ವಿಶ್ವಕಪ್ ಸೋಲಿನ ಕರಾಳ ನೆನಪುಗಳನ್ನು ಬಿಚ್ಚಿಟ್ಟ ಕೊಹ್ಲಿ

ಫ್ಲೋರಿಡಾ: ಐಸಿಸಿ 2019 ಏಕದಿನ ವಿಶ್ವಕಪ್ ಸೆಮಿಫೈನಲ್‌ನಲ್ಲಿ ನ್ಯೂಜಿಲೆಂಡ್ ವಿರುದ್ಧ ಸೋಲಿನ ಆಘಾತ ಎದುರಿಸಿದ ಭಾರತ ತಂಡದ ಟ್ರೋಫಿ ಕನಸು ಭಗ್ನಗೊಂಡಿತ್ತು.

ಈ ಸೋಲನ್ನು ಕೋಟ್ಯಂತರ ಅಭಿಮಾನಿಗಳ ಜತೆಗೆ ಆಟಗಾರರಿಗೂ ಅರಗಿಸಿಕೊಳ್ಳುವುದು ಕಠಿಣವೆನಿಸಿತ್ತು. ಅಲ್ಲದೆ ವಿಶ್ವಕಪ್ ಸೋಲಿನ ಬಳಿಕದ ಕರಾಳ ನೆನಪುಗಳನ್ನು ಟೀಮ್ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ಬಿಚ್ಚಿಟ್ಟಿದ್ದಾರೆ.

ವಿಶ್ವಕಪ್‌ನಿಂದ ಹೊರನಡೆದ ಬಳಿಕ ಕೆಲವು ದಿನಗಳನ್ನು ಕಳೆಯುವುದು ಅತ್ಯಂತ ಕಠಿಣವೆನಿಸಿತ್ತು ಎಂದು ಬೇಸರು ತೋಡಿಕೊಂಡಿದ್ದಾರೆ.

ವಿಶ್ವಕಪ್ ಮುಗಿಯುವ ವರೆಗೂ ಬೆಳಗ್ಗೆ ಎದ್ದ ತಕ್ಷಣ ಅತ್ಯಂತ ಕೆಟ್ಟ ಅನುಭವ ಎದುರಾಗಿತ್ತು ಎಂದು ಸೇರಿಸಿದರು.

ಆದರೆ ಓರ್ವ ವೃತ್ತಿ ಪರ ಕ್ರಿಕೆಟಿಗನಾಗಿ ಇಲ್ಲಿಂದ ಎಚ್ಚೆತ್ತುಕೊಂಡು ಮುಂದಿನ ಸರಣಿಯತ್ತ ಗಮನ ಕೇಂದ್ರಿಕರಿಸಬೇಕಿದೆ. ಪ್ರಸ್ತುತ ತಂಡವನ್ನು ಮತ್ತೆ ಕಟ್ಟುವ ನಂಬಿಕೆಯಲ್ಲಿದ್ದೇವೆ ಎಂದು ನುಡಿದರು.

ಎಲ್ಲ ಆಟಗಾರರು ಮೈದಾನಕ್ಕಿಳಿದು ತಮ್ಮ ಶ್ರೇಷ್ಠ ಪ್ರದರ್ಶನ ನೀಡಲು ಕಾತರದಲ್ಲಿದ್ದಾರೆ. ಅಲ್ಲದೆ ಮುಂದಿನ ವರ್ಷ ನಡೆಯಲಿರುವ ಟ್ವೆಂಟಿ-20 ವಿಶ್ವಕಪ್ ಗಮನದಲ್ಲಿಟ್ಟುಕೊಂಡು ಶ್ರೇಷ್ಠ ಸಂಯೋಜನೆಯ ಹುಡುಕಾಟದಲ್ಲಿದ್ದೇವೆ ಎಂದು ಹೇಳಿದರು.