ಹಿಟ್‌ಮ್ಯಾನ್‌ಗೆ ಬರ್ತ್‌ಡೇ ಸಂಭ್ರಮ

ಹೊಸದಿಲ್ಲಿ: ಭಾರತ ಕ್ರಿಕೆಟ್ ತಂಡದ ಉಪನಾಯಕ ಹಾಗೂ ಇಂಡಿಯನ್ ಪ್ರೀಮಿಯರ್ ಲೀಗ್ ಟ್ವೆಂಟಿ-20 ಚಾಂಪಿಯನ್‌‌ಶಿಪ್‌ನಲ್ಲಿ ಮುಂಬೈ ಇಂಡಿಯನ್ಸ್ ತಂಡವನ್ನು ಮುನ್ನಡೆಸುತ್ತಿರುವ ಬಲಗೈ ಆರಂಭಿಕ ಬ್ಯಾಟ್ಸ್‌ಮನ್ ರೋಹಿತ್ ಶರ್ಮಾ ಮಂಗಳವಾರದಂದು 32ನೇ ವರ್ಷಕ್ಕೆ ಕಾಲಿರಿಸಿದ್ದಾರೆ.

ಇದರೊಂದಿಗೆ ಹಿಟ್‌ಮ್ಯಾನ್ ಖ್ಯಾತಿಯ ರೋಹಿತ್ ಶರ್ಮಾಗೆ ಹುಟ್ಟುಹಬ್ಬದ ಶುಭಾಶಯಗಳ ಮಹಾಪೂರವೇ ಹರಿದು ಬಂದಿದೆ.

ಏಕದಿನ ಕ್ರಿಕೆಟ್‌ನಲ್ಲಿ ಮೂರು ಬಾರಿ ಡಬಲ್ ಸೆಂಚುರಿ ಬಾರಿಸಿರುವ ವಿಶ್ವದ ಏಕಮಾತ್ರ ಬ್ಯಾಟ್ಸ್‌ಮನ್ ರೋಹಿತ್ ಆಗಿದ್ದಾರೆ. ಅಲ್ಲದೆ ವೈಯಕ್ತಿಕ ಗರಿಷ್ಠ ಮೊತ್ತವೂ ರೋಹಿತ್ (264) ಹೆಸರಲ್ಲಿದೆ.

ಅಷ್ಟೇ ಯಾಕೆ ಐಪಿಎಲ್‌ನಲ್ಲಿ ಮುಂಬೈಗೆ ಮೂರು ಬಾರಿ ಕಿರೀಟ ನೀಡಿರುವ ದಾಖಲೆಯೂ ರೋಹಿತ್‌ಗೆ ಸೇರುತ್ತದೆ.

ಹಾಗೆಯೇ ಟ್ವೆಂಟಿ-20 ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ನಾಲ್ಕು ಶತಕ ಬಾರಿಸಿರುವ ಮೊದಲ ಬ್ಯಾಟ್ಸ್‌ಮನ್ ಕೂಡಾ ಆಗಿದ್ದಾರೆ. ಆದರೆ ಸೀಮಿತ ಓವರ್‌ಗಳ ಕ್ರಿಕೆಟ್‌ಗೆ ಹೋಲಿಸಿದರೆ ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಅಷ್ಟೇನು ಸದ್ದು ಮಾಡಲಿಲ್ಲ.

ಐಪಿಎಲ್ ಬಳಿಕ ಮುಂಬರುವ ಏಕದಿನ ವಿಶ್ವಕಪ್ ರೋಹಿತ್ ಪಾಲಿಗೆ ಅತಿ ನಿರ್ಣಾಯಕವೆನಿಸಲಿದೆ.