ಯುವಿಗೆ ಸಚಿನ್ ಭಾವನಾತ್ಮಕ ಸಂದೇಶ

ಮುಂಬಯಿ: ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ನಿವೃತ್ತಿ ಸಲ್ಲಿಸಿರುವ ವಿಶ್ವಕಪ್ ಹೀರೊ ಯುವರಾಜ್ ಸಿಂಗ್ ಅವರಿಗೆ ಮಾಜಿ ಕ್ರಿಕೆಟ್ ಐಕಾನ್ ಸಚಿನ್ ತೆಂಡೂಲ್ಕರ್ ಭಾವನಾತ್ಮಕ ಸಂದೇಶ ಹಂಚಿಕೊಂಡಿದ್ದಾರೆ.

ಯುವಿ ಅದ್ಭುತ ಕೆರಿಯರ್ ಹೊಂದಿದ್ದರು ಎಂಬುದನ್ನು ಉಲ್ಲೇಖಿಸಿರುವ ಸಚಿನ್, ಪ್ರತಿ ಬಾರಿಯೂ ತಂಡ ಬಯಸಿದಾಗ ನೈಜ ಚಾಂಪಿಯನ್ ಆಗಿ ಹೊರಹೊಮ್ಮಿರುವುದಾಗಿ ತಿಳಿಸಿದರು.

2007ರ ಚೊಚ್ಚಲ ಟ್ವೆಂಟಿ-20 ಹಾಗೂ 2011 ಏಕದಿನ ವಿಶ್ವಕಪ್ ಗೆಲುವುಗಳಲ್ಲಿ ಯುವಿ ನೈಜ ಹೀರೊ ಎನಿಸಿಕೊಂಡಿದ್ದರು. ಇದನ್ನೇ ಸಚಿನ್ ಬೊಟ್ಟು ಮಾಡಿದರು.

ಮೈದಾನ ಹಾಗೂ ಜೀವನದಲ್ಲಿ ಹಲವು ಏರಿಳಿತಗಳ ಮಧ್ಯೆಯೂ ನೀವು ಮಾಡಿರುವ ಹೋರಾಟವು ಅತ್ಯದ್ಭುತವಾಗಿದೆ ಎಂದು ಹೇಳಿರುವ ಸಚಿನ್ ತೆಂಡೂಲ್ಕರ್ ಯುವಿ ಎರಡನೇ ಇನ್ನಿಂಗ್ಸ್‌ಗೆ ಶುಭಾಶಯಗಳನ್ನು ಕೋರಿದರು.

ನಿಮ್ಮ ಮಾಹಿತಿಗಾಗಿ, 2011ರಲ್ಲಿ ಸಚಿನ್ ತೆಂಡೂಲ್ಕರ್‌ಗಾಗಿ ವಿಶ್ವಕಪ್ ಗೆಲ್ಲಲಿದ್ದೇವೆ ಎಂದು ಯುವಿ ಹೇಳಿದ್ದರು. ಬಳಿಕ ಕೊಟ್ಟ ಸಚಿನ್‌ಗಾಗಿ ವಿಶ್ವಕಪ್ ಗೆದ್ದಿದ್ದರು. ಅಲ್ಲದೆ ಸರಣಿಶ್ರೇಷ್ಠ ಪ್ರಶಸ್ತಿಗೂ ಭಾಜನವಾಗಿದ್ದರು.