ಮುಂಬಯಿ-ಕೆಕೆಆರ್ ಪಂದ್ಯದಲ್ಲಿ 'ನೊ-ಬಾಲ್' ವಿವಾದ

ಕೋಲ್ಕೊತಾ: ಇಂಡಿಯನ್ ಪ್ರೀಮಿಯರ್ ಲೀಗ್ 11ನೇ ಆವೃತ್ತಿಯ ಟ್ವೆಂಟಿ-20 ಕ್ರಿಕೆಟ್ ಚಾಂಪಿಯನ್‌ಶಿಪ್‌ನಲ್ಲಿ ಅಂಪೈರ್ ಕಳಪೆ ಗುಣಮಟ್ಟದ ಬಗ್ಗೆ ಈಗಾಗಲೇ ಆರೋಪಗಳು ಕೇಳಿಬಂದಿದೆ.

ಇದೀಗ ಮಗದೊಂದು ಕೆಟ್ಟ ಅಂಪೈರಿಂಗ್ ದಾಖಲಾಗಿದೆ. ಮುಂಬಯಿ ಇಂಡಿಯನ್ಸ್ ವಿರುದ್ಧದ ಪಂದ್ಯದಲ್ಲಿ ಕೋಲ್ಕೊತಾ ನೈಟ್ ರೈಡರ್ಸ್ ವೇಗಿ ಟಾಮ್ ಕುರ್ರಾನ್ ಎಸೆದ ದಾಳಿಗೆ ಫೀಲ್ಡ್ ಅಂಪೈರ್ ನೊ ಬಾಲ್ ನೀಡಿದ್ದರು.

ಬಳಿಕ ದೊಡ್ಡ ಸ್ಕೀನ್‌ನಲ್ಲಿ ರಿಪ್ಲೇ ತೋರಿಸಿದಾಗ ನೊ-ಬಾಲ್ ಅಲ್ಲ ಎಂಬುದು ಸಾಬೀತುಗೊಂಡಿತ್ತು. ಈ ಬಗ್ಗೆ ಬೌಲರ್ ಟಾಮ್ ಹಾಗೂ ನಾಯಕ ದಿನೇಶ್ ಕಾರ್ತಿಕ್ ಅಂಪೈರ್ ಮನವೊಳಿಸುವ ಪ್ರಯತ್ನ ಮಾಡಿದ್ದರು. ಆದರೆ ಯಾವುದೇ ಪ್ರಯೋಜನವುಂಟಾಗಲಿಲ್ಲ.

ನಿಮಯಗಳ ಪ್ರಕಾರ ಸ್ಕ್ರೀನ್ ನೋಡಿ ಅಂಪೈರ್ ತಮ್ಮ ನಿರ್ಧಾರವನ್ನು ಬದಲಾಯಿಸುವಂತಿಲ್ಲ. ಟಾಮ್ ಕಾಲು ಮೊದಲು ನೆಲವನ್ನು ಸ್ಪರ್ಶಿಸುವಾಗ ನೊ ಬಾಲ್ ಆಗಿರಲಿಲ್ಲ. ಇದು ರಿಪ್ಲೇನಲ್ಲಿ ಸ್ಪಷ್ಟವಾಗಿತ್ತು. ಹಾಗಿದ್ದರೂ ಅಂಪೈರ್ ನೊ ಬಾಲ್ ನೀಡಿರುವುದು ವಿವಾದಕ್ಕೆ ಕಾರಣವಾಗಿದೆ. ಇದರಿಂದಾಗಿ ಮುಂಬಯಿ ಇಂಡಿಯನ್ಸ್ ಫ್ರಿ ಹಿಟ್ ಸಹ ಪಡೆದಿತ್ತು.

ಇನ್ನೊಂದೆಡೆ ರಿಪ್ಲೇ ತೋರಿಸುವಾಗ ತಾಂತ್ರಿಕ ಎಡವಟ್ಟು ಸಂಭವಿಸಿತೇ ಎಂಬುದು ಸಹ ಸಂದೇಹಕ್ಕೀಡು ಮಾಡಿದೆ. ಈ ಬಗ್ಗೆ ಐಪಿಎಲ್‌ ಆಡಳಿತ ಸಮಿತಿಯಿಂದ ಯಾವುದೇ ಸ್ಪಷ್ಟನೆ ಹೊರಬಂದಿಲ್ಲ.