ಭಾರತ-ವಿಂಡೀಸ್ ದ್ವಿತೀಯ ಏಕದಿನಕ್ಕೂ ಮಳೆ ಕಾಡಬಹುದೇ?

ಟ್ರಿನಿಡಾಡ್: ಪ್ರವಾಸಿ ಭಾರತ ಹಾಗೂ ಆತಿಥೇಯ ವೆಸ್ಟ್‌ಇಂಡೀಸ್ ನಡುವಣ ಮೊದಲ ಏಕದಿನ ಪಂದ್ಯಕ್ಕೆ ಮಳೆ ಅಡ್ಡಿಯಾಗಿದೆ. ಇದರಿಂದಾಗಿ ಸರಣಿ ವಶಪಡಿಸಿಕೊಳ್ಳಲು ಮುಂದಿನ ಎರಡು ಪಂದ್ಯಗಳಲ್ಲೂ ಗೆಲ್ಲಲೇಬೇಕಾದ ಒತ್ತಡಕ್ಕೆ ಭಾರತ ಸಿಲುಕಿದೆ.

ಈ ಮೊದಲು ನಡೆದ ಮೂರು ಪಂದ್ಯಗಳ ಟ್ವೆಂಟಿ-20 ಸರಣಿಯಲ್ಲಿ 3-0 ಅಂತರದ ಕ್ಲೀನ್ ಸ್ವೀಪ್ ಜಯ ದಾಖಲಿಸಿತ್ತು. ಆದರೆ ಗಯಾನದಲ್ಲಿ ನಡೆದ ಮೊದಲ ಏಕದಿನ ಪಂದ್ಯಕ್ಕೆ ಮಳೆ ಕಾಡಿತ್ತು.

34 ಓವರ್‌ಗಳಿಗೆ ಇಳಿಸಲ್ಪಟ್ಟ ಪಂದ್ಯದಲ್ಲಿ ವಿಂಡೀಸ್ 13 ಓವರ್‌ಗಳ ಬ್ಯಾಟಿಂಗ್ ಮಾತ್ರ ನಡೆಸಿತ್ತು. ಅಂತಿಮವಾಗಿ ವರುಣನ ಅವಕೃಪೆಯಿಂದಾಗಿ ಪಂದ್ಯವನ್ನು ಕೈಬಿಡಲಾಗಿತ್ತು.

ಇದೀಗ ದ್ವಿತೀಯ ಏಕದಿನ ಪಂದ್ಯವು ಟ್ರಿನಿಡಾಡ್ ಹಾಗೂ ಟೊಬಗೊದಲ್ಲಿ ಭಾನುವಾರಂದು ನಡೆಯಲಿದೆ. ಆದರೆ ಶುಭದಾಯಕ ಸಂದೇಶವೆಂಬಂತೆ ಭಾರತ ಹಾಗೂ ವಿಂಡೀಸ್‌ನ ದ್ವಿತೀಯ ಪಂದ್ಯ ನಡೆಯಲಿದ್ದು, ಮಳೆ ಕಾಡುವ ಸಂಭವ ಕಡಿಮೆಯಾಗಿದೆ.

ಹವಾಮಾನ ಇಲಾಖೆಯ ಪ್ರಕಾರ ಬೆಳಗ್ಗಿನ ಹೊತ್ತಿನಲ್ಲಿ ಶೇಕಡಾ 20ರಷ್ಟು ಹಾಗೂ ಅಪರಾಹ್ನದ ಮೇಲೆ ಶೇ.10ರಷ್ಟು ಮಾತ್ರ ಮಳೆ ಸಾಧ್ಯತೆಯಿದೆ. ಹಾಗಾಗಿ ಬಹುತೇಕ ಸಂಪೂರ್ಣ ಪಂದ್ಯ ನಡೆಯುವುದು ಖಚಿತವೆನಿಸಿದೆ.

ತೃತೀಯ ಏಕದಿನ ಪಂದ್ಯವು ಇದೇ ಮೈದಾನಲ್ಲಿ ಬುಧವಾರದಂದು ನಡೆಯಲಿದೆ.