ಫೈನಲ್‌ನಲ್ಲಿ ಠುಸ್ ಪಟಾಕಿಯಾದ ರೋ'ಹಿಟ್' ಬ್ಯಾಟ್

ಹೈದರಾಬಾದ್: ಇಂಡಿಯನ್ ಪ್ರೀಮಿಯರ್ ಲೀಗ್ 2019ನೇ ಸಾಲಿನ ಟ್ವೆಂಟಿ-20 ಕ್ರಿಕೆಟ್ ಚಾಂಪಿಯನ್‌ಶಿಪ್‌ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ನಡೆಯುತ್ತಿರುವ ಹೈ ವೋಲ್ಟೇಜ್ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ನಾಯಕ ರೋಹಿತ್ ಶರ್ಮಾ ಬ್ಯಾಟಿಂಗ್ ವೈಫಲ್ಯವನ್ನು ಅನುಭವಿಸಿದ್ದಾರೆ.

ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ನಡೆಸಿದ ಮುಂಬೈ ತಂಡಕ್ಕೆ ಆರಂಭಿಕರಾದ ನಾಯಕ ರೋಹಿತ್ ಶರ್ಮಾ ಹಾಗೂ ಕ್ವಿಂಟನ್ ಡಿ ಕಾಕ್ ಬಿರುಸಿನ ಆರಂಭವೊದಗಿಸಿದರು. ಪಂದ್ಯದ ದ್ವಿತೀಯ ಓವರ್‌ನಲ್ಲಿ ಸಿಕ್ಸರ್ ಸಿಡಿಸಿದ ರೋಹಿತ್ ದೊಡ್ಡ ಮೊತ್ತ ಕಟ್ಟುವ ಸೂಚನೆ ನೀಡಿದರು.

ಮೊದಲು ಆಕ್ರಮಣಕಾರಿ ಬ್ಯಾಟಿಂಗ್ ಮಾಡಿ ಎದುರಾಳಿಗಳ ಮೇಲೆ ಒತ್ತಡ ಹೇರುವುದು ಮುಂಬೈ ಇರಾದೆಯಾಗಿತ್ತು. ಇದಕ್ಕೆ ತಕ್ಕುದಾಗಿ ಓಪನರ್‌ಗಳು ಬ್ಯಾಟ್ ಬೀಸಿದರು.

ಈ ಹಂತದಲ್ಲಿ ಮತ್ತೆ ದಾಳಿಗಿಳಿದ ದೀಪಕ್ ಚಹರ್ ದೊಡ್ಡ ತಿಮಿಂಗಲವನ್ನೇ ಹೊರದಬ್ಬಿದರು. ಚಹರ್ ದಾಳಿಯಲ್ಲಿ ನಾಯಕ ಧೋನಿ ಕೈಗಳಿಗೆ ಕ್ಯಾಚಿತ್ತ ರೋಹಿತ್ ಶರ್ಮಾ 14 ಎಸೆತಗಳಲ್ಲಿ ತಲಾ ಒಂದು ಬೌಂಡರಿ ಹಾಗೂ ಸಿಕ್ಸರ್ ನೆರವಿನಿಂದ 15 ರನ್ ಗಳಿಸಿದರು.

ಇದರೊಂದಿಗೆ ಅತಿ ಒತ್ತಡದ ಫೈನಲ್ ಪಂದ್ಯದಲ್ಲಿ ಮುಂಬೈ ನಾಯಕ ವೈಫಲ್ಯ ಅನುಭವಿಸಿದ್ದಾರೆ.