ಅಜಿಂಕ್ಯ ರಹಾನೆ ಶತಕ, ಹನುಮ ವಿಹಾರಿ ಫಿಫ್ಟಿ; ವಿಂಡೀಸ್ ವಿರುದ್ಧ ಬೃಹತ್ ಮುನ್ನಡೆ ದಾಖಲಿಸಿದ ಭಾರತ

ಆ್ಯಂಟಿಗುವಾ: ಮಿಸ್ಟರ್ ಡಿಪೆಂಡಬಲ್ ಖ್ಯಾತಿಯ ಅಜಿಂಕ್ಯ ರಹಾನೆ ಬಾರಿಸಿದ ಅಮೋಘ ಶತಕ ಹಾಗೂ ಹನುಮ ವಿಹಾರಿ ಅರ್ಧಶತಕದ ನೆರವಿನಿಂದ ಟೀಮ್ ಇಂಡಿಯಾವು ಆತಿಥೇಯ ವೆಸ್ಟ್‌ಇಂಡೀಸ್ ವಿರುದ್ಧ ನಡೆಯುತ್ತಿರುವ ಮೊದಲ ಟೆಸ್ಟ್ ಪಂದ್ಯದಲ್ಲಿ ಭರ್ಜರಿ ಮುನ್ನಡೆ ಗಳಿಸಿದೆ.

ಮೊದಲ ಇನ್ನಿಂಗ್ಸ್‌ನಲ್ಲಿ ಅರ್ಧಶತಕ ಸಾಧನೆ ಮಾಡಿರುವ ರಹಾನೆ, ದ್ವಿತೀಯ ಇನ್ನಿಂಗ್ಸ್‌ನಲ್ಲೂ ನಾಲ್ಕನೇ ದಿನದಾಟದಲ್ಲಿ ಭಾರತಕ್ಕೆ ಆಸರೆಯಾದರು. ಅಲ್ಲದೆ ಎರಡು ವರ್ಷಗಳ ಶತಕದ ಬರವನ್ನು ನೀಗಿಸಿಕೊಂಡಿದ್ದಾರೆ. ರಹಾನೆ ಶತಕದ ವೇಳೆಗೆ ಭಾರತ ನಾಲ್ಕು ವಿಕೆಟ್ ನಷ್ಟಕ್ಕೆ 308 ರನ್ ಗಳಿಸಿತ್ತು. ಈ ಮೂಲಕ 383 ರನ್‌ಗಳ ಒಟ್ಟು ಮುನ್ನಡೆಯನ್ನು ಗಳಿಸಿತ್ತು.

185/3 ಎಂಬಲ್ಲಿದ್ದ ಬ್ಯಾಟಿಂಗ್ ಮುಂದುವರಿಸಿದ ಭಾರತಕ್ಕೆ ನಾಲ್ಕನೇ ದಿನದಾಟದ ಆರಂಭದಲ್ಲೇ ನಾಯಕ ವಿರಾಟ್ ಕೊಹ್ಲಿ (51) ವಿಕೆಟ್ ನಷ್ಟವಾಯಿತು. ಇದರೊಂದಿಗೆ 106 ರನ್‌ಗಳ ಜತೆಯಾಟವು ಮುರಿದು ಬಿತ್ತು.

ಈ ಹಂತದಲ್ಲಿ ಹನುಮ ವಿಹಾರಿ ಜತೆಗೂಡಿದ ರಹಾನೆ ತಂಡವನ್ನು ಮುನ್ನಡೆಸಿದರು. ಅಲ್ಲದೆ ಬೃಹತ್ ಮುನ್ನಡೆ ಪೇರಿಸುವಲ್ಲಿ ನೆರವಾದರು. ಇದು ಟೆಸ್ಟ್ ಕ್ರಿಕೆಟ್‌ನಲ್ಲಿ ರಹಾನೆ ಬ್ಯಾಟ್‌ನಿಂದ ಸಿಡಿದ 10ನೇ ಶತಕವಾಗಿದೆ.

ಇನ್ನೊಂದೆಡೆ ಸಮಯೋಚಿತ ಬ್ಯಾಟಿಂಗ್ ಪ್ರದರ್ಶಿಸಿರುವ ವಿಹಾರಿ ಆಕರ್ಷಕ ಅರ್ಧಶತಕದ ಮೂಲಕ ಗಮನ ಸೆಳೆದಿದ್ದಾರೆ.

ಈ ಮೊದಲು ಭಾರತದ 297 ರನ್‌ಗಳಿಗೆ ಉತ್ತರವಾಗಿ ವೆಸ್ಟ್‌ಇಂಡೀಸ್ ತನ್ನ ಮೊದಲ ಇನ್ನಿಂಗ್ಸ್‌ನಲ್ಲಿ 222 ರನ್‌ಗಳಿಗೆ ಸರ್ವಪತನವನ್ನು ಕಂಡಿತು. ಮಾರಕ ದಾಳಿ ಸಂಘಟಿಸಿದ ಇಶಾಂತ್ ಶರ್ಮಾ 43 ರನ್ ತೆತ್ತು ಐದು ವಿಕೆಟುಗಳನ್ನು ಕಬಳಿಸಿದರು.

ಇದಕ್ಕೂ ಮೊದಲು ಅಜಿಂಕ್ಯ ರಹಾನೆ (81) ಹಾಗೂ ರವೀಂದ್ರ ಜಡೇಜಾ (58) ಅರ್ಧಶತಕಗಳ ನೆರವಿನಿಂದ ಭಾರತ ತನ್ನ ಮೊದಲ ಇನ್ನಿಂಗ್ಸ್‌ನಲ್ಲಿ 297 ರನ್ ಪೇರಿಸಿತ್ತು.