ಚೆನ್ನೈ ಕ್ವಾಲಿಫೈಯರ್ 1; ಪಂಜಾಬ್‌ಗೆ ಮುಚ್ಚಿದ ಬಾಗಿಲು!

ಮೊಹಾಲಿ: ಇಂಡಿಯನ್ ಪ್ರೀಮಿಯರ್ ಲೀಗ್ 2019ನೇ ಸಾಲಿನ ಟ್ವೆಂಟಿ-20 ಕ್ರಿಕೆಟ್ ಚಾಂಪಿಯನ್‌ಶಿಪ್‌ನಲ್ಲಿ ಭಾನುವಾರ ಕಿಂಗ್ಸ್ ಇಲೆವೆನ್ ಪಂಜಾಬ್ ವಿರುದ್ಧ ನಡೆದ ಅಂತಿಮ ಲೀಗ್ ಪಂದ್ಯದಲ್ಲಿ ಸೋತಿರುವ ಹೊರತಾಗಿಯೂ ಚೆನ್ನೈ ಸೂಪರ್ ಕಿಂಗ್ಸ್ ತಂಡವು ಅಂಕಪಟ್ಟಿಯಲ್ಲಿ ಅಗ್ರಸ್ಥಾನವನ್ನು ಭದ್ರಪಡಿಸುವ ಮೂಲಕ ಕ್ವಾಲಿಫೈಯರ್ 1 ಸ್ಥಾನವನ್ನು ಖಚಿತಪಡಿಸಿದೆ.

ಸದ್ಯ ಆಡಿರುವ 14 ಪಂದ್ಯಗಳಲ್ಲಿ ಒಂಬತ್ತು ಗೆಲುವುಗಳೊಂದಿಗೆ 18 ಅಂಕ ಸಂಪಾದಿಸಿರುವ ಚೆನ್ನೈ ಅಗ್ರಸ್ಥಾನದಲ್ಲಿದೆ. ಅಲ್ಲದೆ ಎರಡನೇ ಸ್ಥಾನದಲ್ಲಿರುವ ಡೆಲ್ಲಿ ಕ್ಯಾಪಿಟಲ್ಸ್‌ಗಿಂತಲೂ ಉತ್ತಮ ರನ್‌ರೇಟ್ ಕಾಯ್ದುಕೊಂಡಿದೆ.

ಹಾಗೊಂದು ವೇಳೆ ಕೋಲ್ಕೊತಾ ನೈಟ್ ರೈಡರ್ಸ್ ವಿರುದ್ಧ ನಡೆಯುತ್ತಿರುವ ಕೊನೆಯ ಪಂದ್ಯದಲ್ಲಿ ಗೆದ್ದು ಮುಂಬೈ ಇಂಡಿಯನ್ಸ್ ಅಗ್ರ ಸ್ಥಾನಗೇರಿದರೂ ಚೆನ್ನೈ ಎರಡನೇ ಸ್ಥಾನವನ್ನು ಉಳಿಸಿಕೊಳ್ಳಲಿದೆ.

ಅಂದರೆ ಫೈನಲ್ ತಲುಪಲು ಎರಡು ಅವಕಾಶಗಳನ್ನು ಪಡೆಯಲಿದೆ. ಇನ್ನು ಕೆಕೆಆರ್ ವಿರುದ್ಧ ಸೋತರೆ ಮುಂಬೈ ಮೂರನೇ ಸ್ಥಾನದಲ್ಲೇ ಉಳಿದುಕೊಳ್ಳಲಿದೆ. ಅಂತಹ ಪರಿಸ್ಥಿತಿಯಲ್ಲಿ ಮೊದಲ ಕ್ವಾಲಿಫೈಯರ್‌ನಲ್ಲಿ ಚೆನ್ನೈ ಹಾಗೂ ಡೆಲ್ಲಿ ತಂಡಗಳು ಪರಸ್ಪರ ಮುಖಾಮುಖಿಯಾಗಲಿದೆ.

ಒಟ್ಟಿನಲ್ಲಿ ಮೂರು ಬಾರಿಯ ಐಪಿಎಲ್ ಚಾಂಪಿಯನ್ ಚೆನ್ನೈ ಸೂಪರ್ ಕಿಂಗ್ಸ್‌ಗೆ ಮಗದೊಮ್ಮೆ ಫೈನಲ್‌ಗೇರುವ ಸುವರ್ಣಾವಕಾಶವೊದಗಿ ಬಂದಿದೆ.

ಇನ್ನೊಂದೆಡೆ ಚೆನ್ನೈ ವಿರುದ್ಧ ಗೆದ್ದರೂ ಸನ್‌ರೈಸರ್ಸ್‌ಗಿಂತಲೂ ಕಳಪೆ ರನ್‌ರೇಟ್ ಹೊಂದಿರುವ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡವು ಕೂಟದಿಂದಲೇ ಹೊರಬಿದ್ದಿದೆ. ಈ ಮೂಲಕ ರಾಯಲ್ ಚಾಲೆಂಜರ್ಸ್ ಬೆಂಗಳೂರು, ರಾಜಸ್ಥಾನ್ ರಾಯಲ್ಸ್ ಬಳಿಕ ಹೊರಬಿದ್ದಿರುವ ಮೂರನೇ ತಂಡವೆಂಬ ಅವಮಾನಕ್ಕೊಳಾಗಾಗಿದೆ.

ಕ್ವಾಲಿಫೈಯರ್ ಪಂದ್ಯಗಳ ವೇಳಾಪಟ್ಟಿ ಇಂತಿದೆ:

ಮೇ 7, ಮಂಗಳವಾರ, ಕ್ವಾಲಿಫೈಯರ್ 1: ಚೆನ್ನೈ vs ಡೆಲ್ಲಿ ಅಥವಾ ಮುಂಬೈ, ತಾಣ: ಚೆನ್ನೈ
ಮೇ 8, ಬುಧವಾರ: ಎಲಿಮಿನೇಟರ್ (ಮುಂಬೈ ಅಥವಾ ಡೆಲ್ಲಿ vs ಹೈದರಾಬಾದ್ ಅಥವಾ ಕೋಲ್ಕೊತಾ) ತಾಣ: ವಿಶಾಖಪಟ್ಟಣ
ಮೇ 10, ಶುಕ್ರವಾರ: ಕ್ವಾಲಿಫೈಯರ್ 2, ತಾಣ: ವಿಶಾಖಪಟ್ಟಣ
ಮೇ 12, ಭಾನುವಾರ: ಫೈನಲ್, ತಾಣ: ಹೈದರಾಬಾದ್

ಪಂದ್ಯ 55 ವೇಳೆಗೆ ಅಂಕಪಟ್ಟಿ ಇಂತಿದೆ: