ಕೊನೆಯ ಪಂದ್ಯದಲ್ಲಿ ಗೆದ್ದಿತೇ ಆರ್‌ಸಿಬಿ?

ಬೆಂಗಳೂರು: ಮನೆಯಂಗಣ ಎಂ.ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಗೆಲುವಿನ ಖುಷಿಯೊಂದಿಗೆ ಈ ಋುತುವಿನ ಹೋರಾಟ ಕೊನೆಗೊಳಿಸಲು ಎದುರು ನೋಡುತ್ತಿರುವ ರಾಯಲ್‌ ಚಾಲೆಂಜರ್ಸ್‌ ಬೆಂಗಳೂರು ತಂಡದ ವಿರುದ್ಧ ಶನಿವಾರ ಕಣಕ್ಕಿಳಿಯುತ್ತಿರುವ ಸನ್‌ರೈಸರ್ಸ್‌ ಹೈದರಾಬಾದ್‌ ತಂಡ, ಪ್ಲೇಆಫ್‌ ನಿರೀಕ್ಷೆಯೊಂದಿಗೆ ತನ್ನ ಕೊನೇ ಲೀಗ್‌ ಪಂದ್ಯಕ್ಕೆ ಸಜ್ಜುಗೊಂಡಿದೆ.

13 ಪಂದ್ಯಗಳಲ್ಲಿ ಕೇವಲ 9 ಅಂಕಗಳನ್ನು ಕಲೆಹಾಕಲಷ್ಟೇ ಶಕ್ತಗೊಂಡು ಈಗಾಗಲೇ ನಾಕೌಟ್‌ ಹಂತದಿಂದ ಹೊರಬಿದ್ದಿರುವ ವಿರಾಟ್‌ ಕೊಹ್ಲಿ ಸಾರಥ್ಯದ ಆರ್‌ಸಿಬಿ, ಗೌರವದೊಂದಿಗೆ ಹೋರಾಟ ಮುಗಿಸಲು ಹಾತೊರೆಯುತ್ತಿದೆ. ಇನ್ನೊಂದೆಡೆ ಸೂಪರ್‌ ಓವರ್‌ ಮೂಲಕ ಮುಂಬಯಿ ಇಂಡಿಯನ್ಸ್‌ ವಿರುದ್ಧ ಸೋತಿರುವ ಹೈದರಾಬಾದ್‌ ತಂಡ, ತನ್ನ ಪ್ಲೇಆಫ್‌ ಹಾದಿಯನ್ನು ದುರ್ಗಮ ಮಾಡಿಕೊಂಡಿದೆ. ಆದರೂ ಆರ್‌ಸಿಬಿ ವಿರುದ್ಧ ಗೆದ್ದು 2 ಅಂಕ ಗಳಿಸಿದರೆ, ಒಟ್ಟು 14 ಅಂಕಗಳೊಂದಿಗೆ ನಾಲ್ಕನೇ ಸ್ಥಾನಿಯಾಗಿ ನಾಕೌಟ್‌ ಪ್ರವೇಶಿಸುವ ಅವಕಾಶ ಸನ್‌ರೈಸರ್ಸ್‌ ತಂಡದ ಮುಂದಿದೆ.

ಗುರುವಾರ ಮುಂಬಯಿ ವಿರುದ್ಧ ಸೋತರೂ +0.653 ನೆಟ್‌ ರನ್‌ರೇಟ್‌ ಹೊಂದಿರುವ ಹೈದರಾಬಾದ್‌, ಪ್ಲೇಆಫ್‌ ಸ್ಪರ್ಧೆಯಲ್ಲಿರುವ ಇತರ ಮೂರು ತಂಡಗಳಿಗಿಂತ ಉತ್ತಮ ಸ್ಥಿತಿಯಲ್ಲಿದೆ. ಒಂದು ವೇಳೆ ತನ್ನ ಕೊನೇ ಲೀಗ್‌ ಪಂದ್ಯದಲ್ಲಿ ಹೈದರಾಬಾದ್‌ ಸೋತರೂ ನಾಕೌಟ್‌ ಪ್ರವೇಶಿಸುವ ಮತ್ತೊಂದು ಅವಕಾಶವಿದೆ. ಇದಕ್ಕೆ ಕೆಕೆಆರ್‌ ಮತ್ತು ಪಂಜಾಬ್‌ ತಂಡಗಳು ತಮ್ಮ ಕೊನೆಯ ಎರಡು ಲೀಗ್‌ ಪಂದ್ಯಗಳ ಪೈಕಿ ಒಂದರಲ್ಲಿ ಸೋಲಬೇಕಿದೆ. ಇದೇ ವೇಳೆ, ರಾಜಸ್ಥಾನ್‌ ತಂಡವೂ ತನ್ನ ಕೊನೇ ಪಂದ್ಯದಲ್ಲಿ ಸೋಲಬೇಕು.