5 ವರ್ಷ ಕಾಯುವಿಕೆಯ ಬಳಿಕ ಡೆಬ್ಯು; ಪ್ರಥಮ ಎಸೆತವನ್ನೇ ಸಿಕ್ಸರ್‌ಗಟ್ಟಿದ ಲಾಡ್

ಮುಂಬಯಿ: ಇಂಡಿಯನ್ ಪ್ರೀಮಿಯರ್ ಲೀಗ್ ಟ್ವೆಂಟಿ-20 ಕ್ರಿಕೆಟ್ ಚಾಂಪಿಯನ್‌ಶಿಪ್‌ಗೆ ಭರ್ತಿ ಐದು ವರ್ಷಗಳ ಕಾಯುವಿಕೆಯ ಬಳಿಕ ಯುವ ಪ್ರತಿಭಾವಂತ ಬ್ಯಾಟ್ಸ್‌ಮನ್ ಸಿದ್ದೇಶ್ ಲಾಡ್ ಭರ್ಜರಿ ಡೆಬ್ಯು ಮಾಡಿದ್ದಾರೆ.

ಅಲ್ಲದೆ ಐಪಿಎಲ್‌ನಲ್ಲಿ ತಾವು ಎದುರಿಸಿದ ಮೊದಲ ಎಸೆತವನ್ನೇ ಸಿಕ್ಸರ್‌ಗಟ್ಟುವ ಮೂಲಕ ತಾಕತ್ತನ್ನು ಮೆರೆದಿದ್ದಾರೆ. ಅಷ್ಟೇ ಯಾಕೆ ಎರಡನೇ ಎಸೆತವನ್ನು ಸಿದ್ದೇಶ್ ಬೌಂಡರಿಗಟ್ಟುವ ಮೂಲಕ ಅಬ್ಬರಿಸಿದ್ದರು.

ಕಳೆದೈದು ಆವೃತ್ತಿಗಳಲ್ಲಿ ಮುಂಬೈ ಇಂಡಿಯನ್ಸ್ ಕ್ಯಾಂಪ್‌ನಲ್ಲಿದ್ದ ಸಿದ್ದೇಶ್ ಕೊನೆಗೂ ರೋಹಿತ್ ಶರ್ಮಾ ಗಾಯಗೊಂಡ ಹಿನ್ನಲೆಯಲ್ಲಿ ನಾಯಕನ ಸ್ಥಾನ ತುಂಬಲು ತಂಡವನ್ನು ಸೇರಿಕೊಂಡಿದ್ದರು. ಅಲ್ಲದೆ ಆರಂಭಿಕನಾಗಿಯೂ ಕ್ರೀಸಿಗಿಳಿದಿದ್ದರು.

ನಾನು ಕಳೆದು ಹೋಗಿರುವುದರ ಬಗ್ಗೆ ಚಿಂತಿಸುವುದಿಲ್ಲ. ನಾನೀಗ ಮುಂಬೈ ಪರ ಉತ್ತಮ ಪ್ರದರ್ಶನ ನೀಡುವುದನ್ನು ಎದುರು ನೋಡುತ್ತಿದ್ದೇನೆ ಎಂದು ಸಿದ್ದೇಶ್ ನುಡಿದಿದ್ದಾರೆ.

ಸ್ಥಳೀಯ ಹೀರೊ ಕೂಡಾ ಆಗಿರುವ 26ರ ಹರೆಯದ ಸಿದ್ದೇಶ್ ಮುಂಬೈ ಪರ ದೇಶೀಯ ಕ್ರಿಕೆಟ್‌ನಲ್ಲಿ ಗಮನಾರ್ಹ ಪ್ರದರ್ಶನ ನೀಡಿದ್ದಾರೆ. ಇದೀಗ ಐಪಿಎಲ್‌ನಲ್ಲಿ ಎದುರಿಸಿದ ಪ್ರಥಮ ಎಸೆತವನ್ನೇ ಸಿಕ್ಸರ್‌ಗಟ್ಟುವ ಮೂಲಕ ರನ್ ದಾಹವನ್ನು ತೀರಿಸಿಕೊಂಡಿದ್ದಾರೆ.