ಐಪಿಎಲ್ 2020 ವೇಳಾಪಟ್ಟಿ ಇನ್ನು ಬಿಡುಗಡೆಯಾಗಿಲ್ಲವೇಕೆ?

ಬೆಂಗಳೂರು: ಬಹುನಿರೀಕ್ಷಿತ ಇಂಡಿಯನ್ ಪ್ರೀಮಿಯರ್ ಲೀಗ್ ಟ್ವೆಂಟಿ-20 ಕ್ರಿಕೆಟ್ ಟೂರ್ನಮೆಂಟ್ ಆರಂಭಕ್ಕಿನ್ನು ಕೇವಲ ಒಂದು ವರೆ ತಿಂಗಳುಗಳು ಮಾತ್ರ ಬಾಕಿ ಉಳಿದಿದೆ. ಆದರೆ ಇದುವರೆಗೆ ವೇಳಾಪಟ್ಟಿ ಬಿಡುಗಡೆಯಾಗಿಲ್ಲ.

ಐಪಿಎಲ್ 13ನೇ ಆವೃತ್ತಿಗಾಗಿ 2019ನೇ ಸಾಲಿನ ವರ್ಷಾಂತ್ಯದಲ್ಲಿ ಜಿದ್ದಾಜಿದ್ದಿನ ಹರಾಜು ಪ್ರಕ್ರಿಯೆ ನೆರವೇರಿತ್ತು. ಆದರೆ ಅಲ್ಲಿಂದ ಬಳಿಕ ಸರಿ ಸುಮಾರು ಎರಡು ತಿಂಗಳುಗಳೇ ಕಳೆದರೂ ವೇಳಾಪಟ್ಟಿ ಮಾತ್ರ ಹೊರಬಂದಿಲ್ಲ.

ಬಲ್ಲ ಮೂಲಗಳ ಪ್ರಕಾರ ಐಪಿಎಲ್ 2020 ಉದ್ಘಾಟನಾ ಪಂದ್ಯಕ್ಕೆ ಮುಂಬಯಿ ಆತಿಥ್ಯ ವಹಿಸಲಿದೆ. ಹಾಗೆಯೇ ಮೊದಲ ಪಂದ್ಯದಲ್ಲಿ ಹಾಲಿ ಚಾಂಪಿಯನ್ ಮುಂಬೈ ಇಂಡಿಯನ್ಸ್ ಹಾಗೂ ಚೆನ್ನೈ ಸೂಪರ್ ಕಿಂಗ್ಸ್ ಮುಖಾಮುಖಿಯಾಗಲಿದೆ.

ಪ್ರೇಮಿಗಳ ದಿನಾಚರಣೆಯಂದು ಹೊಸ ಲಾಂಛನದ ಉಡುಗೊರೆ ನೀಡಿದ ಆರ್‌ಸಿಬಿ

ಎಪ್ರಿಲ್ ಎರಡು ಹಾಗೂ ಮೂರನೇ ವಾರದಲ್ಲಿ ಕೆಲವೊಂದು ಸಮಾವೇಶ ಹಾಗೂ ಅಭಿಮಾನಗಳು ನಡೆಯಲಿರುವುದರಿಂದ ದಿಲ್ಲಿ ಹಾಗೂ ಕೋಲ್ಕತ್ತಾ ನಗರಗಳಲ್ಲಿ ಎವೇ ತಂಡಗಳಿಗೆ ವಸತಿ ಸಮಸ್ಯೆ ಕಾಡುತ್ತಿದೆ. ಇದರ ಜೊತೆಗೆ ರಾಜಸ್ಥಾನ ರಾಯಲ್ಸ್ ತಂಡವು ಕೆಲವೊಂದು ಪಂದ್ಯಗಳನ್ನು ಗುವಾಹಟಿಗೆ ಸ್ಥಳಾಂತರಿಸುವುದಕ್ಕೆ ಸಂಬಂಧಿಸಿದಂತೆ ಅನಿಶ್ಚಿತತೆ ಮೂಡಿಬಂದಿದೆ.

ಏಷ್ಯಾ ಇಲೆವೆನ್ ಹಾಗೂ ವಿಶ್ವ ಇಲೆವೆನ್ ನಡುವೆ ಮಾರ್ಚ್ 18 ಹಾಗೂ 21ರ ನಡುವೆ ಎರಡು ಪಂದ್ಯಗಳು ನಿಗದಿಯಾಗಿದೆ. ಈ ನಡುವೆ ಕೆಲವು ಸ್ಟಾರ್ ಆಟಗಾರರನ್ನು ಬಿಟ್ಟುಕೊಡುವುದಾಗಿ ಬಿಸಿಸಿಐ ಅಧ್ಯಕ್ಷ ಸೌರವ್ ಗಂಗೂಲಿ ಭರವಸೆ ನೀಡಿದ್ದರು. ಈ ಸಮಸ್ಯೆ ಕೂಡಾ ಬಗೆಹರಿಸಬೇಕಿದೆ. ಇದರಿಂದಾಗಿ ಐಸಿಸಿ ವೇಳಾಪಟ್ಟಿ ಸಂಬಂಧ ಡ್ರಾಫ್ಟ್ ರಚಿಸಲು ತಡವಾಗುತ್ತಿದೆ ಎಂಬುದು ತಿಳಿದು ಬಂದಿದೆ.

ಈ ಸಲ ಕಪ್ ಗೆಲ್ಲಿ, ವಿರಾಟ್ ಕೊಹ್ಲಿಗೆ ಸ್ವಾತಂತ್ರ್ಯ ನೀಡಿ: ಗುಡುಗಿದ ಮಲ್ಯ

ಮಗದೊಂದು ಮೂಲದ ಪ್ರಕಾರ ಐಪಿಎಲ್ ಫೈನಲ್ ಪಂದ್ಯವು ಮೇ 17ರಂದು ಮುಂಬಯಿನ ವಾಂಖೆಡೆ ಮೈದಾನದಲ್ಲಿ ನಡೆಯಲಿದೆ. ಆದರೆ ಇವೆಲ್ಲದಕ್ಕೂ ಸಂಬಂಧಪಟ್ಟಂತೆ ಬಿಸಿಸಿಐ ಅಧಿಕೃತ ಪ್ರಕಟಣೆ ಇನ್ನಷ್ಟೇ ಬರಬೇಕಿದೆ. ಇನ್ನು ಪಂದ್ಯಗಳು ವಾಡಿಕೆಯಂತೆ ಸಂಜೆ 4 ಹಾಗೂ ರಾತ್ರಿ 8 ಗಂಟೆಗೆ ನಡೆಯಲಿದೆ.