ಮುಗಿಯಿತು ಈ ಬಾರಿಯ ಐಪಿಎಲ್

ಬೆಂಗಳೂರು: 51 ದಿನಗಳ ಕಾಲ ಕಣ್ಣು ತಣಿಯುವಷ್ಟು ಮೈಮನ ದಣಿಯುವಷ್ಟು ಮನರಂಜನೆಯ ಹೂರಣವನ್ನೇ ಕಟ್ಟಿಕೊಟ್ಟ ಉತ್ಕೃಷ್ಟ ಚುಟುಕು ಕ್ರಿಕೆಟ್‌ ಲೀಗ್‌ ಐಪಿಎಲ್‌ಗೆ ತೆರೆಬಿದ್ದಿದೆ.

ಮಾರ್ಚ್‌ 23ರಂದು ಚೆನ್ನೈನ ಎಂ.ಎ.ಚಿದಂಬರಂ ಕ್ರೀಡಾಂಗಣದಲ್ಲಿ ಆರಂಭಗೊಂಡು ಮೇ 12ರಂದು ಹೈದರಾಬಾದ್‌ನ ರಾಜೀವ್‌ ಗಾಂಧಿ ಅಂತಾರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ಮುಕ್ತಾಯಗೊಳ್ಳುವ ತನಕದ ಸುದೀರ್ಘ ಕ್ರಿಕೆಟ್‌ ಯಾತ್ರೆಯಲ್ಲಿ ಆಡಿದ್ದು ಬರೋಬ್ಬರಿ 60 ಪಂದ್ಯಗಳು. ಸ್ಪರ್ಧೆಯಲ್ಲಿದ್ದಿದ್ದು 8 ತಂಡ. ಆದರೆ, ಚಾಂಪಿಯನ್‌ ಆಗಿದ್ದು ಮಾತ್ರ ಒಂದೇ ತಂಡ.

ರೋಹಿತ್‌ ಶರ್ಮಾ ಸಾರಥ್ಯದ ಮುಂಬಯಿ ಇಂಡಿಯನ್ಸ್‌ ತಂಡ ಭಾನುವಾರ ನಿರ್ಣಾಯಕ ಹಣಾಹಣಿಯಲ್ಲಿ ಮಹೇಂದ್ರ ಸಿಂಗ್‌ ಧೋನಿ ಸಾರಥ್ಯದ ಚೆನ್ನೈ ಸೂಪರ್‌ ಕಿಂಗ್ಸ್‌ ತಂಡವನ್ನು ಸೋಲಿಸಿ 4ನೇ ಬಾರಿಗೆ ಐಪಿಎಲ್‌ ಟ್ರೋಫಿಯ ಮೇಲೆ ತನ್ನ ಮುದ್ರೆಯೊತ್ತಿತು. ಇದರೊಂದಿಗೆ ಚೆನ್ನೈ ಬಳಗ ಮುಂಬಯಿ ಇಂಡಿಯನ್ಸ್‌ ವಿರುದ್ಧ ಹಾಲಿ ಆವೃತ್ತಿಯಲ್ಲಿ ಆಡಿದ ನಾಲ್ಕೂ ಪಂದ್ಯಗಳಲ್ಲಿ ಸೋತಂತಾಯಿತು. ಫೈನಲ್‌ನಲ್ಲಿ ಸೋಲುವುದಕ್ಕೂ ಮೊದಲು ಧೋನಿ ಪಡೆ ಲೀಗ್‌ ಹಂತದಲ್ಲಿ 2 ಬಾರಿ ಹಾಗೂ ಕ್ವಾಲಿಫೈಯರ್‌-1ರಲ್ಲಿ ರೋಹಿತ್‌ ಬಳಗದ ಎದುರು ಮಂಡಿಯೂರಿತ್ತು.

ಪ್ರತಿ ಆವೃತ್ತಿಯಂತೆ ಹಾಲಿ ಆವೃತ್ತಿಯಲ್ಲೂ ಹತ್ತುಹಲವು ದಾಖಲೆಗಳು ಮೆರವಣಿಗೆ ನಡೆಸಿದವು. ಬ್ಯಾಟ್ಸ್‌ಮನ್‌ಗಳು ಬೌಂಡರಿ-ಸಿಕ್ಸರ್‌ಗಳ ಚಿತ್ತಾರ ಬಿಡಿಸಿದರು. ಬೌಲರ್‌ಗಳು ವಿಕೆಟ್‌ಗಳ ತೋರಣ ಕಟ್ಟಿದರು. ಸಿಕ್ಸರ್‌ ಸಿಡಿಸುವುದರಲ್ಲೂ ದಾಖಲೆ, ವಿಕೆಟ್‌ ಪಡೆಯುವುದರಲ್ಲೂ ದಾಖಲೆ. ಹೆಚ್ಚಿನೆಲ್ಲ ಪಂದ್ಯಗಳ ಫಲಿತಾಂಶಗಳು ಕೊನೆಯ ಓವರ್‌ನಲ್ಲಿ ನಿರ್ಧಾರವಾದವು. ಕೆಲವು ಪಂದ್ಯಗಳು ಕೊನೆಯ ಎಸೆತದಲ್ಲಿ ನಿರ್ಧರಿಸಲ್ಪಟ್ಟವು. 2 ಪಂದ್ಯಗಳ ಫಲಿತಾಂಶಕ್ಕಾಗಿ ಸೂಪರ್‌ ಓವರ್‌ ಕೂಡ ಆಡಿಸಲಾಯಿತು.

51 ದಿನಗಳ ಕಾಲ ಕುಂತಲ್ಲಿ, ನಿಂತಲ್ಲಿ ಐಪಿಎಲ್‌ನದ್ದೇ ಮಾತು. ಎಲ್ಲಿ ಹೋದರೂ ಯಾರು ಟಾಸ್‌ ವಿನ್‌? ಯಾರು ಫಸ್ಟ್‌ ಬ್ಯಾಟಿಂಗ್‌? ಸ್ಕೋರ್‌ ಎಷ್ಟಂತೆ?

ಊಟ, ತಿಂಡಿ ಆ ಮೇಲೆ, ಮ್ಯಾಚ್‌ ಮೊದಲು. ಅಂದಹಾಗೆ ಈ ಬಾರಿ ಐಪಿಎಲ್‌ನಲ್ಲಿ ಸ್ವಿಗ್ಗಿ ವಹಿವಾಟು ಕೂಡ ಸುಗ್ಗಿ. ಶೇ.30ರಷ್ಟು ಬಿಸ್ನೆಸ್‌ ಜಾಸ್ತಿಯಾಗಿದೆಯಂತೆ. ಈ ಬಾರಿ ಲೋಕಸಭೆ ಚುನಾವಣೆ ನಡುವೆಯೇ ಸುಸೂತ್ರವಾಗಿ ಐಪಿಎಲ್‌ ಆಯೋಜಿಸಿದ ಕೀರ್ತಿ ಬಿಸಿಸಿಐ ಧಣಿಗಳಿಗೆ ಸಲ್ಲಬೇಕು.