ಕಠಿಣ ಪರಿಸ್ಥಿತಿಯಲ್ಲಿ ಬ್ಯಾಟಿಂಗ್ ಮಾಡಲು ಬಯಸುತ್ತೇನೆ: ಶ್ರೇಯಸ್

ಪೋರ್ಟ್ ಆಫ್ ಸ್ಪೇನ್: ತಂಡ ಬಯಸಿದಾಗ ಅತ್ಯಂತ ಕಠಿಣ ಪರಿಸ್ಥಿತಿಯಲ್ಲಿ ಬ್ಯಾಟಿಂಗ್ ಮಾಡಲು ಅತೀವ ಸಂತಸವಿದೆ ಎಂದು ಟೀಮ್ ಇಂಡಿಯಾ ಯುವ ಭರವಸೆಯ ಬ್ಯಾಟ್ಸ್‌ಮನ್ ಶ್ರೇಯಸ್ ಅಯ್ಯರ್ ಅಭಿಪ್ರಾಯಪಟ್ಟಿದ್ದಾರೆ.

ವೆಸ್ಟ್‌ಇಂಡೀಸ್ ವಿರುದ್ಧ ನಡೆದ ಏಕದಿನ ಸರಣಿಯ ಕೊನೆಯ ಎರಡು ಪಂದ್ಯಗಳಲ್ಲಿ ಅರ್ಧಶತಕ ಸಾಧನೆ ಮಾಡಿರುವ 24ರ ಹರೆಯದ ಶ್ರೇಯಸ್, ನಾಯಕ ವಿರಾಟ್ ಕೊಹ್ಲಿ ಜತೆ ನಿರ್ಣಾಯಕ ಜತೆಯಾಟದಲ್ಲಿ ಭಾಗಿಯಾಗುವ ಮೂಲಕ ಟೀಮ್ ಇಂಡಿಯಾ ಗೆಲುವಿನಲ್ಲಿ ನಿರ್ಣಾಯಕ ಪಾತ್ರ ವಹಿಸಿದ್ದರು.

ದ್ವಿತೀಯ ಹಾಗೂ ಅಂತಿಮ ಏಕದಿನ ಪಂದ್ಯದಲ್ಲಿ ಕೊಹ್ಲಿ ಜತೆಗೆ ಅನುಕ್ರಮವಾಗಿ 125 ಹಾಗೂ 120 ರನ್‌‍ಗಳ ಜತೆಯಾಟದಲ್ಲಿ ಶ್ರೇಯಸ್ ಭಾಗಿಯಾಗಿದ್ದರು.

ತುಂಬಾನೇ ಸಂತಸವಾಗುತ್ತಿದೆ. ಡ್ರೆಸ್ಸಿಂಗ್ ಕೊಠಡಿಯಲ್ಲಿ ಎಲ್ಲರೂ ನರ್ವಸ್ ಆಗಿರುವಾಗ ಇಂತಹ ಕಠಿಣ ಪರಿಸ್ಥಿತಿಯಲ್ಲಿ ಕ್ರೀಸಿಗಿಳಿದು ಬ್ಯಾಟಿಂಗ್ ಮಾಡುವುದನ್ನು ಬಯಸುತ್ತೇನೆ. ಯಾಕೆಂದರೆ ಪಂದ್ಯವು ಎತ್ತ ಬೇಕಾದರೂ ವಾಲಬಹುದು ಎಂದು ಹೇಳಿದರು.

41 ಎಸೆತಗಳಲ್ಲಿ 65 ರನ್ ಗಳಿಸಿದ ಶ್ರೇಯಸ್ ಇನ್ನಿಂಗ್ಸ್‌ನಲ್ಲಿ ಮೂರು ಬೌಂಡರಿಗಳು ಹಾಗೂ ಐದು ಸಿಕ್ಸರ್‌ಗಳು ಸೇರಿದ್ದವು. ಚಹಲ್ ಟಿವಿಯಲ್ಲಿ ಈ ಬಗ್ಗೆ ಪ್ರತಿಕ್ರಿಯಿಸಿದ ಅಯ್ಯರ್, ತಮ್ಮ ಬೌಲರ್‌ಗಳನ್ನು ದಂಡಿಸಿರುವುದಕ್ಕೆ ತಾವು ಪ್ರತಿಕಾರ ತೀರಿಸಿದ್ದೇವೆ ಎಂದಿದ್ದಾರೆ.