Hardik Pandya: ಮುಂಬೈ ಕ್ಯಾಂಪ್ ಸೇರಿದ ಪಾಂಡ್ಯ

ಮುಂಬಯಿ: ಗಾಯದ ಸಮಸ್ಯೆಯಿಂದಾಗಿ ಆಸ್ಟ್ರೇಲಿಯಾ ವಿರುದ್ಧದ ಏಕದಿನ ಸರಣಿಯಿಂದ ಆಲ್‌ರೌಂಡರ್ ಹಾರ್ದಿಕ್ ಪಾಂಡ್ಯ ಹೊರಗುಳಿದಿದ್ದರು. ತದಾ ಬಳಿಕ ಬೆಂಗಳೂರಿನ ರಾಷ್ಟ್ರೀಯ ಕ್ರಿಕೆಟ್ ಅಕಾಡೆಮಿಯಲ್ಲಿ ಪುನಶ್ಚೇತನ ಶಿಬಿರದಲ್ಲಿ ಭಾಗವಹಿಸಿದ್ದರು.

ಇದೀಗ ಫಿಟ್ನೆಸ್ ಮಟ್ಟವನ್ನು ಪಡೆಯುತ್ತಿರುವ ಪಾಂಡ್ಯ, ಮುಂಬರುವ ಐಪಿಎಲ್‌ಗಾಗಿ ಮುಂಬೈ ಇಂಡಿಯನ್ಸ್ ಕ್ಯಾಪ್ ಸೇರಿಕೊಂಡಿದ್ದಾರೆ.

ಮುಂಬೈನಲ್ಲಿ ನಡೆಯುತ್ತಿರುವ ಪೂರ್ವಭಾವಿ ತರಬೇತಿ ಶಿಬಿರವನ್ನು ಪಾಂಡ್ಯ ಸೇರಿಕೊಂಡಿದ್ದಾರೆ. ಅಲ್ಲದೆ ಐಪಿಎಲ್‌ ಆರಂಭದಿಂದಲೇ ತಂಡಕ್ಕೆ ಲಭ್ಯರಾಗುವ ನಿರೀಕ್ಷೆಯನ್ನು ಹೊಂದಿದ್ದಾರೆ.

ಮುಂಬರುವ ಏಕದಿನ ವಿಶ್ವಕಪ್ ಹಿನ್ನಲೆಯಲ್ಲಿ ಪಾಂಡ್ಯ ಫಾರ್ಮ್‌ಗೆ ಮರಳಬೇಕಾಗಿರುವುದು ಅತಿ ಅಗತ್ಯವೆನಿಸಿದೆ. ಕಾಫಿ ವಿತ್ ಕರಣ್ ವಿವಾದದ ಬಳಿಕ ತಾತ್ಕಾಲಿಕ ನಿಷೇಧವನ್ನು ಎದುರಿಸಿರುವ ಪಾಂಡ್ಯ ಕಳೆದ ಆಸ್ಟ್ರೇಲಿಯಾ ಪ್ರವಾಸದ ವೇಳೆ ಸೀಮಿತ ಓವರ್‌ಗಳ ಸರಣಿಯಲ್ಲಿ ಭಾಗವಹಿಸಿದ್ದರು.

ಐಪಿಎಲ್ 2019ನೇ ಆವೃತ್ತಿಯಲ್ಲೂ ಮುಂಬೈ ತಂಡವನ್ನು ರೋಹಿತ್ ಶರ್ಮಾ ಮುನ್ನಡೆಸುತ್ತಿದ್ದಾರೆ. ಹಾರ್ದಿಕ್ ಜತೆಗೆ ಸಹೋದರ ಕೃುಣಾಲ್ ಪಾಂಡ್ಯ ಸಹ ಆಲ್‌ರೌಂಡರ್ ಪಾತ್ರವನ್ನು ನಿಭಾಯಿಸಲಿದ್ದಾರೆ.

ಪಾಂಡ್ಯ ವಿಶ್ವಕಪ್ ತಂಡದಲ್ಲಿ ಗುರುತಿಸಿಕೊಂಡರೆ ಭಾರತಕ್ಕೆ ಹೆಚ್ಚಿನ ಸಮತೋಲನವು ಸಿಗಲಿದೆ. ಈ ಹಿನ್ನಲೆಯಲ್ಲಿ ಫಿಟ್ನೆಸ್ ಜತೆಗೆ ಫಾರ್ಮ್‌ಗೆ ಮರಳುವ ಗುರಿಯಿರಿಸಿಕೊಂಡಿದ್ದಾರೆ.