ಬ್ರಾವೋ ಓವರ್‌ನಲ್ಲಿ 29 ರನ್ ಚಚ್ಚಿದ ಪಾಂಡ್ಯ-ಪೊಲಾರ್ಡ್

ಮುಂಬಯಿ: ಇಂಡಿಯನ್ ಪ್ರೀಮಿಯರ್ ಲೀಗ್ ಟ್ವೆಂಟಿ-20 ಕ್ರಿಕೆಟ್ ಚಾಂಪಿಯನ್‌ಶಿಪ್‌ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಡೆತ್ ಬೌಲರ್ ಸ್ಪೆಷಲಿಷ್ಟ್ ಎಂದೇ ಡ್ವೇನ್ ಬ್ರಾವೋರನ್ನು ವಿಶ್ಲೇಷಿಸಲಾಗುತ್ತಿದೆ.

ಇದೇ ಕಾರಣಕ್ಕಾಗಿ ನಾಯಕ ಮಹೇಂದ್ರ ಸಿಂಗ್ ಧೋನಿ ಕೂಡಾ ಅತಿ ಹೆಚ್ಚು ನೆಚ್ಚಿಕೊಂಡಿದ್ದಾರೆ. ಡೆತ್ ಓವರ್‌ಗಳಲ್ಲಿ ಬ್ರಾವೋ ಅತಿ ಹೆಚ್ಚು ಯಶಸ್ಸನ್ನು ತಂದುಕೊಟ್ಟಿದ್ದಾರೆ.

ಮುಂಬಯಿನ ವಾಂಖೆಡೆ ಮೈದಾನದಲ್ಲಿ ನಡೆದ ಪಂದ್ಯದಲ್ಲೂ ಬ್ರಾವೋ ಅವರಿಗೆ 12ನೇ ಓವರ್‌ ಬಳಿಕ ಕಣಕ್ಕಿಳಿಸಲಾಗಿತ್ತು. ಆದರೆ ಈ ಬಾರಿ ಧೋನಿ ಯೋಜನೆ ನಡೆಯಲಿಲ್ಲ.

ಬ್ರಾವೋ ಎಸೆದ ಇನ್ನಿಂಗ್ಸ್‌ನ ಕೊನೆಯ ಓವರ್‌ನಲ್ಲಿ ಹಾರ್ದಿಕ್ ಪಾಂಡ್ಯ ಹಾಗೂ ಕೀರಾನ್ ಪೊಲಾರ್ಡ್ 29 ರನ್ ಚಚ್ಚಿದರು. ಈ ಮೂಲಕ ಸವಾಲಿನ ಮೊತ್ತ ಪೇರಿಸಲು ನೆರವಾದರು.

ಪೊಲಾರ್ಡ್ ಒಂದು ಸಿಕ್ಸರ್ ಬಾರಿಸಿದರೆ ಪಾಂಡ್ಯ ಎರಡು ಸಿಕ್ಸ್ ಹಾಗೂ ಬೌಂಡರಿಯನ್ನು ಚಚ್ಚಿದರು. ಈ ಮೂಲಕ ಬ್ರಾವೋರನ್ನು ಸದ್ದಡಗಿಸಿದರು.