ಐಸಿಸಿ ವಿನಂತಿಸಿತ್ತು.

ಆದರೆ ಧೋನಿ ಬೆನ್ನಿಗೆ ನಿಂತಿದ್ದ ಬಿಸಿಸಿಐ ಐಸಿಸಿಗೆ ಅನುಮತಿ ಕೋರಿ ಮನವಿ ಮಾಡಿಕೊಂಡಿತ್ತು. ಆದರೆ ಸೂಕ್ಷ್ಮ ಪರಿಶೀಲನೆಯ ಬಳಿಕ ಭಾವನೆಗಳಿಗೆ ಧಕ್ಕೆ ತರುವಂಥ ಆ 'ವಿಶಿಷ್ಟ ಚಿಹ್ನೆ'ಯನ್ನು ತೆಗೆಸಿ ಎಂದು ಬಿಸಿಸಿಐ ಮೇಲೆ ಐಸಿಸಿ ಒತ್ತಡ ಹೇರಿದೆ. ಈ ಆದೇಶಕ್ಕೆ ಬಿಸಿಸಿಐ ತಲೆ ಬಾಗಿದೆ.

ಈ ಬಗ್ಗೆ ಸ್ಪಷ್ಟನೆ ನೀಡಿರುವ ಆಡಳಿತಾತ್ಮಕ ಸಮಿತಿಯ ಮುಖ್ಯಸ್ಥ ವಿನೋದ್ ರಾಯ್, ಐಸಿಸಿ ಆಡಳಿತ ಮಂಡಳಿಯ ನಿರ್ಧಾರವನ್ನು ಪಾಲಿಸುವುದಾಗಿ ತಿಳಿಸಿದ್ದಾರೆ.

ನಾವು ಐಸಿಸಿ ನಿಯಮಗಳನ್ನು ಪಾಲಿಸುತ್ತೇವೆ. ಭಾರತ ಸ್ಫೋರ್ಟಿಂಗ್ ದೇಶವಾಗಿದ್ದು, ಧೋನಿ ಗ್ಲೌವ್ ಲಾಂಛನವು ಧಾರ್ಮಿಕ ಅಥವಾ ವಾಣಿಜ್ಯ ಸಂದೇಶವನ್ನು ಸಾರುತ್ತಿಲ್ಲ. ಆದರೂ ಯಾವ ಆಟಗಾರರಿಗೂ ಐಸಿಸಿ ಅನುಮತಿ ನೀಡಿಲ್ಲ. ಹಾಗಾಗಿ ಪ್ರಕರಣವನ್ನು ಇತ್ಯರ್ಥಗೊಳಿಸಲು ಬಯಸುತ್ತೇವೆ ಎಂದಿದ್ದಾರೆ.