ಜಡೇಜಾ ಫೈಟ್‌ಬ್ಯಾಕ್ ಫಿಫ್ಟಿ; ವಿಂಡೀಸ್ ವಿರುದ್ಧ ಭಾರತ 297 ರನ್ನಿಗೆ ಆಲೌಟ್

ಆ್ಯಂಟಿಗುವಾ: ಆತಿಥೇಯ ವೆಸ್ಟ್‌ಇಂಡೀಸ್ ವಿರುದ್ಧ ನಡೆಯುತ್ತಿರುವ ಮೊದಲ ಟೆಸ್ಟ್ ಪಂದ್ಯದಲ್ಲಿ ಟೀಮ್ ಇಂಡಿಯಾ ಮೊದಲ ಇನ್ನಿಂಗ್ಸ್‌ನಲ್ಲಿ 96.4 ಓವರ್‌ಗಳಲ್ಲಿ 297 ರನ್‌ಗಳಿಗೆ ತನ್ನೆಲ್ಲ ವಿಕೆಟುಗಳನ್ನು ಕಳೆದುಕೊಂಡಿದೆ.

203/6 ಎಂಬಲ್ಲಿದ್ದ ದಿನದಾಟ ಮುಂದುವರಿಸಿದ ಭಾರತಕ್ಕೆ ಆರಂಭದಲ್ಲೇ ರಿಷಬ್ ಪಂತ್ (24) ವಿಕೆಟ್ ನಷ್ಟವಾಯಿತು. ಈ ಹಂತದಲ್ಲಿ ಜತೆಗೂಡಿದ ರವೀಂದ್ರ ಜಡೇಜಾ ಹಾಗೂ ಇಶಾಂತ್ ಶರ್ಮಾ ಎಂಟನೇ ವಿಕೆಟ್‌ಗೆ 60 ರನ್‌ಗಳ ಮಹತ್ವದ ಜತೆಯಾಟದಲ್ಲಿ ಭಾಗಿಯಾದರು.

ಈ ಹಂತದಲ್ಲಿ 19 ರನ್ ಗಳಿಸಿದ ಇಶಾಂತ್ ವಿಕೆಟ್ ಒಪ್ಪಿಸಿ ನಿರಾಸೆ ಅನುಭವಿಸಿದರು. ಮೊಹಮ್ಮದ್ ಶಮಿ (0) ಅವರಿಗೂ ಹೆಚ್ಚೇನು ಮಾಡಲಾಗಲಿಲ್ಲ.

ಅತ್ತ ಪ್ರತಿ ಹೋರಾಟ ನೀಡಿದ ಜಡೇಜಾ 58 ರನ್‌ಗಳ ಉಪಯುಕ್ತ ಇನ್ನಿಂಗ್ಸ್ ಕಟ್ಟಿ ಗಮನ ಸೆಳೆದರು. 112 ಎಸೆತಗಳ ಫೈಟ್ ಬ್ಯಾಕ್ ಇನ್ನಿಂಗ್ಸ್ ಕಟ್ಟಿದ ಜಡ್ಡು ಮಗದೊಮ್ಮೆ ತಾವೊಬ್ಬ ನೈಜ ಆಲ್‌ರೌಂಡರ್ ಎಂಬುದನ್ನು ಸಾಬೀತು ಮಾಡಿದರು.

ಇನ್ನುಳಿದಂತೆ ಜಸ್ಪ್ರೀತು ಬುಮ್ರಾ 4 ರನ್ ಗಳಿಸಿ ಅಜೇಯರಾಗುಳಿದರು. ವಿಂಡೀಸ್ ಪರ ಕೆಮರ್ ರೂಚ್ ನಾಲ್ಕು, ಶನಾನ್ ಗೇಬ್ರಿಯಲ್ ಮೂರು ಹಾಗೂ ರೋಸ್ಟನ್ ಚೇಸ್ ಎರಡು ವಿಕೆಟ್ ಕಿತ್ತು ಮಿಂಚಿದರು.

ಈ ಮೊದಲು ಮೊದಲ ದಿನದಾಟದಲ್ಲಿ ಅಜಿಂಕ್ಯ ರಹಾನೆ (81), ಕೆಎಲ್ ರಾಹುಲ್ (44) ಹಾಗೂ ಹನುಮ ವಿಹಾರಿ (32) ಉಪಯುಕ್ತ ಇನ್ನಿಂಗ್ಸ್ ಕಟ್ಟುವ ಮೂಲಕ ಭಾರತವನ್ನು ಅಪಾಯದಿಂದ ಪಾರು ಮಾಡಿದ್ದರು.