ಅನುಷ್ಕಾ ಬರ್ತ್‌ಡೇ ದಿನ ಟ್ರೋಲ್; ಪತ್ನಿಗಾಗಿ ಪಂದ್ಯ ಗೆಲ್ಲಿಸುತ್ತಾರೆಯೇ ವಿರಾಟ್?

ಬೆಂಗಳೂರು: ಇಂಡಿಯನ್ ಪ್ರೀಮಿಯರ್ ಲೀಗ್ ಟ್ವೆಂಟಿ-20 ಕ್ರಿಕೆಟ್ ಚಾಂಪಿಯನ್‌ಶಿಪ್‌ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಕಳಪೆ ಪ್ರದರ್ಶನಕ್ಕೆ ಅನುಷ್ಕಾ ಶರ್ಮಾ ಕಾರಣ ಎಂಬ ಆರೋಪ ಜೋರಾಗಿ ಕೇಳಿ ಬರುತ್ತಿದೆ. ಈ ಬಗ್ಗೆ ಅನುಷ್ಕಾ ಬರ್ತ್ ಡೇ ದಿನವಾದ ಇಂದೇ (ಮೇ 1) ಸಾಕಷ್ಟು ಟ್ರೋಲ್‌ಗಳು ಹರಿದಾಡುತ್ತಿದೆ.

ಈ ಹಿಂದೆ ಟೀಮ್ ಇಂಡಿಯಾ ಸೋಲು ಅನುಭವಿಸಿದಾಗಲೂ ಅನುಷ್ಕಾ ವಿರುದ್ಧ ಟ್ರೋಲ್ ಮಾಡಲಾಗುತ್ತಿತ್ತು. ಇದರ ವಿರುದ್ಧ ಭಾರತೀಯ ಕ್ರಿಕೆಟ್ ತಂಡದ ನಾಯಕ ವಿರಾಟ್ ಕೊಹ್ಲಿ ಸಿಡಿದೆದ್ದಿದ್ದರು.

ಇದೀಗ ಆರ್‌ಸಿಬಿ ಪ್ರತಿ ಪಂದ್ಯದಲ್ಲೂ ಪತಿ ವಿರಾಟ್ ಅವರನ್ನು ಹುರಿದುಂಬಿಸಲು ಅನುಷ್ಕಾ ಸ್ಟೇಡಿಯಂಗೆ ಆಗಮಿಸುತ್ತಿದ್ದಾರೆ. ಆದರೆ ಆರ್‌ಸಿಬಿಗೆ ಬೇಕಾದ ಜಯದ ಫಲಿತಾಂಶ ಮಾತ್ರ ಸಿಗುತ್ತಿಲ್ಲ.

ಇದರಿಂದ ಆರ್‌ಸಿಬಿ ಸೋಲಿಗೆ ಅನುಷ್ಕಾ ಕಾರಣ ಎಂಬ ಟ್ರೋಲ್‌ಗಳು ಹರಿದಾಡುತ್ತಿದೆ. 30ನೇ ಹುಟ್ಟುಹಬ್ಬವನ್ನು ಆಚರಿಸಿಕೊಳ್ಳುತ್ತಿರುವ ಅನುಷ್ಕಾ ಬರ್ತ್ ಡೇ ದಿನದಂದೇ ಸಾಕಷ್ಟು ಟೀಕೆಗಳು ಎದುರಾಗಿದೆ.

ಅಷ್ಟಕ್ಕೂ ರೋಹಿತ್ ಶರ್ಮಾ ತರಹನೇ ಪತ್ನಿ ಅನುಷ್ಕಾಳಿಗಾಗಿ ವಿರಾಟ್ ಪಂದ್ಯ ಗೆಲ್ಲಿಸಿ ಕೊಡುತ್ತಾರೆಯೇ ಎಂಬುದನ್ನು ಕಾದು ನೋಡಬೇಕಿದೆ. ಈ ಮೂಲಕ ಟೀಕಾಕಾರರ ಬಾಯಿ ಮುಚ್ಚಿಸಬಹುದಾಗಿದೆ.

ಕಾರ್ಮಿಕರ ದಿನವಾದ ಇಂದು ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆಯಲಿರುವ ಪಂದ್ಯದಲ್ಲಿ ಮುಂಬಯಿ ಇಂಡಿಯನ್ಸ್ ಸವಾಲನ್ನು ಎದುರಿಸಲಿದೆ.