ಐಪಿಎಲ್‌ನಲ್ಲಿ ನಂ.4 ಸ್ಥಾನಕ್ಕೆ ಉತ್ತರ: ಗಂಗೂಲಿ

ಹೊಸದಿಲ್ಲಿ: ಮುಂಬರುವ ಏಕದಿನ ವಿಶ್ವಕಪ್‌ನಲ್ಲಿ ನಾಲ್ಕನೇ ಕ್ರಮಾಂಕದಲ್ಲಿ ಯಾರು ಆಡಲಿದ್ದಾರೆ ಎಂಬುದಕ್ಕೆ ಸ್ಪಷ್ಟ ಉತ್ತರ ಸಿಗಲಿದೆ ಎಂದು ಮಾಜಿ ನಾಯಕ ಸೌರವ್ ಗಂಗೂಲಿ ಅಭಿಪ್ರಾಯಪಟ್ಟಿದ್ದಾರೆ.

ಅದೇ ಹೊತ್ತಿಗೆ ನಾಲ್ಕನೇ ಕ್ರಮಾಂಕದಲ್ಲಿ ಉದಯೋನ್ಮುಖ ರಿಷಬ್ ಪಂತ್ ಉತ್ತಮ ನಿರ್ವಹಣೆ ನೀಡಬಲ್ಲರು ಎಂದು ಈ ಬಾರಿ ಐಪಿಎಲ್‌ನಲ್ಲಿ ಡೆಲ್ಲಿ ಡೇರ್‌ಡೆವಿಲ್ಸ್ ಮಾರ್ಗದರ್ಶಕ ಹುದ್ದೆಯನ್ನು ವಹಿಸುತ್ತಿರುವ ದಾದಾ ತಿಳಿಸಿದರು.

ಪಂತ್ ಕಳೆದ ವರ್ಷ ಐಪಿಎಲ್‌ನಲ್ಲಿ ಹೇಗೆ ಆಡಿದ್ದಾರೆಂದು ನೋಡಿ. ಧೋನಿ ಇದ್ದಿದ್ದರಿಂದ ಪಂತ್‌ಗೆ ಬೇಕಾದಷ್ಟು ಅವಕಾಶ ದೊರಕಲಿಲ್ಲ. ಪಂತ್ ಭಾರತ ತಂಡದ ಭವಿಷ್ಯ. ಮುಂದಿನ 10 ವರ್ಷಗಳಲ್ಲಿ ಅವರಿಂದ ಸಾಕಷ್ಟು ನಿರೀಕ್ಷಿಸಬಹುದು. ಅವರು ಭಾರತ ತಂಡದ ದೊಡ್ಡ ಆಸ್ತಿ ಎಂದು ಗುಣಗಾಣ ಮಾಡಿದರು.

ನಂ.4 ಕ್ರಮಾಂಕಕ್ಕೆ ಐಪಿಎಲ್‌ನಲ್ಲಿ ಉತ್ತರ ದೊರಕಲಿದೆ. ಪಂತ್ ಹಾಗೂ ಅಂಬಟಿ ರಾಯುಡು ಉತ್ತಮ ಆಯ್ಕೆಯಾಗಲಿದ್ದಾರೆ. ನಾಯಕ ವಿರಾಟ್ ಕೊಹ್ಲಿ ಈ ಬಗ್ಗೆಸ್ಪಷ್ಟತೆಯನ್ನು ಹೊಂದಿರುತ್ತಾರೆ ಎಂದು ಸೇರಿಸಿದರು.

ನಾಯಕ ವಿರಾಟ್ ಕೊಹ್ಲಿ ಸ್ಥಾನದ ಬಗ್ಗೆ ಪ್ರಶ್ನಿಸಿದಾಗ, ಯಾವುದೇ ಕ್ರಮಾಂಕದಲ್ಲಿ ಕೊಹ್ಲಿ ರನ್ ಗಳಿಸಬಲ್ಲರು. ಆದರೆ ಮೂರನೇ ಕ್ರಮಾಂಕವೇ ಸೂಕ್ತವೆನಿಸುತ್ತದೆ ಎಂದರು.

ಅದೇ ಹೊತ್ತಿಗೆ ಡೆಲ್ಲಿ ತಂಡದ ಕೋಚ್ ರಿಕಿ ಪಾಂಟಿಂಗ್ ಸಹ ಪಂತ್ ನಾಲ್ಕನೇ ಕ್ರಮಾಂಕದಲ್ಲಿ ಆಡುವ ಪ್ರತಿಭೆಯನ್ನು ಹೊಂದಿದ್ದಾರೆ ಎಂದಿದ್ದಾರೆ. ಸದ್ಯ ಐಪಿಎಲ್ ಮೇಲೆ ಗಮನ ಕೇಂದ್ರಿಕರಿಸಲು ಬಯಸುತ್ತಿದ್ದು, ಉತ್ತಮವಾಗಿ ಆಡಿದರೆ ವಿಶ್ವಕಪ್‌ಗೂ ಕರೆ ಲಭಿಸಲಿದೆ ಎಂದರು.