ಮೊಹಮ್ಮದ್ ಶಮಿ ಕೊನೆಯ ಆರು ಇನ್ನಿಂಗ್ಸ್ 0,0,0,0,0,0..!

ಕಿಂಗ್‌ಸ್ಟನ್: ವೆಸ್ಟ್‌ಇಂಡೀಸ್ ವಿರುದ್ಧ ನಡೆಯುತ್ತಿರುವ ದ್ವಿತೀಯ ಟೆಸ್ಟ್ ಪಂದ್ಯದಲ್ಲಿ ಬಲಗೈ ವೇಗಿ ಮೊಹಮ್ಮದ್ ಶಮಿ 150 ವಿಕೆಟುಗಳನ್ನು ಕಬಳಿಸುವ ಮೂಲಕ ಸ್ಮರಣೀಯ ಮೈಲುಗಲ್ಲು ಸ್ಥಾಪಿಸಿರಬಹುದು. ಆದರೆ ಇದಕ್ಕೂ ಮೊದಲು ಬ್ಯಾಟಿಂಗ್‌ನಲ್ಲಿ ಶೂನ್ಯಕ್ಕೆ ಔಟಾಗುವ ಮೂಲಕ ನಿರಾಸೆ ಅನುಭವಿಸಿದ್ದಾರೆ.

ಕಳೆದ ಆರು ಟೆಸ್ಟ್ ಇನ್ನಿಂಗ್ಸ್‌ಗಳಲ್ಲಿ ಮೊಹಮ್ಮದ್ ಶಮಿಗೆ ಖಾತೆ ತೆರೆಯಲೇ ಸಾಧ್ಯವಾಗಿಲ್ಲ ಎಂಬುದು ಗಮನಾರ್ಹವೆನಿಸುತ್ತದೆ. ತಾವು ಎದುರಿಸಿದ ಕೊನೆಯ ಎಂಟು ಎಸೆತಗಳಲ್ಲಿ ಆರು ಬಾರಿ ಖಾತೆ ತೆರೆಯಲು ವಿಫಲವಾಗಿದ್ದಾರೆ. ಈ ಪೈಕಿ ಎರಡು ಬಾರಿ ಅಜೇಯರಾಗುಳಿದಿದ್ದರು.

ಮೊಹಮ್ಮದ್ ಶಮಿ ಕೊನೆಯ ಆರು ಟೆಸ್ಟ್ ಇನ್ನಿಂಗ್ಸ್‌ಗಳು:
0(2) ವೆಸ್ಟ್‌ಇಂಡೀಸ್ ವಿರುದ್ಧ (ಕಿಂಗ್‌ಸ್ಟನ್)
0(1) ವೆಸ್ಟ್‌ಇಂಡೀಸ್ ವಿರುದ್ಧ (ನಾರ್ತ್ ಸೌಂಡ್)
0*(3) ಆಸ್ಟ್ರೇಲಿಯಾ ವಿರುದ್ಧ (ಮೆಲ್ಬೋರ್ನ್)
0*(0) ಆಸ್ಟ್ರೇಲಿಯಾ ವಿರುದ್ಧ (ಪರ್ತ್)
0(1) ಆಸ್ಟ್ರೇಲಿಯಾ ವಿರುದ್ಧ (ಪರ್ತ್)
0(1) ಆಸ್ಟ್ರೇಲಿಯಾ ವಿರುದ್ಧ (ಆಡಿಲೇಡ್)

ಏತನ್ಮಧ್ಯೆ ಟೆಸ್ಟ್ ಕ್ರಿಕೆಟ್‌ನಲ್ಲಿ ಅತಿ ವೇಗದಲ್ಲಿ 150 ವಿಕೆಟ್ ಕಬಳಿಸಿದ ಭಾರತೀಯ ಬೌಲರ್‌ಗಳ ಪಟ್ಟಿಯಲ್ಲಿ ಮೊಹಮ್ಮದ್ ಶಮಿ ಮೂರನೇ ಸ್ಥಾನದಲ್ಲಿ ಗುರುತಿಸಿಕೊಂಡಿದ್ದಾರೆ. ಈ ಮೂಲಕ ವಿಂಡೀಸ್ ವಿರುದ್ಧದ ಟೆಸ್ಟ್ ಸರಣಿಯಲ್ಲಿ ಮಿಶ್ರ ಫಲವನ್ನು ಕಂಡಿದ್ದಾರೆ.