ಡೆಲ್ಲಿ ವಿರುದ್ಧ ಮಹಿ ಆಡುವುದು ಡೌಟ್!

ಚೆನ್ನೈ: ಇಂಡಿಯನ್ ಪ್ರೀಮಿಯರ್ ಲೀಗ್‌ 2019ನೇ ಸಾಲಿನ ಟ್ವೆಂಟಿ-20 ಕ್ರಿಕೆಟ್ ಚಾಂಪಿಯನ್‌ಶಿಪ್‌ನಲ್ಲಿ ಬುಧವಾರ ನಡೆಯಲಿರುವ ಟೇಬರ್ ಟಾಪರ್‌ಗಳ ನಡುವಣ ಪಂದ್ಯದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡವು ಡೆಲ್ಲಿ ಕ್ಯಾಪಿಟಲ್ಸ್ ತಂಡವನ್ನು ಎದುರಿಸಲಿದೆ.

ಈಗಾಗಲೇ ಪ್ಲೇ-ಆಫ್ ಸ್ಥಾನವನ್ನು ಬುಕ್ ಮಾಡಿರುವ ಇತ್ತಂಡಗಳು ಅಗ್ರಸ್ಥಾನಕ್ಕಾಗಿ ಪೈಪೋಟಿ ನಡೆಸಲಿದೆ. ಈ ನಡುವೆ ಚೆನ್ನೈನ ಚಿದಂಬರಂ ಮೈದಾನಲ್ಲಿ ನಡೆಯಲಿರುವ ಪಂದ್ಯದಲ್ಲೂ ನಾಯಕ ಮಹೇಂದ್ರ ಸಿಂಗ್ ಧೋನಿ ಆಡುವುದು ಅನುಮಾನವೆನಿಸಿದೆ.

ಜ್ವರದಿಂದಾಗಿ ಮುಂಬೈ ಇಂಡಿಯನ್ಸ್ ವಿರುದ್ಧದ ಪಂದ್ಯಕ್ಕೆ ಧೋನಿ ಅಲಭ್ಯವಾಗಿದ್ದರು. ಪರಿಣಾಮ ಹೀನಾಯ ಸೋಲನ್ನು ಅನುಭವಿಸಿತ್ತು.

ತದಾ ಬಳಿಕ ಒಂದೆರಡು ದಿನಗಳಲ್ಲಿ ತರಬೇತಿಯಿಂದ ಧೋನಿ ಹೊರಗುಳಿದಿದ್ದರು. ಮುಂಬರುವ ಏಕದಿನ ವಿಶ್ವಕಪ್ ಗಮನದಲ್ಲಿಟ್ಟುಕೊಂಡು ಧೋನಿ ಸಂಪೂರ್ಣವಾಗಿ ಫಿಟ್ನೆಸ್ ಮರಳಿ ಪಡೆಯುವ ತನಕ ಕಾಯುವ ಸಾಧ್ಯತೆಯಿದೆ.

ಪದೇ ಪದೇ ಕಾಣಿಸಿಕೊಳ್ಳುತ್ತಿರುವ ಬೆನ್ನು ನೋವಿನ ಸಮಸ್ಯೆಯ ಬಗ್ಗೆಯೂ ಧೋನಿ ಜಾಗರೂಕರಾಗಿದ್ದಾರೆ.