ರಹಾನೆ 102, ವಿಹಾರಿ 93; ಭಾರತ 343/7 ಡಿ.; ವಿಂಡೀಸ್‌ಗೆ 419 ರನ್‌ಗಳ ಗೆಲುವಿನ ಗುರಿ

ಆ್ಯಂಟಿಗುವಾ: ಆತಿಥೇಯ ವೆಸ್ಟ್‌ಇಂಡೀಸ್ ವಿರುದ್ಧ ನಡೆಯುತ್ತಿರುವ ಮೊದಲ ಟೆಸ್ಟ್ ಪಂದ್ಯದಲ್ಲಿ ಅಜಿಂಕ್ಯ ರಹಾನೆ ಶತಕ (102) ಹಾಗೂ ಹನುಮ ವಿಹಾರಿ (93) ಹಾಗೂ ನಾಯಕ ವಿರಾಟ್ ಕೊಹ್ಲಿ (51) ಅರ್ಧಶತಕಗಳ ನೆರವಿನಿಂದ ನಾಲ್ಕನೇ ದಿನದಾಟದಲ್ಲಿ ತನ್ನ ದ್ವಿತೀಯ ಇನ್ನಿಂಗ್ಸ್‌ನಲ್ಲಿ ಏಳು ವಿಕೆಟ್ ನಷ್ಟಕ್ಕೆ 343 ರನ್ ಪೇರಿಸಿರುವ ಟೀಮ್ ಇಂಡಿಯಾವು ಡಿಕ್ಲೇರ್ ಘೋಷಿಸಿದೆ.

ಇದರೊಂದಿಗೆ ವೆಸ್ಟ್‌ಇಂಡೀಸ್‌ಗೆ 419 ರನ್‌ಗಳ ಗೆಲುವಿನ ಗುರಿ ಒಡ್ಡಿದೆ. ಈ ಮೊದಲು ಟೀಮ್ ಇಂಡಿಯಾ ಮೊದಲ ಇನ್ನಿಂಗ್ಸ್‌ನಲ್ಲಿ 75 ರನ್‌ಗಳ ಅಮೂಲ್ಯ ಮುನ್ನಡೆ ಗಳಿಸಿತ್ತು.

ಮಿಸ್ಟರ್ ಡಿಪೆಂಡಬಲ್ ಖ್ಯಾತಿಯ ಅಜಿಂಕ್ಯ ರಹಾನೆ ಬಾರಿಸಿದ ಅಮೋಘ ಶತಕ ಹಾಗೂ ಹನುಮ ವಿಹಾರಿ ಅರ್ಧಶತಕದ ನೆರವಿನಿಂದ ಟೀಮ್ ಇಂಡಿಯಾವು ನಾಲ್ಕನೇ ದಿನದಾಟದಲ್ಲಿ ಮೇಲುಗೈಯನ್ನು ಸ್ಥಾಪಿಸಿತ್ತು.

ಮೊದಲ ಇನ್ನಿಂಗ್ಸ್‌ನಲ್ಲಿ ಅರ್ಧಶತಕ ಸಾಧನೆ ಮಾಡಿರುವ ರಹಾನೆ, ದ್ವಿತೀಯ ಇನ್ನಿಂಗ್ಸ್‌ನಲ್ಲೂ ನಾಲ್ಕನೇ ದಿನದಾಟದಲ್ಲಿ ಭಾರತಕ್ಕೆ ಆಸರೆಯಾದರು. ಅಲ್ಲದೆ ಎರಡು ವರ್ಷಗಳ ಶತಕದ ಬರವನ್ನು ನೀಗಿಸಿಕೊಂಡರು.

185/3 ಎಂಬಲ್ಲಿದ್ದ ಬ್ಯಾಟಿಂಗ್ ಮುಂದುವರಿಸಿದ ಭಾರತಕ್ಕೆ ನಾಲ್ಕನೇ ದಿನದಾಟದ ಆರಂಭದಲ್ಲೇ ನಾಯಕ ವಿರಾಟ್ ಕೊಹ್ಲಿ (51) ವಿಕೆಟ್ ನಷ್ಟವಾಯಿತು. ಇದರೊಂದಿಗೆ 106 ರನ್‌ಗಳ ಜತೆಯಾಟವು ಮುರಿದು ಬಿತ್ತು.

ಈ ಹಂತದಲ್ಲಿ ಹನುಮ ವಿಹಾರಿ ಜತೆಗೂಡಿದ ರಹಾನೆ ತಂಡವನ್ನು ಮುನ್ನಡೆಸಿದರು. ಅಲ್ಲದೆ ಬೃಹತ್ ಮುನ್ನಡೆ ಪೇರಿಸುವಲ್ಲಿ ನೆರವಾದರು. ಇದು ಟೆಸ್ಟ್ ಕ್ರಿಕೆಟ್‌ನಲ್ಲಿ ರಹಾನೆ ಬ್ಯಾಟ್‌ನಿಂದ ಸಿಡಿದ 10ನೇ ಶತಕವಾಗಿದೆ.

ಇನ್ನೊಂದೆಡೆ ಸಮಯೋಚಿತ ಬ್ಯಾಟಿಂಗ್ ಪ್ರದರ್ಶಿಸಿರುವ ವಿಹಾರಿ ಆಕರ್ಷಕ ಅರ್ಧಶತಕದ ಮೂಲಕ ಗಮನ ಸೆಳೆದರು. ರಹಾನೆ ಹಾಗೂ ವಿಹಾರಿ ಐದನೇ ವಿಕೆಟ್‌ಗೆ 135 ರನ್‌ಗಳ ಜತೆಯಾಟದಲ್ಲಿ ಭಾಗಿಯಾದರು.

242 ಎಸೆತಗಳನ್ನು ಎದುರಿಸಿದ ರಹಾನೆ ಐದು ಬೌಂಡರಿಗಳಿಂದ 102 ರನ್ ಗಳಿಸಿದರು. ಹಾಗೆಯೇ 128 ಎಸೆತಗಳನ್ನು ಎದುರಿಸಿದ ವಿಹಾರಿ 10 ಬೌಂಡರಿ ಹಾಗೂ ಸಿಕ್ಸರ್ ನೆರವಿನಿಂದ 93 ರನ್ ಗಳಿಸಿದರು. ಇನ್ನುಳಿದಂತೆ ರಿಷಬ್ ಪಂತ್ (7) ನಿರಾಸೆ ಮೂಡಿಸಿದರು. ವಿಂಡೀಸ್ ಪರ ರೋಸ್ಟನ್ ಚೇಸ್ ನಾಲ್ಕು ವಿಕೆಟ್ ಪಡೆದರು.

ಈ ಮೊದಲು ಭಾರತದ 297 ರನ್‌ಗಳಿಗೆ ಉತ್ತರವಾಗಿ ವೆಸ್ಟ್‌ಇಂಡೀಸ್ ತನ್ನ ಮೊದಲ ಇನ್ನಿಂಗ್ಸ್‌ನಲ್ಲಿ 222 ರನ್‌ಗಳಿಗೆ ಸರ್ವಪತನವನ್ನು ಕಂಡಿತು. ಮಾರಕ ದಾಳಿ ಸಂಘಟಿಸಿದ ಇಶಾಂತ್ ಶರ್ಮಾ 43 ರನ್ ತೆತ್ತು ಐದು ವಿಕೆಟುಗಳನ್ನು ಕಬಳಿಸಿದರು.

ಈ ಮುನ್ನ ಅಜಿಂಕ್ಯ ರಹಾನೆ (81) ಹಾಗೂ ರವೀಂದ್ರ ಜಡೇಜಾ (58) ಅರ್ಧಶತಕಗಳ ನೆರವಿನಿಂದ ಭಾರತ ತನ್ನ ಮೊದಲ ಇನ್ನಿಂಗ್ಸ್‌ನಲ್ಲಿ 297 ರನ್ ಪೇರಿಸಿತ್ತು.