ಆರ್‌ಸಿಬಿಗೆ ಪ್ರತಿಷ್ಠೆಯ ಕದನ; ಸನ್‌ರೈಸರ್ಸ್‌ಗೆ ಪ್ಲೇ-ಆಫ್ ಕನಸು

ಬೆಂಗಳೂರು: ಇಂಡಿಯನ್ ಪ್ರೀಮಿಯರ್ ಲೀಗ್ 2019ನೇ ಟ್ವೆಂಟಿ-20 ಕ್ರಿಕೆಟ್ ಚಾಂಪಿಯನ್‌ಶಿಪ್‌ನಲ್ಲಿ ಶನಿವಾರ ನಡೆಯಲಿರುವ ತನ್ನ ಕೊನೆಯ ಲೀಗ್ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವು ಸನ್‌ರೈಸರ್ಸ್ ಹೈದರಾಬಾದ್ ಸವಾಲನ್ನು ಎದುರಿಸಲಿದೆ.

ಆಗಲೇ ಪ್ಲೇ-ಆಫ್ ರೇಸ್‌ನಿಂದ ಹೊರಬಿದ್ದಿರುವ ವಿರಾಟ್ ಕೊಹ್ಲಿ ಪಡೆಗೆ ತವರಿನ ಚಿನ್ನಸ್ವಾಮಿ ಮೈದಾನದಲ್ಲಿ ನಡೆಯಲಿರುವ ಪಂದ್ಯವು ಪ್ರತಿಷ್ಠೆಗಷ್ಟೇ ಸೀಮಿತವಾಗಿದೆ. ಅಲ್ಲದೆ ಕೊನೆಯ ಪಂದ್ಯದಲ್ಲಾದರೂ ಗೆದ್ದು ಅಭಿಮಾನಿಗಳಿಗೆ ಪರ್ಫೆಕ್ಟ್ ಗಿಫ್ಟ್ ಕೊಡುವ ಇರಾದೆಯಲ್ಲಿದೆ.

ಆಡಿರುವ 13 ಪಂದ್ಯಗಲ್ಲಿ ನಾಲ್ಕು ಗೆಲುವುಗಳನ್ನು ಮಾತ್ರ ಗಳಿಸಿರುವ ಆರ್‌ಸಿಬಿ ಒಂಬತ್ತು ಅಂಕಗಳೊಂದಿಗೆ ಅಂಕಪಟ್ಟಿಯಲ್ಲಿ ಕೊನೆಯ ಸ್ಥಾನದಲ್ಲಿದೆ. ಒಂದು ಪಂದ್ಯ ಮಳೆಯಿಂದಾಗಿ ಡ್ರಾ ಫಲಿತಾಂಶದಲ್ಲಿ ಅಂತ್ಯಗೊಂಡಿತು.

ಅತ್ತ 13 ಪಂದ್ಯಗಳಲ್ಲಿ ಆರು ಗೆಲುವುಗಳೊಂದಿಗೆ 12 ಅಂಕಗಳನ್ನು ಸಂಪಾದಿಸಿರುವ ಹೈದಾರಾಬಾದ್ ಅಂಕಪಟ್ಟಿಯಲ್ಲಿ ನಾಲ್ಕನೇ ಸ್ಥಾನದಲ್ಲಿದೆ. ಅಲ್ಲದೆ ಪ್ಲೇ-ಆಫ್ ಪ್ರವೇಶಿಸಲು ಗೆಲ್ಲಲೇಬೇಕಾದ ಒತ್ತಡಕ್ಕೆ ಸಿಲುಕಿದೆ. ಹಾಗೊಂದು ವೇಳೆ ಆರ್‌ಸಿಬಿ ವಿರುದ್ಧದ ಕದನದಲ್ಲಿ ಮುಗ್ಗರಿಸಿದರೂ ಉತ್ತಮ ರನ್ ರೇಟ್ ಕಾಯ್ದುಕೊಂಡು ಇತರ ಫಲಿತಾಂಶಗಳು ಪೂರಕವಾದರೆ ಹೈದರಾಬಾದ್‌ಗೆ ಪ್ಲೇ-ಆಫ್ ತಲುಪಲು ಮಗದೊಂದು ಅವಕಾಶವಿರಲಿದೆ. ಆದರೆ ಇದ್ಯಾವ ಲೆಕ್ಕಾಚಾರಗಳನ್ನು ಇಷ್ಟಪಡದ ಸನ್‌ರೈಸರ್ಸ್ ನೇರವಾಗಿ ಆರ್‌ಸಿಬಿ ವಿರುದ್ಧ ಗೆದ್ದು ಪ್ಲೇ-ಆಫ್ ಪ್ರವೇಶವನ್ನು ಬುಕ್ ಮಾಡುವ ಇರಾದೆಯಲ್ಲಿದೆ. ಆಗಲೂ ಉತ್ತಮ ರನ್-ರೇಟ್ ಕಾಯ್ದುಕೊಳ್ಳಬೇಕಾಗಿರುವುದು ಅಗತ್ಯ.

ವಿರುದ್ಧ ತಂಡದಲ್ಲಿದ್ದರೂ ಅಮೋಘ ಫಾರ್ಮ್‌ನಲ್ಲಿರುವ ಕರ್ನಾಟಕದ ಮನೀಶ್ ಪಾಂಡೆ ಬೆಂಗಳೂರಿನಲ್ಲೂ ರಂಗೇರಿಸುವ ಇರಾದೆಯಲ್ಲಿದ್ದಾರೆ.

ಅತ್ತ ಬೆಂಗಳೂರು ತಂಡದಲ್ಲಿ ನಾಯಕ ವಿರಾಟ್ ಕೊಹ್ಲಿ ಹಾಗೂ ಎಬಿ ಡಿ ವಿಲಿಯರ್ಸ್ ಅಭಿಮಾನಿಗಳಿಗಾಗಿ ಕೊನೆಯ ಪಂದ್ಯದಲ್ಲಿ ಮಿಂಚುವ ಗುರಿಯನ್ನು ಹೊಂದಿದ್ದಾರೆ. ಒಟ್ಟಿನಲ್ಲಿ ಮಳೆಯಾಗದೇ ವಾತಾವರಣ ಶುಭ್ರಗೊಂಡರೆ ಮಗದೊಂದು ಹೈ ವೋಲ್ಟೇಜ್ ಕದನ ನಿರೀಕ್ಷೆ ಮಾಡಬಹುದಾಗಿದೆ.

ಪಂದ್ಯಾರಂಭ: ರಾತ್ರಿ 8 ಗಂಟೆಗೆ