ಕೊನೆಯ ಪಂದ್ಯದಲ್ಲಿ ಗೇಲ್ ಸಿಡಿಲಬ್ಬರದ ಫಿಫ್ಟಿ

ಪೋರ್ಟ್ ಆಪ್ ಸ್ಪೇನ್: ತಮ್ಮ ಕೊನೆಯ ಅಂತಾರಾಷ್ಟ್ರೀಯ ಪಂದ್ಯದಲ್ಲಿ ಸಿಡಿಲಬ್ಬರದ ಫಿಫ್ಟಿ ಬಾರಿಸಿರುವ ವೆಸ್ಟ್‌ಇಂಡೀಸ್‌ನ ಬ್ಯಾಟಿಂಗ್ ದೈತ್ಯ ಕ್ರಿಸ್ ಗೇಲ್ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದ್ದಾರೆ.

ಕ್ರಿಸ್ ಗೇಲ್ ಇನ್ನಷ್ಟೇ ಅಧಿಕೃತವಾಗಿ ನಿವೃತ್ತಿ ಘೋಷಿಸಬೇಕಿದೆ. ಆದರೆ ಗೇಲ್ ಔಟ್ ಆದ ಬೆನ್ನಲ್ಲೇ ಭಾರತೀಯ ಆಟಗಾರರೆಲ್ಲರೂ ಹತ್ತಿರ ತೆರಳಿ ಶಭಾಷ್‌ಗಿರಿ ಹೇಳುವ ಮೂಲಕ ಬೀಳ್ಕೊಡುಗೆ ನೀಡಿದರು.

ಎಂದಿನಂತೆ ತಮ್ಮ ನೈಜ ಶೈಲಿಯಲ್ಲಿ ಬ್ಯಾಟ್ ಬೀಸಿದ ಗೇಲ್ ಕೇವಲ 30 ಎಸೆತಗಳಲ್ಲೇ ಅರ್ಧಶತಕವನ್ನು ಸಿಡಿಸಿದರು. ಅಷ್ಟೇ ಯಾಕೆ ಎವಿನ್ ಲೆವಿಸ್ ಜತೆಗೆ ಮೊದಲ ವಿಕೆಟ್‌ಗೆ 10.5 ಓವರ್‌ಗಳಲ್ಲಿ 115 ರನ್‌ಗಳ ಜತೆಯಾಟದಲ್ಲಿ ಭಾಗಿಯಾದರು.

ಫಿಫ್ಟಿ ಬಳಿಕವೂ ಬಾರತೀಯ ಬೌಲರ್‌ಗಳನ್ನು ದಂಡಿಸಲುತ್ತಲೇ ಸಾಗಿದರು. ಈ ನಡುವೆ ಖಲೀಲ್ ಅಹ್ಮದ್ ದಾಳಿಯಲ್ಲಿ ನಾಯಕ ವಿರಾಟ್ ಕೊಹ್ಲಿಗೆ ಕ್ಯಾಚಿತ್ತು ಮರಳಿದರು.

41 ಎಸೆತಗಳನ್ನು ಎದುರಿಸಿದ ಗೇಲ್ ಎಂಟು ಬೌಂಡರಿ ಹಾಗೂ ಐದು ಸಿಕ್ಸರ್‌ಗಳ ನೆರವಿನಿಂದ 72 ರನ್ ಗಳಿಸಿದರು.

ಕಳೆದ ಪಂದ್ಯದಲ್ಲಷ್ಟೇ ಬ್ರ್ಯಾನ್ ಲಾರಾ ದಾಖಲೆ ಮುರಿದ ಗೇಲ್ ಏಕದಿನ ಕ್ರಿಕೆಟ್‌ನಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ವೆಸ್ಟ್‌ಇಂಡೀಸ್ ಬ್ಯಾಟ್ಸ್‌ಮನ್ ಎಂಬ ಹಿರಿಮೆಗೆ ಪಾತ್ರವಾಗಿದ್ದರು.